fbpx

 

كتابة المحتوى من المهام الصعبة والمعقدة عشان محتاجة ذكاء وصبر!

 

ممكن تاخد ساعات عشان تجيب فكرة محتوى، وتاخد ساعات أكتر عشان تعمل عليها بحث، وتاخد ساعات أكتر وأكتر عشان تكتبها!

 

لو حظك حلو عملية كتابة المحتوى كلها هتمشي بسلاسة، إنما لو حظك وحش هتقابل مشاكل كتيرة زي:

 

  • الـ Writer’s Block، ودى عبارة عن حالة نفسية/عقلية بتصيب اللي بيكتب محتوى، وبتخليه غير قادر على إنتاج حرف جديد، ورقة بيضا وانت بتتفرج عليها أو كل ما تكتب حاجة تمسحها.

 

  • الـ Unfinished Work، يعني إنك تبدأ في حاجة، وماتخلصهاش للآخر، تسيبها في نصها أو في أولها أو قبل الاخر بشوية، المهم بتبدأ ومبتخلصش!

 

  • رمي الاسهم في الظلام أو زي ما يسميها الأجانب “Throwing Darts in the Dark”، ودي حالة بتصيب معظم المبتدئين وكتير من اللي شغالين في المجال من زمان، وملخصها إن الشخص مش بيكون عارف اللي بيعمله ده صح ولا غلط، ولو صح صح ليه، ولو غلط غلط ليه؟

 

ومشاكل تانية كتير.

 

ازاى تتفادي المشاكل دي وانت بتكتب محتوى؟

 

امشي على خطوات منظمة مرتبة.

 

طب ايه هي الخطوات دي؟

 

في المقال ده هقولك ايه هي الخطوات دي، وهقولك سر بسيط ساعدني اكتب محتوى طلع في النتيجة رقم #1 في جوجل.

 

لو كتبت في جوجل “كتابة المحتوى” هتلاقي المحتوى بتاعي طالع في النتيجة رقم #1.

 

كتابة المحتوى

 

لو كتبت في جوجل “شركات الفوركس” هتلاقي المحتوى اللي كتبته لموقع ارينسن طالع في النتيجة رقم #1.

 

كتابة المحتوى

 

لو كتبت في جوجل “العملات الرقمية” هتلاقي المحتوى اللي كتبته لموقع ارينسن طالع في الصفحة رقم #1 (تحديدا في النتيجة رقم #3).

 

كتابة المحتوى

 

خطوات كتابة محتوى لمحركات البحث

 

1- تحديد الجمهور المستهدف بدقة

2- اختيار موضوع وأفكار المحتوى بعناية

3- عمل بحث الكلمات المفتاحية باحترافية

4- كتابة المحتوى للجمهور المستهدف بشكل طبيعي

5- تحسين وتهيئة المحتوى لمحركات البحث بشكل صحيح

6- تسويق وترويج المحتوى خارج الموقع بشكل مظبوط بدون سبام

 

دول الـ 6 خطوات أساسية اللي انا عن نفسي استخدمتها في كتابة محتوى لمحركات البحث، ونجحت إني أطلع بالمحتوى ده للنتيجة رقم #1 زي ما شفت.

 

الموضوع بسيط ولكن مش سهل!

 

إخلاء مسئولية: الـ 6 خطوات اللي قلنا عليهم كلهم مهمين، و نسيان أو إهمال اي عنصر بيخلي المحتوى اللي هيخرج في النهاية محتوى وحش مش بس مش هيظهر في جوجل!

 

دلوقتي هقولك على السر البسيط اللي ساعدني اكتب محتوى عالي الجودة، واحسن من محتوى المنافسين أو المحتوى الموجود على الانترنت عموما في المجال بتاعي.

 

السر في حاجة اسمها Content Gap Analysis.

 

يعني ايه؟

 

الـ Content Gap Analysis عبارة عن عملية لتقييم المحتوى الموجود بالفعل في موضوع ما، واكتشاف الفجوات في المحتوى لتحسين وبناء المحتوى بتاعنا عليه.

 

تاخد مثال عملي؟

 

يوم 19 يناير 2018 كتبت مقال عن “كتابة المحتوى”، بس قبل ما اكتب حرف واحد، كتبت في جوجل جملة “كتابة المحتوى” وقريت كل المقالات اللي اتعملت عن الموضوع ده!

 

وقدرت اعرف ايه هي الفجوات اللي محدش قدر يغطيها لحد الوقت ده!

 

والفجوات دى كانت:

 

1- محدش كتب محتوى طويل تفصيلي.

2- مفيش محتوي عن كتابة المحتوى خطوة بخطوة.

3- محدش كتب محتوى اصلي/حصرى، الغالية كانوا مترجمين.

4- تقريبا مفيش حد بسط الموضوع بطريقة تخلي أي حد يفهم ويطبق، كله كلام نظري.

 

بناء عليه، كتبت قطعة محتوى طويلة وعميقة فيها كل التفاصيل اللازمة لكتابة محتوى، ومنظمة ومرتبة بشكل ممنهج وخطوة بخطوة.

 

والاهم إنها كانت حصرية أو أصلية، يعني من خلال خبراتي التراكمية في المجال لأكتر من 4 سنين وقتها.

 

وفعلا كتبت المحتوى، ونشرته، واحتل النتيجة رقم #1 في ترتيب جوجل للكلمة المفتاحية “كتابة المحتوى”.

 

وبقي كل يوم بيجي لى ترافيك مجاني من جوجل من غير ما اصرف اعلانات، ولا ابذل مجهود إضافي.

 

كتابة المحتوى

 

الموضوع ماوقفش لحد هنا!

 

كل يوم بقى يجيلى Leads مهتمين جدا باللى انا ببيعه (أكتر من 4500 Lead) …

 

كتابة المحتوى

 

وكمان بيكون فيه مبيعات بشكل دورى (أكتر من 500 شخص اشتري المنتجات اللى قدمتها)

 

كتابة المحتوى

 

كل ده بسبب قطعة محتوى واحدة، صحيح ممكن الارقام ماتكونش كبيرة جدا، ولكنها بكل تأكيد مناسبة لحجم الشغل اللي بيتعمل!

 

انا مابكتبش محتوى جديد كل يوم، ولا بصرف آلاف كل شهر في الاعلانات (انا اصلا مش بعمل اعلانات).

 

طب ازاى تعمل Content Gap Analysis؟

 

اكتب في بحث جوجل اسم موضوع المحتوى، ثم ادخل على كل قطعة محتوى موجودة في الصفحة الأولى.

 

وبعدين هات ورقة بيضا وقلم رصاص، وابدأ اكتب اجابة الاسئلة اللي هقولك عليها حالا.

 

1- هل المحتوى مغطي كافة جوانب الموضوع، ولا فيه جوانب ماجاش جمبها؟

 

2- هل المحتوى تفصيلي ولا مجرد معلومات عامة عن الموضوع؟

 

3- هل المحتوى منظم ومرتب ولا مجرد شوية معلومات مرصوصة جنب بعض وخلاص؟!

 

4- هل المحتوى اصلي، ولا مترجم ولا مُعاد الصياغة؟

 

بالاسئلة دى هتقدر تحدد قيمة كل قطعة محتوى وتعرف المناطق اللي لازم تلعب عليها في المحتوى بتاعك عشان تكسب المحتوى اللي هما عاملينه، وتطلع في جوجل قبلهم.

 

الخطوات دي رغم بساطتها إلا اني عملتها وجابت معايا نتائج محترمة، وغيري جربها وجابت معاه نتائج.

 

جربها انت كمان.

 

اخيرا قولي في تعليق، ايه المشكلة أو التحدي رقم #1 اللي بقالك كتير بتدور على حل ليه ومش لاقي حل عدل اون لاين؟

 

مثلا ممكن تقولي أفكار المحتوى، أو كتابة المحتوى الطويل، أو تحديد الجمهور المستهدف، أو كتابة محتوى عاطفي يخلي الجمهور المستهدف يعمل له شير، أو كتابة المحتوى البيعي الخ …

 

في انتظار تعليقك ^^

 

التصنيفات: Content Marketing

4 تعليقات

Ali Saed · 2019-02-10 في 4:36 م

مقال محترم جدا جدا ومفيد بس الاهم من المقال هو التطبيق العملي للكلام علر اكتر من بروجيكت عشان نقدر نتحول من محتوى حلو مقبول لمحتوى عظيم يطلع رقم #1 على جوجل

    Osama Salah · 2019-02-10 في 7:59 م

    كلام مظبوط، طبق وابعت لى ^^

Mohamed · 2019-03-09 في 2:55 م

ممكن اعرف افضل طريقه لمعرفه افضل كلمات مفتاحيه لتسويق اي منتج؟

    Osama Salah · 2019-03-11 في 8:02 م

    افضل طريقة فى رايي هي كتابة المحتوى الاول بهدف التعليم بس، مع الاخذ فى الاعتبار اضافة قيمة وفايدة فعلا مش موجودة على الانترنت، وانت بتعمل كده هتسال نفسك سؤال وهو: لو الجمهور المستهدف هيدور على اي معلومة من الموجودة جوه المحتوى بتاعك هيدور بايه؟ وهي دى هتكون الكلمات المفتاحية بتاعك، بالاضافة لاستخدام الادوات المساعدة، ودول اداوت هتساعدك فى الموضوع ده

    https://osamasalah.com/keyword-research/

اسال او استفسر او قول رايك ...

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.