fbpx

الدليل النهائي للبداية فى مجال التسويق عبر الانترنت

مجال التسويق عبر الانترنت بقي اكتر مجال مشهور، الكل عايز يبدأ فيه سواء عشان العائد المادي من وراه كويس او عشان مستقبله كبير.

 

المقال موجه للناس اللي مش عارفة ازاى تبدأ في التسويق عبر الانترنت ومش عارفة ازاى تختار مجال من مجالات التسويق عبر الانترنت عشان تبدأ فيه.

 

بس قبل ما نبدأ، لازم نوضح شوية مفاهيم متشابكة!

 

التسويق الرقمي VS التسويق عبر الإنترنت

 

التسويق الرقمي (Digital Marketing) حسب موقع ويكيبيديا هو:

 

التسويق الرقمى

 

“تسويق المنتجات أو الخدمات باستخدام التكنولوجيا الرقمية، بصورة أساسية بإستخدام الإنترنت أو اي وسط رقمي”.

 

كلمة السر هنا هي “وسط رقمي” …

 

معنى كده إن أي حاجة تعتمد على التكنولوجيا الرقمية (0 و 1) تندرج تحت مسمى التسويق الرقمي.

 

يعني مش بس الإنترنت، لا ده التلفزيون، والراديو وغيرهما!

 

إذن التسويق الرقمي مقسوم لجزئين:

 

1- التسويق عبر الانترنت (Online Marketing)

2- التسويق الغير متصل بالإنترنت (Offline Marketing)

 

قبل ما نتكلم عن التسويق عبر الانترنت، تعالوا نتكلم بسرعة جدا عن التسويق اللي مش عبر الانترنت.

 

الـ Offline Marketing مقسوم لـ 4 أجزاء رئيسية:

 

التسويق التقليدي

 

1- الـ TV Marketing

2- الـ Radio Marketing

3- الـ Mobile Marketing

4- الـ Digital Billboards

 

خد بالك، الـ Offline Marketing جواه أربع فروع أساسية تحت مظلة الـ Digital.

 

وجواه فروع تانية تحت مظلة الـ Traditional زي المطبوعات مثلا، ولكن هنا كلامنا هيكون على الفروع اللي تحت مظلة الـ Digital.

 

التسويق عبر الانترنت (Online Marketing)

 

من وجهة نظري، اي شغلانة في الدنيا بتبقي عبارة عن: عقلية + معرفة + مهارات.

 

العقلية أو الـ Mindset هو النظام اللي بيوجّه المعرفة و المهارة في إتجاه معين نحو القمة او نحو القاع او فى النص بينهم.

 

المعرفة هي اللي بتَثقل المهارة من ناحية الجودة والأداء، يعني بتحدد مستوي التمكن والشغل اللى بيطلع منك فى النهاية.

 

المهارة هي اللى مسئولة عن إنتاج المنتج النهائي اللي الناس بتشوفه وبيتم الحكم على المعرفة وعلى العقلية من خلال المهارة دى.

 

دلوفتى هتكلم عن التسويق عبر الانترنت في كل مستوى من المستويات التلاتة اللى قولت عليهم.

 

نبدأ على بركة الله …

 

فيه حاجتين لازم نتكلم عليها قبل ما نتكلم عن العقلية اللي لازم اي شخص شغال او ناوي يشتغل في التسويق عبر الإنترنت يطورها.

 

الحاجة الأولى: هما اللي شغالين في التسويق عبر الانترنت اشتغلوه ازاى او جم منين؟

 

1- ناس كانت شغالة في الـ Offline ومع تطور ظهور الإنترنت في مصر، ونبوغ المجال أكتر، دخلوا مجال الأونلاين.

 

2- ناس سمعت عن المجال، وقالت اجرب حظي، فراحوا أخدوا كورسات وذاكروا واشتغلوا على نفسهم وكملوا في المجال.

 

كل شخص من الشخصين دول، وعيه والعقلية بتاعت مختلفة عن التاني.

 

تانى حاجة، هو يعني ايه تسويق عبر الإنترنت اصلا؟

 

التسويق عبر الانترنت يعني التسويق عبر الانترنت!

 

اه والله!

 

بص عشان نقدر نحط تعريف للتسويق عبر الانترنت، لازم نحط تعريف للتسويق.

 

التسويق هو فن وعلم إكتساب مجموعة محددة من العملاء المحتملين والمحافظة عليهم وزيادة عددهم.

 

إذن التسويق عبر الانترنت هو فن وعلم إكتساب مجموعة محددة من العملاء المحتملين والمحافظة عليهم وزيادة عددهم عن طريق؟

 

عن طريق مجموعة من القنوات عبر الإنترنت مثل السوشيال ميديا، محركات البحث، والبريد الإلكتروني، والمواقع الإلكترونية.

 

3 أفكار يجب عليك تبنيها للنجاح في التسويق عبر الانترنت

 

1- التسويق هو التسويق، الإختلاف في حاجات تانية!

 

سواء انت كنت الشخص الأول، أو الشخص التاني، لازم تفهم كويس أوي إن التسويق هو التسويق، الإختلاف في حاجتين:

 

1- سلوك البشر

2- التكنولوجيا

 

بعد مليون سنة هيكون التسويق هو هو!

 

في كتاب Content Marketing Principles اتكلمت على جزئية تطور سلوك البشر وجزئية تطور التكنولوجيا، وازاى شكل التسويق كان بيتغير حسب تغير سلوك البشر والتكنولوجيا.

 

صحيح التسويق هو هو من حيث الفكرة والجوهر، ولكن شكل التسويق عبر الإنترنت مختلف لأن الوسط مختلف!

 

ده إنترنت يعني تفاعلي، يعني طريق رايح جاي مش طريق رايح بس.

 

الإنترنت غير سلوك البشر فبقوا عايزين يتعلموا ويقروا ويفهموا الأول قبل ما ياخدوا قرار الشراء وكله بفضل جوجل والمحتوى.

 

عايز تعرف شكل التسويق هيكون عامل ازاى كمان 10 سنين من دلوقتي؟

 

توقع شكل سلوك البشر والتكنولوجيا كمان 10 سنين، وعشان تتوقع المستقبل، لازم تشوف وتحلل الماضي.

 

2- مفيش حاجة ببلاش غير العمى والطراش!

 

حقيقي مفيش حاجة ببلاش، عايز تنجح؟

 

انجح وماله!

 

بس ادفع.

 

أحد أهم الخرافات أو الأفكار المغلوطة عند الناس عن التسويق عبر الانترنت، إنه ببلاش!

 

يا اخوانا التسويق عبر الانترنت مش ببلاش، ولكن تكلفته أقل من التسويق اللى مش على الإنترنت.

 

3- التسويق عبر شبكات التواصل الإجتماعي مش أهم حاجة في التسويق عبر الإنترنت

 

معظم أصحاب الشركات ومتخذي قرار التسويق في الشركات في مصر، من غير تفكير ولا تحليل بيشتغلوا على شبكات التواصل الاجتماعي وخاصة الفيسبوك الأول، وده غلط 100%.

 

شبكات التواصل الإجتماعي قناة تسويقية، وقرار اختيار القنوات التسويقية ده ليه أصول مش هباء كده!

 

عشان تحدد القناة التسويقية (الـ Marketing Channel) اللى “لازم” تشتغل عليها، فيه شوية اسئلة لازم تجاوب عليها بوضوح.

 

  • مين الجمهور المستهدف؟
  • موجود فين؟
  • ايه الموراد اللى تملكها؟
  • استراتيجية التسويق اللى شغال بيها

 

الأسئلة دى كفيلة بأنها تخليك تحسم قرار أنهي قناة تسويقية هتعتمد عليها.

 

إذن، على حسب مكان وجود الجمهور المستهدف، هدف الشركة، والموارد اللى تمتلكها، هتختار القناة التسويقية المناسبة.

 

يعني الإختيار مابيكونش على أساس أن الناس كلها بتشتغل على القناة الفلانية، فيه شركات عادى مش بتشتغل على الفيسبوك.

 

 

دول كانوا 3 أفكار لازم أي مسوق عبر الانترنت يؤمن بيها ويكون بيفكر في التسويق عبر الانترنت بالأسلوب ده.

 

ده كان فيما يخص العقلية، ندخل بقي على المعرفة.

 

الفروع الرئيسية فى التسويق عبر الانترنت (Online Marketing)

 

التسويق عبر الانترنت مقسوم لـ 4 أجزاء رئيسية:

 

التسويق عبر الانترنت

 

1- التسويق عبر المحتوى (Content Marketing)

2- التسويق عبر محركات البحث (Search Engine Marketing)

3- التسويق عبر وسائل التواصل الإجتماعي (Social Media Marketing)

4- التسويق عبر البريد الالكتروني (Email Marketing)

 

كل جزء من دول ليهم جانب Organic يعني مجاني، و جانب Paid يعني مدفوع.

 

نبدأ على بركة الله ^^

 

1- التسويق بالمحتوى (Content Marketing)

 

التسويق بالمحتوى أهم جزء في التسويق عبر الانترنت، وده عشان من غيره مفيش حاجة من التلاتة التانيين هتشتغل!

 

التسويق بالمحتوى هو استراتيجية تسويقية يتم تنفيذها عن طريق عمل وتقديم محتوى عالي الجودة، لجمهور مستهدف ومحدد، بهدف كسب ثقته ودفعه لاتخاذ قرار ربحي بالنسبة للشركة.

 

التسويق بالمحتوى بحر كبير، وتعلمه بالكامل ممكن ياخد منك سنين عشان تقدر تجمع كل خيوطه وتفك شفراته، ولكن انا سهلت عليك الطريق ده عن طريق المقال الدسم ده.

 

التسويق بالمحتوى ذاته جواه أجزاء كتيرة، من أهمها طبعا الـ Content Creation، وأنا عامل كورس مجاني عبر الإيميل عن الموضوع ده (لينك الكورس).

 

تعلم أساسيات التسويق بالمحتوى بشكل كامل خطوة بخطوة 

 

2- التسويق عبر محركات البحث (Search Engine Marketing)

 

التسويق عبر محركات البحث جزء مهم جدا برضو، ومش مهم عشان أنا قولت كده، إنما تعالي نفكر بالعقل كده …

 

دلوقتي أول ما أي حد مننا بيواجه مشكلة معينة أو بيكون عايز يعرف حاجة معينة، بيعمل ايه؟

 

بيروح لجوجل يساله على حل المشكلة دي، وبالتالي الجزء ده ماينفعش الشركات تستغني عنه إلا فى أضيق الحدود.

 

الجزء ده بعبع لناس كتيرة بسبب إنهم فاهمين إنه كله حاجات معقدة وتكنولوجيا، وإن جانب الفن فيه قليل جدا مقارنة بباقي الأجزاء!

 

بس كل الكلام ده مش حقيقة واوهام، الجزء ده ممتع جدا.

 

بس محتاج شخص صبور ودقيق وبيحب التفاصيل مهما كانت صغيرة، وعنده تفاني في العمل غير طبيعي لإن الموضوع مرهق ذهنيا وبدنيا.

 

الجانب الـ Organic من التسويق عبر محركات البحث اسمه SEO إختصار لـ Search Engine Optimization.

 

الـ SEO عبارة عن شوية حاجات بتتعمل جوه المواقع الإلكترونية بحيث تظهر محتوى الموقع في ترتيب متقدم فى نتائج البحث لكلمة معينة.

 

أما الجانب الـ Paid من التسويق عبر محركات البحث فهو متمثل فى الـ Search Ads.

 

الإسم الأشهر للنوع ده هو PPC Ads اللى هو Pay per Click، ويطلق عليه الإسم ده عليه نظرا عن نظام التسعير بتاع نوع الإعلانات دي الدفع مقابل الضغط على الإعلان.

 

فيه 6 مصادر لازم تقرأها لو كنت عايز تتخصص في المجال الـ SEO، وهما:

 

1- Beginner’s Guide to SEO من Moz

 

2- The Advanced Guide To SEO من Quick Sprout

 

3- The Definitive Guide To SEO In 2020 من Backlinko

 

4- A Complete Guide to Getting Started in SEO من Search Engine Journal

 

5- Search Engine Land’s Guide To SEO من Search Engine Land

 

6- SEO Made Simple: A Step-by-Step Guide من Neil Patel

 

الـ SEO بيتجدد وبيتغير بإستمرار، عشان كده لازم ماتكفيش بأنك تقرا الـ 6 أدلة اللي قولت لك عليهم، ولكن تتابع الـ 6 مواقع بصورة مستمرة.

 

طبعا لو عايز مصادر بالعربي، اكتب في جوجل سيو وهيظهرلك شوية مواقع عربية تقدر تبتدي منها.

 

بس الاحسن تبدا بالـ 6 مصادر اللي قولت لك عليهم، أو تشوف حد مشي الطريق قبلك عشان يقصره عليك.

 

دوس هنا لو عايز تتعلم كتابة محتوى يخدم هدف الـ SEO ويطلع فى النتائج الأولي فى جوجل 

 

3- التسويق عبر وسائل التواصل الإجتماعي (Social Media Marketing)

 

للأسف التسويق عبر وسائل التواصل الإجتماعي يبان سهل، وعشان كده الشغلانة قربت تكون شغلانة اللي ملوش شغلانة!

 

سبب الإنهيار ده هو الحاجات اللي بنشوفها في المجال يوميا من كلام عجيب وغير علمي من ناس كتير!

 

للاسف قليل أوي اللي مدي التسويق عبر وسائل التواصل الإجتماعي قيمته في مصر تحديدا والعالم كله عموما.

 

عدد قليل اوى اللى بيعرف – عمليا – ازاى يخلي الـ Social Media تلعب لصالح الـ Business.

 

الجانب الـ Organic منها، إن المحتوى يظهر بشكل مجاني وسط الـ Feed بتاع الجمهور المستهدف، وده ليه شوية شروط لو اتعملت صح في ظروف صح هتجيب معاك نتائج كبيرة.

 

الجانب الـ Paid منها يسمى بالـ Social Media Ads، وهو عبارة عن إن المحتوى اللي الشركة بتعمله يظهر بشكل طبيعي وسط الـ Feed بتاع الجمهور المستهدف.

 

عشان تشتغل في المجال ده، لازم تكون بتحب تتواصل مع البشر، وبتحب تؤثر فيهم، وبتحب تتعلم وتعلم، وعندك طولة بال، وأهم حاجة أهم حاجة تكون بتعرف تسمع!

 

وطبعا لازم تتعلم الأساسيات الصح!

 

ده دليل عملي فيه أساسيات التسويق عبر وسائل التواصل الإجتماعي (النظرية والتطبيق العملي). 

 

وبما إن الفيسبوك هو أكبر منصة تواصل إجتماعي وأكثرها أهمية بالنسبة للناس في مصر، فالفيسبوك عمل حاجة إسمها Facebook Blueprint وهي عبارة عن مجموعة كورسات مجانية في التسويق عبر الفيسبوك وانستجرام.

 

وأخيرا لو عايز تتعلم اعلانات الفيسبوك على اصولها، اقرا الأدلة اللي بيعملها الناس بتوع AdEspresso بتمعن.

 

4- التسويق عبر البريد الالكتروني (Email Marketing)

 

باختصار التسويق عبر الإيميل هو إستخدام الايميلات بتاعت مجموعة من الناس في التسويق ليهم.

 

وعشان ده يحصل لازم يكون معاك Email List من ناس عارفه وموافقة انك ترسل لها حاجات على الايميل بتاعها.

 

وعشان ده يحصل بدوره لازم تقدم لهم شئ ذو قيمة بشكل مجاني في مقابل إنهم يدوك الإذن ده!

 

زي بالظبط ما انا عملت أما قدمت كورس عمل المحتوى بشكل مجاني، فهمت؟

 

بعد ما بيكون عندك قائمة بريدية محترمة جاية بطرق مشروعة، بتبتدى تبعت لهم محتوى مفيد بصورة مستمرة لحد ما يشتروا اللي انت بتبيعه.

 

عشان تدخل مجال التسويق عبر البريد الإلكتروني لازم تكون بتعرف تتعامل مع التكنولوجيا، وبتحب وبتعرف تبيع على الإنترنت.

 

لو عايز تتعلم التسويق عبر البريد الإلكتروني يبقي روح عند Marketo وانت هتلاقي مقالات وأدلة وكتب إلكترونية عن كافة المواضيع اللي ليها علاقة بالتسويق عبر البريد الإلكتروني.

 

وبكده أكون خلصت كلامي عن التسويق عبر الانترنت، وأتمنى أن يكون الدليل ده فعلا دليل ليك.

 

ازاى تبدا في التسويق عبر الإنترنت؟

 

دلوقتي هجاوب على السؤال ده بطريقة أكثر وضوحا مستعينا بكل اللي اتشرح، فركز معايا الله يبارك لك عشان الكلام كبير.

 

أول حاجة محتاج تعملها انك تعرف انت مين؟

 

انا عارف ان سؤال انت مين ده ممكن يكون مرهق ومستفز في بعض الاحيان لكتير من الناس!

 

ولكن اهميته تكمن في انه بيخليك تعرف ايه المناطق اللي انت كويس فيها فتعتمد عليها، وايه المناطق اللي انت مش كويس فيها وتقويها.

 

هات ورقة وقلم، واقسم الصفحة نصين، النص الاولاني اكتب فيه الحاجات اللي بتحب تعملها مهما كانت، والنص التاني اكتب فيه الحاجات اللي بتعرف تعملها مهما كان ادائك فيها.

 

هات ورقة تانية، واقسم الصفحة نصين، اكتب في النص الاولاني الطريقة اللي انت بتحب تتعلم بيها، وفى النص التاني اكتب الطريقة اللي انت بتحب تستخرج اللي في دماغك بيها.

 

دلوقتي حط الورقتين جمب بعض وبص لهم كتير، وفكر اكتر، وبعدين ابتدى جمع المتشابهات جمب بعض أو اللي ليهم علاقة ببعض جمب بعض.

 

تاني حاجة انك تشوف أنت هـ تؤدي أحسن في انهي مجال!

 

الموضوع ملوش علاقه بالحب، الموضوع ليه علاقة بأنهي منطقة إنت هتبدع فيها وفقا لسماتك الشخصية.

 

وفقا لنتيجة الورقتين اللي فاتوا، وفى ضوء معرفتك بالمجالات بتاعت التسويق عبر الإنترنت …

 

ابتدى اختار مجال واحد ودوس فيه بقلب جامد من خلال المصادر اللي ذكرتها عند كل جزء فوق.

 

تالت واهم حاجة إنك تشوف ناس في المجال اللي انت اخترته وتتصاحب عليهم، وتستفيد وتتعلم منهم وتناقشهم.

 

وأخيرا ماتنساش كلما تعلمت أكثر، كلما ربحت أكثر.

 

قولي فى تعليق، ايه المجال او التخصص اللى بتدور على كورس تعليمي فيه؟

16 رأي حول “الدليل النهائي للبداية فى مجال التسويق عبر الانترنت”

  1. ما شاء الله عليك جزاك الله كل خير عن هذا المقال الرائع كنت حابب بس اتواصل معاك بخصوص اازاي ابدء محتااج نصيحتك فلو في اكونت او رقم اقدر اكلمك عليه

    رد
  2. بالنسبة لي أصعب جزء في التسويق عبر الإنترنت هو التسويق بالمحتوى .. مش عشان حضرتك ذكرت إنه أهم شيء ولكن لأنه بالفعل عايز مهارة كتابة غير عادية للخروج بمقالة ذات جودة عالية تجذب بيها القاريء أنه مش بس يكملها للأخر وبتركيز شديد .. لأ ده لدرجة أنه يقتنع بيك ويطلب منك شراء أو إمتلاك السلعة اللي بتقدمها .. وده الحقيقة السبب ف إني وصلت لهنا وفعلاً بإرادتي كملت المقال للأخر وبكامل إرادتي هشتري منك الكتب اللي محتاجها بإذن الله هيتم التواصل مع حضرتك قريباً عسى إني أستفيد من علمك ويكون سبب نجاحي في حياتي العملية.

    رد
    • الحقيقة يا مودي أنا بشكرك جدا على كتابة التعليق ده بالتفصيل ده، فعلا هيساعدني كتير الفترة اللى جاية، اشكرك وفى انتظار إننا نتقابل داخل الكتب.

      رد
  3. شكرا يا اوس على المقاله دى
    يا ريت نتواصل تلفونيا عشان محتاج مساعده منك . انت اللى قولت (ولو لاقيت الدنيا ضلمة كملني ونوصل مع بعض لنتيجة حلوة.)
    اتواصل معاك ازاى ؟

    رد
  4. المعلومات الكتييييرة اوي دي اكيد مبذول فيها مجهود كبير وحقيقي شكرا انك بتشاركنا فيها

    رد
  5. أستاذ / أسامة
    بالنيابة عن نفسى وعن كل من استفاد من المعلومات الغزيرة المنشورة على هذا الموقع .. يشرفنى أن أتوجه إليك بجزيل الشكر و عظيم التقدير .. و زادك الله علما و وفقك دائما لما فيه الخير .. و أود أن أستشيرك فى مشكلتى حيث أننى كنت أعمل صيدلانيا لمدة 15 سنة .. و الآن لدى فكرة مشروع صغير للتسويق فى مجال خدمات الرعاية الطبية و الصحية بإستخدام instant messengers مثل الواتساب أو التيليجرام .. و المشكلة هى أننى أبحث عن شريك لتنفيذ ذلك المشروع .. فما هو رأيك ؟ و هل هذا المجال قابل للتسويق فى مصر ؟

    رد
    • أهلا بيك أستاذ عمرو ^^

      أولا أشكرك جزيلا على الكلام الأكثر من الرائع ^^

      ماقدرش اجاوبك على سؤال هل المشروع قابل للتنفيذ فى مصر ولا لا من غير ما افهم المشروع هيعمل ايه، وساعتها نشوف اذا كانت الناس فعلا عايزة اللى انت هتقدمه ولا لا!

      فى الفترة الحالية صعب اشترك معك كشريك ولكن طبعا يمكن استشارتي فى اي أمر تريد ، وفى إنتظار التفاصيل الخاصة بالفكرة إذا كنت مهتم.

      رد

شارك