خلينا الأول نتفق إن لما نيجي نتكلم عن كتابة المحتوى لا شئ يعلو فوق صوت “الجودة العالية”.

 

مش مهم الكمية بقدر ما يهم الكيفية.

 

مايهمنيش تكتب 100 مقالة، يهمني تكتب 100 مقالة كويسة وعالية الجودة.

 

جوجل مبيهتمش بعدد المحتوى زي ما فيه “خبراء” كتير بيقولوا، جوجل بيهتم بجودة المحتوى.

 

الزبون/العميل مايهموش إنه يقرأ محتوى منك كل يوم، بقدر ما يهمه جودة وأهمية اللي هيقراه.

 

طب ازاى تكتب محتوى عالي الجودة يتقرا من أول سطر لحد أخر سطر؟

 

امشي على خطوات ممنهجة.

 

في كورس كتابة المحتوى انت عرفت إن فيه 13 خطوة لازم تمشي عليها، دلوقتى هاختصرها لك في 6 خطوات بس.

 

وهشارك معاك أسلوبي الخاص لكتابة محتوى يتقرا من أول سطر لحد أخر سطر من غير ما اللي بيقرا يحس بملل.

 

وهقولك على 6 طرق لكتابة محتوى يشد الانتباه ويثير الاهتمام ويولع الفضول.

 

بس قبل ما اقولك على الخطوات والطرق دى، لازم تفرق بين المحتوى اللي هتعمله بغرض البيع، والمحتوى اللي هتعمله بغرض التسويق!

 

المحتوى اللي هتعمله بغرض التسويق هيكون هدفه الاول والاخير كسب ثقة الزبون/العميل المحتمل وإثبات إن المنتج/الخدمة اللي انت بتقدمها أحسن حل ليه.

 

أما المحتوى اللي هتعمله بغرض البيع هيكون هدفه الأول والأخير هو البيع طبعا.

 

المحتوى التسويقي بتتكلم فيه عن المشاكل اللي الزبون/العميل المحتمل بيقع فيها

الزبون/العميل المحتمل – والحلول المختلفة اللي انت جربتها أو فكرت فيها أو لاقتها للمشاكل دي.

 

المحتوى البيعي بتتكلم فيه عن المنتج بتاعك، وعن اللي يقدر يعمله ويحققه للزبون، وعن الفرق بينه وبين منتجات وخدمات المنافسين أو الحلول التانية الموجودة في السوق.

 

انا هنا مش هتكلم عن المحتوى البيعي، في الايام اللي جاية هيجي لك محتوى تفصيلي عن ازاى تعمل ده (بس الأول لازم تأخد أساسيات كتابة المحتوى البيعي، اللينك اهو.)

 

انا هنا هتكلم عن المحتوى التسويقي، يعنى محتوى يخلي الناس تثق فى المنتجات/الخدمات من غير ما تشوفها أو تجربها، محتوى يبني لك الاساسات اللي تساعدك تبيع بعد كده بسهولة.

 

اتفقنا؟

 

6 خطوات لكتابة محتوى يتقرأ من أول سطر لحد أخر سطر

 

1- حدد الزبون/العميل المستهدف + حدد من 1 لـ 5 مشاكل بيعاني منها.

 

ازاى؟

 

هقولك دلوقتي على المعادلة اللي بستخدمها عشان احدد الزبون/العميل المستهدف:

 

اسم الفئة + 1 لـ 3 محددات + السبب الرئيسي اللي هيخليهم يشتروا المنتج أو اللي المنتج ممكن يساعدهم فيه.

 

مثال عملي من بيزنس بيقدم كورسات في صناعة وتزيين الكيك:

 

ربات المنزل اللي عندهم طفل واحد بس وعايزين يبنوا كيان ناجح على الانترنت من البيت.

 

مثال تاني من بيزنس استثمار عقاري:

 

أصحاب المصانع والشركات اللي دخلهم الشهري أكبر من 50 ألف جنيه وعايزين يضاعفوا فلوسهم خلال 5 سنين.

 

فهمت؟

 

امسك الفئة المستهدفة وشوف ايه المشاكل أو العوائق أو المعلومات اللي لازم يعرفوها عشان يوصلوا للى هما عايزينه.

 

مثلا ربات المنزل ممكن يكون عندها مشكلة في إزاى تبدأ؟ ازاى تسوق؟ ازاى تشتري المواد الخام بأسعار كويسة؟ ايه الادوات اللي نحتاجها في الاول؟ الخ.

 

مثلا أصحاب المصانع ممكن يكون عندهم مشكلة في ازاى يختار العقار اللي يستثمر فيه؟ وامتي يفكر في البيع أو وامتي يستنى شوية؟ الخ.

 

فهمت؟

 

الموضوع ده مش هياخد منك أكتر من ساعتين، ومش هتضطر تعمله في كل قطعة محتوى، بتعمله مرة واحدة كل أول شهر.

 

يعني أول يوم في الشهر بتجيب أفكار المحتوى بتاعت الشهر كله.

 

2- اعمل Research + اكتب الـ Outline وحدد الـ Content Structure

 

فلنفترض انك عايز تكتب عن طرق الاستثمار في العقارات، تعمل ايه؟

 

1- اكتب كل اللي انت تعرفه عن الموضوع في صورة عناوين رئيسية.

 

2- امسك كل عنوان كتبته، واعمل عليه بحث في جوجل (بالعربي وبالانجليزي)، وادخل لحد على الاقل الصفحة رقم #5.

 

3- المحتوى اللي تحسه مفيد وفى صميم الموضوع اللي انت هتكتب فيه، اقراه بالتفصيل وخد منه العناوين الرئيسية والأفكار والمعلومات المفيدة واللى تحسها مظبوطة.

 

4- نظم الافكار والعناوين اللي جبتها بشكل منطقي متتابع، وده تعمله ازاى؟

 

ادخل على ويكيبيديا بالانجليزي وهات الموضوع اللي هتعمل عنه محتوى وشوف الفهرس الموجود …

كتابة المحتوى

من الفهرس تقدر تجيب أفكار محتوى تانية، تقدر تكتب قطعة محتوى كبيرة فيها كل التفاصيل تخلي الجمهور يتعامل معاك على انك المصدر الأول للمعلومات في مجالك (يعني Authority يعني يسمعوا كلامك وتؤثر في قرارهم الشرائي).

 

طب يا أسامة أنا مش لاقي الموضوع اللي هعمل عليه المحتوى في ويكيبيديا؟

 

الأول دور بالانجليزي عليه كويس اوى، ولو مش لاقيه، ادخل على أي موقع من مواقع الكورسات الاونلاين زي كورسيرا ويودمي وهتلاقي قطعا كورس بيتكلم عن موضوع المحتوى بتاعك، خد الفهرس بتاعه كـ Outline أو Structure للمحتوى بتاعك.

 

3- اكتب عنوان المحتوى ومقدمة المحتوى

 

كتابة عنوان المحتوى من أهم العناصر اللي ماينفعش أي قطعة محتوى تخلو منها.

 

طب ازاى تكتب عنوان جامد ويشد القارئ في وقت قليل؟

 

قولي في العنوان انا هستفيد ايه؟ وليه لازم اهتم واقرأ دلوقتي؟

 

وبعدين اكتب المقدمة اللي هي عبارة عن فقرة واحدة، والفقرة دي 3 سطور أو 4 بالكتير، وبيكون فيها شرح وتقديم المشكلة اللي انت هتعالجها مع تقديم وعد بالحل أثناء المحتوى.

 

4- اكتب المحتوى نفسه + خدلك راحة على الاقل يوم

 

قواعد عامة:

 

قسم المحتوى لفقرات، كل فقرة عبارة عن 3 سطور، بين كل فقرة وفقرة لازم يكون فيه مسافة بيضا، يعني تدوس على المسطرة مرتين مش مرة واحدة وماتشغلش بالك بمسألة المحتوى هيكون طويل ولا قصير.

 

لكل فقرة يُفضل يكون فيه عنوان فرعي ومكتوب في سطر لوحده، وبرضو فيه مسافة بين وبين الفقرة نفسه، مسافة تدوس مرتين على المسطرة مش مرة واحدة.

 

المحتوى طويل أو قصير مش مهم، المهم إنك تشرح كل المعلومات اللي الزبون/العميل المحتمل لازم يعرفها عن المشكلة وعن الحل اللي انت بتقدمه.

 

بعد ما تكتب المحتوى لازم تقفله، وماتبصش عليه غير تاني يوم، وده عشان تقدر تكتشف الاخطاء اللي فيه.

 

5- اكتب الملخص + الـ Call to Action

 

من أكتر الأخطاء الشائعة في كتابة المحتوى هي إن معظم اللي بيكتبوا محتوى مش بيكتبوا لا الملخص ولا الـ Call to Action، واللى فيهم بيكتب واحدة بيسيب التانية، ونادرا ما تلاقي حد كتب الاتنين!

 

الملخص عبارة عن سطر أو سطرين في نهاية قطعة المحتوى بيوضحوا للقارئ خلاصة المحتوى.

 

المطلوب منك إنك تكتب السطر أو السطرين دول، بس خليهم تمهيد للـ CTA.

 

الـ Call to Action عبارة عن طلب انت بتطلبه من القارئ في آخر قطعة المحتوى، زي إنه يعمل شير، كومنت، ينزل الكتاب، يقوله راي، يجاوب على سؤال، يقرا المقال الفلاني، يعمل منشن لحد، يشتري المنتج الخ …

 

ماينفعش بأي حال من الأحوال تنساه لانك لو عملت كده، المحتوى فقد كتير من قيمته، لان انت قدمت قيمة كبيرة بشكل مجاني، فطبيعي تكون عايز حاجة، الحاجة دي في سياق المحتوى التسويقي غالبا ما هتكون إنه يقرا أكتر عشان يثق فيك أكتر ويكون جاهز للشراء وقت ما انت تقرر تبيع.

 

نفذ الخطوة دى، وبعدين ارتاح عشان تقدر تعمل Edit.

 

6- اعمل Edit ثم اتاكد إن كل حاجة مظبوطة وبعدين انشر المحتوى

 

في خطوة الـ Edit زي ما انت عارف بتتأكد إن تنسيق المحتوى سليم، مفيش اخطاء املائية، الجمل بسيطة ومؤثرة، الأفكار مترابطة الخ.

 

بعد ما بتتاكد إن كله مظبوط، تنشر المحتوى في القناة اللي هينزل فيها.

 

وبس كده.

 

دى Checklist سريعة لكتابة محتوى يتقرا من أول سطر لحد اخر سطر عشان لو نسيت تنفذ أي خطوة.

 

طبق وكرر الخطوات دي في كل مرة تكتب فيها محتوى، ودوام عليها واوعدك إن مع الوقت بدل ما كنت بتاخد 10 ساعات في كتابة قطعة محتوى، ممكن تاخد ساعة أو ساعتين بس.

 

انت وشطارتك.

 

ملحوظة: انا بقدملك معلومات متعوب فيها ومتجربة وصعب تلاقيها حتى في كورسات مدفوعة في السوق، مش عشان الا انك تجربها وتطبق وتنجح بيها، فأرجو انك تطبق ولو قابلتك مشاكل، ابعت لى وانا هرد عليك.

 

أسلوبي الخاص لكتابة محتوى يتقرا من أول سطر لحد أخر سطر

 

ايه هدف كل سطر في المحتوى؟

 

هدف كل سطر في المحتوى إنه يخلي الناس تكمل السطر اللي بعده، وده تعمله ازاى؟

 

اعتمد على الأسلوب التقدمي/التسلسلي في كتابة المحتوى.

 

يعني ايه؟

 

يعني اشرح السبب وقول النتيجة، أو قول النتيجة وفسر السبب.

 

ممكن مثال؟

 

اتفضل …

كتابة المحتوى التسويقي

خدت بالك من اللي حصل!

 

أولا قولت حاجة تشد الانتباه، وتثير الاهتمام عند الجمهور، وخليت عنده فضول، وفى الاخر قولت له على الحاجة اللي هو بيدور عليها.

 

كل ده حصل في سطرين.

 

وبعد ما عملت كده كررت اللي عملته تاني عشان يفضل مكمل قراءة، بس المرة دى سالت سؤال بحيث اثير فضول اللي بيقرا.

 

فهمت؟

 

طب ازاى تطبق الكلام ده بشكل عملي؟

 

فيه 3 صفات لو تحققوا في المحتوى بتاعك، هيخلي أي حد يكمله من أول سطر لحد أخر سطر، وكمان يثق في المنتج/الخدمة ويشتري.

 

الصفات دي هي:

 

1- يشد الانتباه

2- يثير الاهتمام

3- يولع الفضول

6 طرق لكتابة محتوى يشد الانتباه ويثير الاهتمام ويولع الفضول

 

1- قدم معلومات جديدة أول مرة يسمعوها، أو قدم لهم المعلومات في شكل جديد أول مرة يشوفه.

 

2- قدم أرقام أو احصائية ملفتة للنظر أو غير متوقعة.

 

3- ابدأ المحتوى بكلمة “تخيل لو”، واشرح اللي هيحصل لو اللي نفذ اللي انت هتقوله أو اشتري المنتج/الخدمة بتاعتك.

4- اسأل سؤال في البداية وجاوب عليه في المحتوى.

 

5- احكي قصة.

 

6- قدم وعود باللى الجمهور هيحصل عليها لو قرأ المحتوى لحد الاخر.

 

لحظة من فضلك:

 

كل الطرق دى هتخليك تستحوذ على انتباه الجمهور وتخليه وهو راضي ومبسوط وعايز يكمل المحتوى لحد الاخر، ولكن لو كمل للاخر والوعود والتوقعات كانت مخيبة للآمال يبقى انت عملت تسويق بالسلب.

 

طب تعمل ايه في الموقف ده؟

 

اللي تقول عليه تعمله، ماتوعدش بحاجة مش هتحققها.

 

حاجة كمان، من الضروري جدا إن المحتوى يكون سهل فى فهمه واستيعابه، لان لو المحتوى كان صعب ومش بسيط محدش هيكمله للاخر حتى لو فيه كنز.

 

فهمت؟

 

انك تعمل محتوى عالي الجودة يخلي الناس تقراه لحد الاخر ضمان ليك بنسبة تتعدي الـ 75% إن الناس تعمل شير أو تتفاعل أو تشتري أو تسيب رقمها أو تدخل على اللينك أو ايا كان الـ Call to Action اللي انت عامله …

 

طب ازاى تكتب محتوى من اوله لاخره بيبع منتج أو خدمة من غير ما اللي بيقرا يحس إنك عايز تبيع له أي حاجة؟

 

ده اللي هنشرحه في الأيام اللي جاية.

 

لا انا لسه ماخلصتش!

 

ركز معايا …

 

تخيل معايا انك عرفت ازاى تكتب محتوى يجيب للبيزنس ترافيك بدون اعلانات ولا إنتاج محتوى جديد كل شوية، و Leads فعلا مهتمين يشتروا، و Customers أو Clients جدد بصورة مستمرة.

 

لو مهتم ونفسك تتعلم تعمل الحاجات دي كلها خطوة بخطوة وبطرق مجربة.

 

دوس هنا 

 

 

 

التصنيفات: Content Marketing

اسال او استفسر او قول رايك بكل راحة

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.