fbpx

لو جربت تكتب مقالة بسيطة لمنصات التواصل الإجتماعي (اللى حجمها بيكون ما بين 300 لـ 500 كلمة) بيكون التحكم في حجمها صعب وبتحاول تطلعها بشكل متكامل ومتسق مع بعضه .. ومش ناقصة اي حاجة!

 

أما المحتوى على الويب سايت والبلوج بيكون طويل نوعا ما، فى منه بيوصل لـ 3000 كلمة و أكتر بكتير كمان.

 

فالتحدى مع محتوى الويب سايت بيكون اصعب فى اننا نقدر نتحكم فيه ونطلعه بشكل متكامل ويكون متسق مع بعضه …

 

بداية من أول الفكرة اللى بتناقش موضوع معين، و إزاى نتكلم عنه اكتر من غير ما نكون بنملى فراغات وخلاص، لحد ما نوصل لنهاية قطعة المحتوى، ونختمها بشكل مميز.

 

النهاردة عُمر الكركيت هيقولنا إزاى نقدر نكتب محتوى طويل يوصل لـ 1000 كلمة و أكتر بشكل عملى.

 

إبدأ بكتابة أول بلوج بوست:

 

بما إنك لسه تقريبا أول مرة تجرب تكتب بلوج بوست، لازم تعرف إن لما تيجي تعمل حاجة جديدة بتقابل مُشكلتين:

 

!أول مشكلة هى المماطلة، و تانى مشكلة هى مشاكل الحاجة نفسها

 

عشان توقف مماطلة وانت رايح تكتب محتوى مش اقل من 1000 كلمة على الويب سايت، خُد القرار و اتحرك بغض النظر عن النتيجة، يعني ابدا اكتب وملكش دعوة باي حاجة ولا اي حد.

 

عشان تتحرك بغض النظر عن النتيجة اللى هتطلع بتحتاج تفكر بالمنطق و المنطق بيكون 1 + 1 = 2!

 

و بعد ما تتحرك قرر انك متتسرعش ابدا عشان تخلص المحتوى (لازم تاخد وقتك)

 

لانك هتبدأ مع حاجة طبيعتها طويلة ومحتاجة نفس طويل …

 

التسرُع بيكون بسبب مشاعر الخوف ودى مشاعر سلبية هتخلى النتيجة سلبية، لان طريقة التفكير بتأثر على المشاعر والمشاعر هى المسؤولة عن السلوك.

 

فلو المشاعر سلبية بسبب مشكلة او عطلة وانت بتعمل محتوى السلوك هيكون سلبى.

 

ساعتها لازم تغير طريقة التفكير بحيث انك تقدر تكمل وتطلع المحتوى بشكل جميل.

 

أنواع محتوى الويب سايت:

 

المحتوى الطويل مش بس مقالات … هتلاقى منه انواع تانية مختلفة.

 

قبل ما تحدد فكرة الموضوع اللى هتكتب عنه، اتعرف الأول على الأنواع المختلفة للمحتوى (الطويل) و اللى مكانها الاساسى بيكون فى الويب سايت.

 

أنواع محتوى الويب سايت (المادية):

 

1- المقالات:- فى نوعين من مقالات الويب سايت ..

 

أول نوع مقالة بتكون معمولة عشان تستهدف بيها الجمهور المستهدف عن طريق وسائل التواصل الإجتماعي او الـ Email Marketing مش محركات البحث.

 

النوع التانى من المقالات بيكون معمول عشان تستهدف بيه Keywords مُعينة بإستخدام الـ SEO فبالتالى هتوصل للـ الجمهور المستهدف او اليوزر عن طريق الـ محركات البحث.

 

2- الـ Guides:-

 

الـ Guides تعتبر من أهم انوع المحتوى اللى بتكون على الويب سايت و طولها بيكون اكتر بـ 5 مرات على الاقل من المقالة العادية و عشان تعملها بتحتاج تختار موضوع عام تحتيه من 5 لـ 7 مواضيع فرعية.

 

3- الـ Case Studies:-

 

لو البيزنس اللى انت شغال عليه عنده حلول لمشاكل عدى منها،  تقدر تعمل محتوى على الويب سايت يورى الناس المشاكل اللى كانت موجودة و ازاى البيزنس قدر يحلها بطريقة معينة، والناس تقدر تستخدم الطريقة عشان تواجه نفس المشكلة

 

4- الـ Infographics:-

 

الانفوجرافيك من اكتر انواع المحتوى اللى بيحب يستهلكها الناس على الويب سايت وميزتها انها تنفع تبقى طويلة وفيها معلومات و فوايد اكتر بشكل ممتع بصرياً.

 

أنواع محتوى الويب سايت (الفكرية):

 

الأنواع الفكرية للمُحتوى تنفع تتطبق مع اى شكل نهائى للمحتوى سواء كان فيديو او مقالة (كبيرة او صغيرة) لانها طريقة او فكر ورا عمل المحتوى مش الشكل المادى اللى هيكون عليه ..

 

انواع محتوى الويب سايت الفكرية زى :-

 

1- الـ How to: من خلال محتوى الـ How to بتقدر تعلم القارئ إزاى يعمل او يتعلم حاجة معينة بإستخدام طريقة ما

 

2- الـ Point of view: محتوى بيتعمل عشان يبقى وجهة نظر بيتبناها البراند و لازم تضيف value للـ audience اللى بيتابعك

 

فى انواع تانية كتير للمحتوى و عشان تفرق إذا كان النوع ده فكرى ولا شكل مادى هيكون عليه

 

تقدر بعد ما تدور بكلمة “types of content” و تشوف الانواع دى تفكر مع كُل نوع لوحده إذا كان فكرى ولا مادى

 

لو كان هيبقى شكل نهائى للمحتوى هيبقى نوع مادى ولو طريقة هيتبنى عليها المحتوى بتاعك يبقى نوع فكرى.

 

على سبيل المثال: فكر لو كان نوع المحتوى “Interview” يا ترى هيبقى مادى ولا فكرى ؟

 

إزاى توصل لفكرة المحتوى ؟

 

لو المحتوى اللى هتعمله على الويب سايت هيكون عشان تشيره للـ audience بتاعك على الـ sm أو عن طريق الـ email ساعتها إنك تطلع الفكرة هيكون أسهل بكتير

 

كُل اللى هتعمله إنك تشوف مٌشكلة المُنتج بتاعك هيحلها أو مُشكلة ليها علاقة بالمنتج ومش شرط يكون الحل فى المنتج نفسه بس انت هتوفر الحل ده بالمحتوى بتاعك

 

و لو المحتوى هتعمله على الويب سايت للـ SEO ساعتها الـ keywords هى اللى هتكون الدليل فى انك تطلع فكرة جديدة للمحتوى

 

و عشان تقدر تشوف الـ keywords لأى مجال او نيتش هتشتغل عليه بتحتاج تستعمل feature من جوجل إسمها “Google Suggestions”

 

اول ما تكتب اى keyword هيبدأ يطلع ليك اقتراحات لـ keywords تانية بيدور بيها اليوزر او الـ persona اللى ليها علاقة بالبراند بتاعك فى جوجل

 

 

نفس الاقتراحات لو نزلت تحت هتلاقيها موجودة و كُل ما تختار كلمة هتلاقى ليها اقتراحات تانية ..

 

تبدأ إزاى بعد الفكرة ؟

 

بعد ما تختار و تقرر الفكرة المناسبة إعمل research عميق و خُد وقتك لو موضوع جديد عليك لحد ما تتمكن من الموضوع اللى هتتكلم عنه

 

بعد ما تدرس وتتعمق مع حاجة مُعينة هتقدر تتكلم عنها بكُل سهولة ..

 

الـ research هيخلى عندك خزين من الأفكار تقدر تستعملها و إنت شغال على المحتوى بتاعك

 

و لو مُتأكد إنك فهمت فكرة معينة او جُزء معين وهترجعلها و إنت بتكتب المحتوى بتاعك ساعتها كُل اللى هتعمله إنك تحتفظ باللينك اللى عملك inspiration بالفكرة.

 

حُط فى بالك حاجتين و إنت بتكتب:

 

أول حاجة: – راعى ان المحتوى بتاعك يوصل رسالة مُعينة تخدم البراند بإستخدام الحلول اللى طلعتها فى الـ research

 

عنى بلاش تكتب كلام تناقش بيه حلول فى نُقط وبس ضيف عليه لمستك من غير ما تغير فى حقائق عشان توصل message معينة ..

 

تانى حاجة: – خلى المحتوى بتاعك إيجابى وبيناقش حلول تكون طلعتها بالـ research بتاعك وده هيسيب انطباع ايجابى عند الـ persona اللى بتستهدفها

 

حدد “Structure” مناسب للمحتوى:

 

فى أكتر من structure تقدر تعمله على حسب نوع المحتوى فلو هتعمل article بيكون غير الـ list article غير الـ guide

 

مثلا: الـ guide بيكون موضوع عام وتحتيه من 5 لـ 7 مواضيع اكنه مقالة كبيرة ضمت تحتها 7 مقالات تانيين وكل مقالة ليها عنوان تانى خاص بيها تحت سقف العنوان الاساسى للـ guide

 

متبدأش بإنك تعمل حاجة كبيرة اوى زى الـ guide فى الاول مُمكن تبدأ بمقالة صغيرة و بتكون حوالى الف كلمة

 

فى الاول الألف كلمة هيبقوا صعبين إنك تعملهم لكن بعد مدة والتمرين هتبقى حاجة سلسة وسهلة بالنسبالك

 

الـ structure الاساسى:

 

1- الـ Intro: المقدمة اللى هتعملها ممكن تورينى عن طريقها انا هستفيد إيه كـ قارئ بعد ما استهلك المحتوى بتاعك

 

2- الـ Headings: بيكون فى عناوين جانبية مع كُل فقرة هتتكلم جواها عن حاجة معينة غير العنوان الأساسي للمحتوى

 

3- الـ Body: بعد المقدمة وتحت كُل heading بيكون فى موضوع صغير بتكلمنى فيه بالتفصيل عن حاجة معينة و ده اكتر جُزء بتكتب فيه وبتضيف value للقارئ

 

4- الـ conclusion: بعد ما خلصت المقالة بتاعتك هتنهيها إزاى ؟ هل هتخلى فيه Call to action عشان تقولى تخلينى قرار معين ؟ ولا هتقفلها بمُلخص للموضوع اللى اتكلمت عنه ؟

 

ده كدة الـ structure الأساسى اللى تقدر تبدأ بيه ..

 

ملحوظة إضافية: متتشتتش :D متتشتتش وانت بتعمل research او بتكتب المحتوى بتاعك

 

تعمل إيه لو عطلت فجأة ؟

 

وإنت شغال على اى حاجة جديدة فى الاول تقابل مشاكل تعطلك عن انك تنجز الحاجة دى او تخلص جزء معين منها

 

الحل مع اى عطلة إنك تفصل لمدة دقيقة او دقيقتين و تعوض الانجاز بحاجة تانية بسيطة وبعدها إرجع من تانى بس فكر بشكل مختلف و حدد سبب العطلة فين ؟

 

هل مثلا نقص فى المعلومات فـ محتاج تدور اكتر ولا محتاج ترتب المقال بشكل معين عشان تتعمق فيه اكتر ؟

 

اول ما بتحدد سبب المشكلة الحل بيطلع على طول بشكل تلقائى

 

إزاى تتمرن على كتابة محتوى طويل ؟

 

و إنت بتتمرن عشان تكتب محتوى “طويل” بلاش تحاول توصل فجأة للنهاية لانك هتبقى مفتقد الانجاز وعايز تعوضه بطريقة تضرك اكتر ما تفيدك

 

كُل ما تاخد وقتك وتكتب على مهلك كُل ما يكون احسن ..

 

و دايما عوض الانجاز باى حاجة بسيطة و بعدين ارجع فكر من تانى بطريقة مختلفة و ايجابية

 

فكر فى ايه هو سبب العطلة وطلع الحل المناسب ليه

 

وصلنا للنهاية:

 

لو قررت تبدأ تتمرن على كتابة محتوى طويل ومحتاج مساعدة او recommendations وانت شغال تقدر تسيب comment او تبعتلى و هتابع معاك لحد ما تقدر تكتب محتوى يوصل لـ 1000 كلمة و أكتر بسهولة <3

 

التصنيفات: Content Marketing

0 تعليق

اسال او استفسر او قول رايك ...

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.