fbpx

 

الإنترنت غيّر التسويق وكل حاجة.

 

زمان، كان المطلوب منك كمسوق إنك تروح للزبون لحد عنده.

 

إنما دلوقتي، بقي مطلوب منك تكون متواجد في المكان اللي الزبون بيحب يدور فيه، وقت ما الزبون يحب يدور على الحلول اللي شركتك بتقدمها.

 

يعني الزبون هو اللي بيدور عليك مش انت اللي بتروح ليه.

 

في السبعينات ولحد مطلع الألفية الجديدة، كان التسويق كفكر، إنك تروح في أكتر مكان الناس موجودة فيها وتقولهم رسالتك التسويقية!

 

إنما مع ظهور الإنترنت بشكل قوي و ظهور شركات زي جوجل ومن قبلها ياهو، اتحول التسويق لـ إنك تقف في مكان – ملكك – بشكل ظاهر ومحسوس والناس تيجي لحد عندك.

 

التسويق كان عامل ازاي قبل الإنترنت؟

 

قبل الإنترنت كان فيه التلفزيون، وساعتها الشركات كانت بتعمل إعلانات في أكتر قناة الناس بتتفرج عليها!

 

وكان فيه اللوحات الإعلانية (Billboards) وساعتها كانت الشركات بتروح لوكيل إعلامي يشتري لها مساحة في حتة مشهورة كل الناس بتعدى عليها إلخ.

 

كمان الزبائن أو العملاء أو المستهلكين في الوقت ده ماكانش قدامهم إختيارات كتيرة، لأن أصلا الشركات كانت قليلة، وكمان قنوات التلفيزيون أو بتعبير أكثر دقة قنوات الإعلان كانت قليلة.

 

انما دلوقتي ايه الوضع …

 

التسويق بقى عامل ازاى بعد الانترنت؟

 

دلوقتي الشركات اللي بتقدم نفس الحل كتيرة جدا!

 

يعني مثلا فيه كام شركة سياحة في السوق؟

 

فيه كام مستثمر ومطور عقاري؟

 

فيه كام مطعم؟

 

فيه كام محل ملابس؟

 

فيه كام شركة بتقدم خدمات تسويق وإدارة؟

 

كام شركة بتقدم خدمات تدريبية وتطويرية؟

 

كتير، صح؟

 

مع كثرة الاختيارات، الزبون بقى ياخد وقت أطول في قرار الشراء، نتيجة إنه بقي يفكر أكتر ويحسبها أكتر وأكتر!

 

أصل الزبون خايف أحسن يكون أختار الحل الغلط، خايف من المخاطرة.

 

وكثرة الحلول المتشابهة اللى بتقدمها الشركات خلت عملية إتخاذ قرار الشراء تكون أطول، وده خلي الناس تفكر اكتر.

 

ونتيجة للموضوع ده، الناس اتجهت للتعامل مع الشركات اللي بتساعدها بجد و بقت تدي للشركات دي الثقة.

 

سامع واحد بيقولي ما هو زمان كان مطلوب ثقة برضو!

 

اقولك ايوة عندك حق، جدع يا بيه!

 

بس زمان كان فيه شركتين أو تلاتة بيقدموا نفس الحل.

 

يعني الموضوع كان سهل أوى على المسوقين.

 

لكن دلوقتي بقي فيه 100 و 200 شركة بتقدم نفس الحل بطرق مختلفة، وكلهم بيتنافسوا على نفس الزبون.

 

وده صعب المهمة على الزبون وأكيد على المسوق كمان.

 

الثقة تعتبر Money-Making Machine في عالم التسويق عبر الإنترنت.

 

بناء على كل ده، المفروض أي شخص عنده منتج/خدمة وعايز يعمل لها تسويق ويبيعها على الانترنت، يعمل خطوتين لا غني عنهم، وهما:

 

1- بناء موقع إلكتروني قوي

2- إنتاج محتوى تسويقي قوى

 

يلا بينا ندخل في التفاصيل …

 

1- بناء موقع إلكتروني قوي

 

أولا انت مش محتاج تبقى مبرمج جامد، ولا مبرمج اصلا، عشان تعمل ويب سايت للمنتج/الخدمة اللي بتقدمها، ولا محتاج شوال فلوس عشان تعمل ويب سايت جامد الناس تتحاكي عليه!

 

بشوية أدوات بسيطة، وفلوس قليلة تقدر تعمل ويب سايت فعلا جامد زي ما هتشوف دلوقتي.

 

4 خطوات بسيطة لإمتلاك موقع إلكتروني على الإنترنت كحجر أساس لمشروعك …

 

1- اسم الموقع/الدومين (Domain Name)

2- الاستضافة (Web Hosting)

3- نظام إدارة المحتوى

4- التصميم

 

يلا بينا ندخل في التفاصيل …

 

1- اسم الموقع/الدومين (Domain Name)

 

أول حاجة انت محتاجها عشان تنشئ ويب سايت هو تحديد واختيار اسم للموقع، والتأكد من إتاحته للبيع، ومن ثم شراءه.

 

عنوان الموقع أو الدومين هو العنوان اللي أي حد يقدر يزور موقعك من خلاله، زي عنوان بيتك كده بالظبط.

 

ازاى تختار اسم موقعك؟

 

  • اسم وصفي، يعني لو هتعمل موقع هيشرح التسويق الإلكتروني لأصحاب الشركات، يبقي اسمه onlinemarketingforbusinessowner.com.

 

  • اسم لـ اختصار، يعني مثلا لو هتعمل موقع بيتكلم عن ازاى بنات الجامعة المفروض يلبسوا، How university girls wear، يبقي ممكن يكون اسم الموقع hugw.com، فهمت الفكرة؟

 

  • اسم صاحب المشروع، يعني تخلي اسم الموقع بتاعك اسمك الشخصي، زي مثلا osamasalah.com.

 

  • مبني على مكان، يعني مثلا لو انت هتعمل موقع للسيدات في مصر، ممكن يكون اسمه womenofegypt.com.

 

  • كلمات بلغات أجنبية تانية، يعني تجيب الكلمة الرئيسية اللي بتعبر عن اللي هتقدمه، وتشوف معناها في لغات تانية، مثلا لو هتعمل موقع تبيع فيه جزم، كلمة أحذية بالاسباني يعني zapatos، اللي جاي منها اسم الموقع العالمي لبيع الاحذية Zappos، فهمت الفكرة؟

 

  • مبني على اسم حيوان، من أشهر الأسماء اللي تقع في التصنيف ده هو موقع HostGator، كلمة Host بتعبر عن اللي الشركة بتبيعها وهو الاستضافة، إنما كلمة Gator يعني تمساح.

 

  • معتمد على التراث، يعني مثلا Vezeeta، أو اسبتاليه، فهمت الفكرة؟

 

طيب دلوقتي إنك جبت اسم، تعمل ايه دلوقتي؟

 

تتاكد إنه متاح على الانترنت.

 

ازاى؟

 

ادخل موقع who.is، اكتب في مربع البحث اسم الدومين اللي انت اخترته …

 

 

وبعدين دوس بحث …

 

 

لاقيته متاح اهو، عظيم.

 

لو ملقتهوش متاح، إما تشوف اسم غيره، إما تختاره بس مش .com، ممكن .net أو .org أو أي حاجة تانية.

 

لو غيرت الاسم، ادخل تاني اتاكد إنه موجود، اعمل كده لحد ما تلاقي الاسم اللي انت اخترته موجود.

 

طب اللي الخطوة اللي بعد كده؟

 

اشتريه أو احجزه بتعبير أدق.

 

ازاى؟

 

ادخل على موقع godaddy.com، واكتب اسم الدومين بتاعك في مربع البحث …

 

 

بعدين دوس على كلمة Search …

 

 

الدومين بـ 54 ونص تقريبا للسنة الأولى.

 

كل سنة أو حسب مدة التعاقد بيتم تجديد الدومين، زي إيجار كده بس سنوي.

 

في البداية احجزه لمدة سنة واحدة وادفع الـ 54 ونص، وبعدين خلال السنة دي هتكسب من الموقع وتقدر تحجز لمدة 5 سنين وتدفع مرة واحدة.

 

بمجرد ما بقي عندك دومين، انت خلاص بنسبة 50% ليك موقع.

 

طب ناقص ايه؟

 

2- الاستضافة (Web Hosting)

 

الاستضافة هي الشئ اللي هيربط اسم موقعك بالانترنت.

 

بدون استضافة، مستحيل يكون للموقع بتاعك وجود على الانترنت.

 

طب ازاى احصل على استضافة مجانا؟

 

انت فعلا تقدر تحصل على استضافة مجانا ولكن للاسف اسم موقعك مش هيكون اسمك الموقع.كوم على طول، إنما هيكون اسم موقعك.اسم الموقع اللي هتاخد منه الاستضافة.كوم!

 

وطبعا دى حاجة وحشة جدا على جميع المستويات، ولا أحبذها على الإطلاق.

 

طب ازاى تحصل على استضافة بسعر معقول؟

 

ادخل على موقع bluehost.com، دوس على كلمة Get Started Now، وكمل وفقا للتعليمات …

 

 

بـ 3.95$ في الشهر، يعني في السنة بـ 47.4$.

 

تقريبا بالمصرى 70 جنيه كل شهر، وفى السنة 845 جنيه تقريبا.

 

دى اسعار قليلة على فكرة، هو في إيجار بـ 70 جنيه في الشهر دلوقتي؟!

 

المهم لحد دلوقتي إحنا صرفنا 55 لحجز الدومين لمدة سنة، و 845 للاستضافة لمدة نفس السنة، يعني كله 900 جنيه لمدة سنة، ولو مش معاك المبلغ كله، ممكن تدفع 125 جنيه لأول شهر، وكل شهر تتصرف في 70 جنيه، صعبة؟!

 

طيب كده عندك دومين، واستضافة، وكده الموقع بتاعك بقي كائن حي على الانترنت.

 

بس كده خلاص يعني؟

 

لا لسه في خطوتين …

 

3- نظام إدارة المحتوى (مجانا)

 

اختيار نظام ادارة المحتوى (Content Management System) هو أبسط وأهم خطوة في بناء ويب سايت.

 

نظام إدارة المحتوى عبارة عن منصة أو سوفت وير يسمحلك بكتابة وتعديل ونشر المحتوى بتاعك على الويب سايت.

 

والمنصات دى كتيرة، و الافضل و الابسط والاسهل بالنسبة لك هو ووردبريس.

 

كل المطلوب منك إنك تدخل على الـ Control Panel اللي هي لوحة التحكم على موقع bluehost.com.

 

أول ما تدخل هتلاقي ايقونة ووردبريس ومكتوب Install WordPress، دوس عليها، وفى أقل من دقيقة الويب سايت بتاعك هيكون قائم ويقدر أي حد يشوفه، وانت تقدر تنشر أي محتوى انت عايزه.

 

الف مليون مبروك، الويب سايت بتاعك جاهز، بس عندي خبر وحش!

 

الويب سايت شكله وحش.

 

طيب هو كده مينفعش اشتغل عليه يعني؟

 

اكيد لا، الويب سايت بتاعك حلو دلوقتي وتقدر تشتغل عليه، ولكن التصميم وشكل المحتوى مش أحسن حاجة في الدنيا.

 

طب ايه العمل؟

 

4- التصميم

 

تصميم الموقع من اهم الخطوات اللي لازم تعملها لبناء ويب سايت يكون مركز المشروع أو البيزنس بتاعك.

 

قدامك 3 طرق مفيش غيرهم لتصميم الموقع:

 

1- تصميم الموقع من البداية بواسطة مصمم محترف

2- شراء وتعديل ثيم مدفوع

3- شراء وتعديل ثيم مجاني

 

أول وتاني طريقة بفلوس، فنركنهم دلوقتي على جنب، ونعتمد على الطريقة رقم #3 لحد ما الموقع أو البيزنس يكسب فلوس تخلينا نعتمد على اي اوبشن منهم.

 

يلا بينا …

 

الثيم عبارة عن تصميم جاهز معد مسبقا، وجاهز للتركيب على موقعك.

 

كل المطلوب منك تدخل على الووردبريس، ثم مظهر، ثم قوالب …

 

 

 

ثم أضف جديد …

 

 

 

اختار الشكل اللي تحسه مناسب، ويفي بالغرض بالنسبة لك.

 

طب يا عم أسامة أنا محتاج كام صفحة في الويب سايت؟

 

رأيي الشخصي إن أي ويب سايت لازم يكون فيه 5 صفحات أساسية:

 

1- الصفحة الرئيسية

2- المدونة

3- صفحة للمنتجات

4- صفحة للمنتجات المجانية (Lead Generation Content)

5- صفحة عن (About)

 

اختار أي ثيم يعجبك، وهتلاقي فيه الصفحات دي، لو مش موجودة، اعملها، الموضوع أبسط مما تتخيل.

 

امشي ورا التعليمات بس.

 

طب لو انت ملكش في الكلام ده، شوف واحد صحبك شغال WordPress، هيعملها في أقل من نص ساعة، ولو ملكش صحاب، مفيش مشكلة.

 

بأسعار تبدأ من 5$ (90 جنيه تقريبا)، تقدر تجيب حد يعملك الحوار ده كله من موقع خمسات.

 

وبكده يكون الويب سايت بتاعك بقي جاهز.

 

ناقص ايه؟

 

2- إنتاج محتوى تسويقي قوى

 

التسويق بالمحتوى في ابسط اشكاله عبارة عن إنتاج ونشر قطع محتوى مفيدة وعالية الجودة لجذب انتباه الجمهور المستهدف، وكسب ثقته.

 

كل قطعة محتوى بيتم نشرها على موقعك بتكون بمثابة أصل تسويقي (Marketing Asset).

 

يعني حاجة تقدر تعتمد عليها في التسويق كل يوم، ودى حاجة عظيمة جدا لو جيت قارنت ده بأسلوب الإعلانات!

 

في الاعلانات انت مضطر تلتزم بمعايير معينة عشان صاحب المكان يسمح لك بنشر اعلانك عنده، ومضطر تدفع تمن كل دقيقة، ولو حبيت تزود هتدفع!

 

إنما لو عندك قطعة محتوى على موقعك، أولا انت من حقك تقول فيها اللي انت عايزه، وثانيا تقدر تعيد نشرها كل شوية، وتتحكم في اللي يدخل يقراها.

 

باختصار المحتوى بيديك القدرة على التحكم في المشروع أو البيزنس بتاعك، إنما الاعلانات انت مش متحكم في أي حاجة، لا مين هيشوف الاعلان ولا مين مش هيشوف الاعلان وهتدفع قصاد كل واحد هيشوف أو هيتفاعل مع الاعلان بتاعك حتى لو هو مش مستهدف.

 

الفيسبوك عمال يقلل في نسب الوصول وبقي مستحيل – زى ما ناس كتير بتقول – توصل لأهدافك من غير اعلانات مدفوعة!

 

وهنا السؤال يطرح نفسه: ليه تعتمد على قناة غير مملوكة ليك وتبقى تحت رحمة مارك ولا غيره؟

 

طب لو انا قلت لك هعملك برنامج على قناة CBC هيتم إذاعته كل يوم الساعة 8 بالليل، وببلاش. توافق؟

 

اكيد هتوافق.

 

طب ما اليوتيوب موجود وببلاش برضو!

 

طب لو قلت لك هخلي المصرى اليوم، واليوم السابع والجمهورية والوطن ينشروا عن شركتك ومنتجاتك وخدماتك مقال كل يوم بشكل مجاني، توافق؟

 

أكيد طبعا هتوافق.

 

طب ما تعمل الويب سايت بتاعك وتنشر اللي انت عايزه في أي وقت.

 

نيجي بقي للمهم اوى …

 

ازاى تبدأ في تطبيق التسويق بالمحتوى على البيزنس بتاعك أو بمعني ادق ازاى تسوق للمنتجات أو الخدمات اللي بتقدمها بالمحتوى؟

 

يعنى ازاى تقدم محتوى تسويقي قوي؟

 

ركز معايا …

 

الخطوات اللي هقولها دلوقتى تتطبق على أي بيزنس بيقدم منتج أو خدمة عليها طلب من السوق.

 

هما 6 خطوات اساسية وبسيطة، الخطوات مش سحرية ولا حاجة، بس لازم تمشي عليها خطوة خطوة بالترتيب، ولازم تاخد وقتك جدا جدا في كل خطوة، واياك والاستسهال أو الاستعجال.

 

1- تحديد الجمهور المستهدف

2- توضيح المنتج أو الخدمة

3- اختيار القنوات التسويقية

4- الخروج بالأفكار الرئيسية للمحتوى

5- التخطيط لمحتوى كل شهر

6- هتعمل ايه على مستوى التسويق ومستوى المبيعات؟

 

يلا بينا ندخل في التفاصيل …

 

1- تحديد الجمهور المستهدف

 

لو انت البيزنس بتاعك قائم أو لسه هيقوم، لازم تكون محدد انت عايز مين يشتري المنتجات أو الخدمات اللي بتقدمها.

 

بس حط في اعتبارك، مفيش حاجة اسمها كل الناس، ومفيش حاجة اسمها اصل المنتج أو الخدمة اللي بقدمها تنفع لكل الناس.

 

على عيني وعلى راسي، بس انا عايز منك “تختار” ناس معينة عشان تشتغل عليها.

 

أنسب ناس ممكن تشتري المنتج أو الخدمة بتاعك هي الناس اللي محتاجة، وعايزة، ومستعدة تدفع تمن المنتج أو الخدمة بتاعتك.

 

يعني ايه؟

 

  • ايه المشكلة اللي المنتج بتاعك بيقوم بحلها؟ أو ايه الحاجة اللي المنتج أو الخدمة بتاعتك هتساعد الناس فيها؟

 

اجابة الاسئلة دى هتعرفك الناس محتاجة اللي بتقدمه ولا لا؟

 

  • مين في السوق بيحل المشكلة أو المشاكل دي؟ وبيحلها ازاى؟ وايه هي نقاط اختلافك عنه؟

 

اجابة الاسئلة دى هتعرفك الناس عايزة اللي بتقدمه ولا لا؟

 

  • لو الزبون أو العميل ماشتراش اللي انت بتقدمه هيخسر ايه؟ وهيكسب ايه لو اشتراه؟

 

اجابة الاسئلة دى هتعرفك الناس مستعدة تدفع تمن اللي بتقدمه ولا لا؟

 

نرجع للسؤال الرئيسي: مين الجمهور المستهدف؟

 

انت بتبيع ايه؟

 

أنا بقدم كورسات انجليزي.

 

مين ممكن يشتري منك؟

 

الناس اللي عايزة تتعلم انجليزي.

 

غلط.

 

اللي ممكن يشتري منك ممكن يكون:

 

1- طلبة الجامعة اللي في اخر سنة، وعايزة تجهز نفسها لسوق العمل.

2- الموظفين اللي شغالين في شركات كبيرة وعايزين يحصلوا على ترقية.

3- رواد الاعمال اللي عايزين يعرفوا يكتبوا انجليزي كويس بغرض التواصل.

4- الشباب اللي عايز يبدأ Freelance Career ولكن مع الأجانب

5-الشباب اللي بيخطط للسفر بلاد اوربا

 

شفت فيه كام شريحة أو كام جمهور اقدر استهدفهم؟

 

طب احدد ده ازاى على البيزنس بتاعي؟

 

إسأل نفسك: مين ممكن يشتري مني اللي انا بقدمه؟

 

واكتب كل حاجة تطلع معاك، وبعدين قرر انهي شريحة هتشتغل عليها.

 

طيب انا عايز اشتغل على كل الشرائح؟!

 

اشتغل بس اعمل لكل شريحة منتج أو خدمة خاصة بيها.

 

بعد ما تعمل كده، طبق القاعدة دي …

 

قاعدة التحديد أو المواصفات المحددة.

 

دي قاعدة من تاليفي وهي باختصار بتنص على إن الجمهور المستهدف لازم يكون ليه مواصفات محددة ليه، بمعني اما اقولك انا جمهوري كذا كذا، فيه شخص ما يجي في بالك.

 

تعالي نشوف …

 

1- طلبة الجامعة اللي في اخر سنة، وعايزة تجهز نفسها لسوق العمل.

 

ده جمهور عام، تخيل؟

 

طلبة الجامعة اللي اخر سنة كلية تجارة، وعايزة تجهز نفسها لسوق العمل.

 

شفت حددت الجمهور ازاى!

 

تعالي نحدد اكتر؟!

 

طلبة جامعة القاهرة اللي في اخر سنة كلية تجارة، وعايزة تجهز نفسها لسوق العمل.

 

تعالي نحدد اكتر؟!

 

طلبة جامعة القاهرة اللي في اخر سنة كلية تجارة، وعايزة تجهز نفسها للشغل في البنوك.

 

ايه رايك؟

 

بذمتك مش انت تعرف واحد صحبك في آخر سنة في كلية تجارة، وعايز يشتغل في بنك وبيجهز نفسه لكده من دلوقتي؟

 

طيب انا اخترت الجمهور المستهدف وحددته خلاص، اعمل ايه تاني؟

 

افهمه واعرف اهتماماته ومشاكله.

 

ازاى؟

 

اولا روح شوف المكان اللي هو موجود فيه اون لاين عشان تعرف مشاكله.

 

طلبة جامعة القاهرة اللي في اخر سنة كلية تجارة، وعايزة تجهز نفسها للشغل في البنوك ممكن تكون فين؟

 

ممكن تكون في جروب الدفعة على الفيسبوك، ممكن تكون في صفحات بتنزل وظائف وتدريب في البنوك، ممكن تكون في صفحات كورسات انجليزي أو كورسات ليها علاقة بالبنوك، ممكن تكون في مواقع (عربي واجنبي) بتشرح ازاى تبدأ وتتطور في الوظائف اللي ليها علاقة بالبنوك.

 

عمرك ما هتعرف تقول الزبون بتاعك فين الا لو كنت محدده كويس اوى، وعمرك ما هتعرف تكتب محتوى يجيب نتيجة الا لو كنت محدده كويس وعارف مشاكله والحلول اللي هو يعرفها.

 

ثانيا ورقة وقلم وتشوف الجمهور ده بيشتكي من ايه؟ نفسه يعمل ايه؟ جرب ايه وما جربش ايه؟

 

اكتب ملاحظات عن كل اللي بتشوفه.

 

خد وقتك في ده، اوعي تبطل تعمل كده.

 

2- توضيح المنتج أو الخدمة

 

انت بتبيع ايه؟

 

كورسات انجليزي.

 

ازاى؟

 

خلال مجموعة من المحاضرات اللي بيقدمها مجموعة من المحاضرين بواقع مرة كل اسبوع + متابعة و واجبات.

 

ليه؟

 

عشان اساعد (الجمهور المستهدف) يوصل لغرض ما، يكون أحسن – افضل – أسرع – أكثر فهما، يقدر يعمل “حاجة معينة”.

 

التفاصيل …

 

انت بتبيع ايه؟

 

الرد على السؤال ده ليه شقين:

 

1- الشق المباشر أو الوظيفي وهو انت بتبيع ايه؟ مثلا كورسات انجليزي.

 

2- الشق الغير مباشر أو النفسي وهو انت فعلا بتبيع ايه؟ ولو انت بتقدم كورسات انجليزي بقي انت بتبيع تطوير مهارات، الوصول لمرتبة أعلى الخ.

 

ازاى اللي انت بتبيعه هيساعد الجمهور في اللي هما عايزينه أو ازاى هو مختلف؟

 

الرد على السؤال ده يتلخص في شرح الطريقة أو الـ Mecbinasim اللي هتقدم بيها المنتج أو الخدمة وفى الحالة دي هو كورس الانجليزي وازاى فعلا هيحقق الشق الاجتماعي و العاطفي.

 

احنا قولنا ان الكورسات اللي هتخليك تتكلم انجليزي بثقة طبيعية غير مصطنعة. ازاى؟

 

وقلنا كورسات انجليزي هتخليك مبهر أو مؤثر أو ليك حضور مميز ومحسوس وسط أي تجمع بيتكلم انجليزي بدون ما تحس إنك غريب عنهم أو هما يحسوا انك مبتعرفش تتكلم أو ضعيف الشخصية. برضو ازاى؟

 

فهمت؟

 

ليه؟

 

انت بتبيع ايه على المستوى العاطفي والاجتماعي؟

 

مثلا هنقول الكورسات اللي هتخليك تتكلم انجليزي بثقة طبيعية غير مصطنعة (ده على المستوى العاطفي).

 

أما على المستوى الاجتماعي ممكن تكون كورسات انجليزي هتخليك مبهر أو مؤثر أو ليك حضور مميز ومحسوس وسط أي تجمع بيتكلم انجليزي بدون ما تحس إنك غريب عنهم أو هما يحسوا انك مبتعرفش تتكلم أو ضعيف الشخصية.

 

تمام؟

 

الخطوة دى واللى قبلها أهم خطوتين في التسويق كله.

 

واه الكلام ده بيتعمل لكل منتج عندك، لان المفروض ان كل منتج ليه جمهور مستهدف.

 

أو ممكن يكون عندك جمهور واحد ولكن عندك ليه منتجات كتير، وساعتها الخطوة الأولى ثابتة، والتانية بتتغير مع كل منتج.

 

فهمت؟

 

3- اختيار القنوات التسويقية

 

رأيي الشخصي إن أهم قنوات تسويقية لازم تشتغل عليها هي:

 

  • الـ Email
  • الويب سايت
  • الفيسبوك و/او انستجرام

 

حاجة تاني؟

 

لا.

 

ملحوظة: الـ 3 أو 4 قنوات دول متضمنة الشكل الـ Organic والشكل الـ Paid.

 

طب يا عم أسامة فيه كذا وكذا وكذا؟

 

كويس جدا، التركيز على المهم مهم.

 

ويا عم بعد فترة من الوقت ابقي اشتغل على القنوات اللي تحبها بشرط توفر الموارد الكاملة ليها، يعني فلوس وقت ومجهود وتيم.

 

ملحوظة في غاية الأهمية: لازم تحدد القناة الاساسية اللى هتبيع عليها لان دى هيكون ليها محتوى مختلف عن أي قناة تانية.

 

ازاى تختار قناة البيع؟

 

كل ما القناة كانت أكثر خصوصية، كل ما كانت افضل.

 

يعني ايه خصوصية؟

 

يعني مش كل الناس تقدر دخل عليها، الفيسبوك كل الناس تقدر تدخل عليه، الويب سايت عدد أقل شوية، الايميل عدد أقل شوية، فهمت؟

 

4- الخروج بالأفكار الرئيسية للمحتوى

 

ركز بقي في الخطوة دي لان دى الخطوة اللي هتساعدك تنشر محتوى كل يوم لمدة سنة بدون ما الأفكار تخلص منك ولا تحس ان المحتوى.

 

بالرجوع لمثال كورسات الانجليزي، من خلال تحديد وتحليل الجمهور المستهدف تم تحديد المواضيع دى:

 

التعلم وتطوير الذات

كورسات الانجليزي

متطلبات سوق العمل

 

وبالرجوع لخطوة توضيح المنتج/الخدمة، تم تحديد المواضيع دى:

 

الثقة الطبيعية بدون اصطناع

ازاى تكون مبهر/موثر/ليك حضور مميز وسط أي مجموعة

ازاى تملك شخصية قوية

 

اذن احنا عندنا 6 مواضيع رئيسية بتتكلم فيهم، والمواضيع دي هي المميزة للبراند بتاعنا، والمطلوب مننا نكون المصدر رقم #1 للمعلومات في كل موضوع منهم اون لاين.

 

تحت كل موضوع من دول تقدر تجيب مئات الأفكار وتنفذها.

 

وضحت الامور؟

 

5- التخطيط لمحتوى كل شهر

 

المطلوب منك اخر اسبوع من كل شهر، تحضر أفكار الشهر الجديد لكل القنوات اللي بتتشغل عليها، كل قناة لوحدها.

 

6- هتعمل ايه على مستوى التسويق ومستوى المبيعات؟

 

لازم تفرق بين المحتوى اللي هتعمله بغرض البيع، والمحتوى اللي هتعمله بغرض التسويق!

 

المحتوى اللي هتعمله بغرض التسويق هيكون هدفه الاول والاخير كسب ثقة الزبون/العميل المحتمل وإثبات إن المنتج/الخدمة اللي انت بتقدمها أحسن حل ليه.

 

أما المحتوى اللي هتعمله بغرض البيع هيكون هدفه الأول والأخير هو البيع طبعا.

 

المحتوى التسويقي بتتكلم فيه عن المشاكل اللي الزبون/العميل المحتمل بيقع فيها

الزبون/العميل المحتمل – والحلول المختلفة اللي انت جربتها أو فكرت فيها أو لاقتها للمشاكل دي.

 

المحتوى البيعي بتتكلم فيه عن المنتج بتاعك، وعن اللي يقدر يعمله ويحققه للزبون، وعن الفرق بينه وبين منتجات وخدمات المنافسين أو الحلول التانية الموجودة في السوق.

 

المحتوى التسويقي، يعنى محتوى يخلي الناس تثق فى المنتجات/الخدمات من غير ما تشوفها أو تجربها، محتوى يبني لك الاساسات اللي تساعدك تبيع بعد كده بسهولة.

 

على القناة اللي هتبيع عليها، جهز محتوى تعرض بيه المنتجات أو الخدمات سواء كانت القناة دى ويب سايت أو واتس اب أو جروب ما على الفيسبوك أو ايميل أو حتى وجها لوجه.

 

المهم تجهز محتوى يبيع المنتج أو الخدمة اللي انت ناوى تقدمها، وتجهز محتوى مش معناه إنك تكتب كلمتين عن المنتج أو الخدمة وخلاص، لا علم الجمهور كل حاجة بيعملها وموجودة جوه المنتج أو الخدمة، ان شاء الله تكتب 100 بوست في الموضوع ده، المهم كل بوست يكون فيه Value، ومش مكرر.

 

وبكده اكون خلصت شرح ازاى تطبق أو تعمل تسويق بالمحتوى لأي منتج أو خدمة.

 

اللي اتشرح لحد هنا كافي جدا انه يخليك تبدأ وتحقق نتائج كمان.

 

ولكن!

 

هشرح لك شوية حاجات تانية صعب تلاقي حد يقولك عليها وده لانها من خلال الخبرة والتجربة.

 

ركز معايا بقي …

 

5 أسرار ذهبية فعلا مش كلام وخلاص! (من واقع الخبرات والتجارب طوال +5 سنين)

 

طبق كل كلمة انت قريتها لحد دلوقتي، وطبق معاها الـ 5 حاجات دول، وانت اضمن لك انك مش هيكون عندك أي مشكلة في التسويق بالمحتوى للمنتج أو الخدمة اللي بتقدمها.

 

1- استلهام أفكار المحتوى (الـ Content Inspirations)

 

المفروض كل شخص بيعمل تسويق بالمحتوى يكون عنده مصادر أو أماكن بيستلهم منها افكار جديدة ومختلفة للمحتوى.

 

المصادر دى لازم تكون منها في مجالك، ومنها عامة حسب اهتماماتك.

 

انا شخصيا بروح اقرا في علم النفس عشان اجيب افكار مختلفة، وأفكار مختلفة مش فكرة المحتوى الرئيسية بس، إنما أفكار فرعية داخل كل قطعة محتوى.

 

لو بتحب الكورة، تابع كام موقع أو قناة يوتيوب بتقدم محتوى حلو سواء بالعربي أو بالانجليزي.

 

اقرا جرايد لو بتحب، شوف مجلات لو حابب، اتفرج على افلام لو غاوي.

 

أي حاجة، المهم يكون عندك شوية مصادر تاخد منها Inspirations للمحتوى اللي بتقدمه.

 

2- الجودة العالية تكسب أي حاجة بس لو باستمرار

 

اوعى تكتب محتوى عشان المفروض تكتب محتوى!

 

اكتب محتوى عشان فيه شخص عنده مشكلة ما وحلها في المحتوى بتاعك. اكتب محتوى عشان فيه حاجة مهمة الناس لازم تفهمها. اكتب محتوى عشان لسه في مواضيع المحتوى الموجود فيها على جوجل ملوش لازمة.

 

الجودة العالية في المحتوى تحكم كل شئ.

 

اكتب واوعي تطبل في يوم من الايام.

 

3- زود Leads في كل قطعة محتوى ومن كل فرصة ممكنة

 

الـ Leads يعني ناس مستعدة تتعامل معاك عشان انت قدمت لها حلول للمشكلة أو الاحتياج اللي عندهم مجانا، وفى مقابل ده طلبت منهم الاذن في التسويق ليهم.

 

الاذن ده صورته بتكون في حاجة اسمها Lead Magent أو Content Offer وهو عبارة عن قطعة محتوى عالية الجودة في شكل كتاب الكتروني أو كورس مثلا ومجانا.

 

نصيحتي تعمل Content Offers كتير، وبالذات في المواضيع الرئيسية بتاعت المحتوى.

 

4- الشفافية (الـ Transparency)

 

في رأيي الشخصي إن الشفافية من اقوى اسلحة التسويق إن لم تكن الأقوى!

 

إنك تقول اللي حصل معاك أو مع شركتك بمنتهي الصراحة شئ مش كتير بنشوفه بيحصل، ولكن في الحالات اللي شفناها حصلت النتائج كانت رهيبة!

 

أخر حاجة جاية على بالي في الموضوع ده هو فيديو وائل شوقي بتاع مطعم حمزة اللي في مدينة نصر، اما طلع وقال ازاى تعمل كفتة لحوم من غير لحوم.

 

لو المنتج بتاعك فيه مشكلة، اطلع قولها عادي، لو المنتج بتاعك مش لكل الناس، قول عادي.

 

الوضوح اهم شئ، الناس مبتحبش اللي بيضحك عليها.

 

خليك شفاف.

 

5- مصفوفة الحلول (Solution Matrix)

 

النقطة دى من اكتر النقط اللي هتساعد تنجح في التسويق، المبيعات، حياتك عامة.

 

مصفوفة الحلول باختصار هي كل الأفكار والتجارب والخبرات والمعرفة اللي في دماغك عن حاجة ما، ولكن موجودة بشكل منظم يسمح لك تطلع منها كل ما تحتاج.

 

خليني اوضح لك …

 

التسويق بالمحتوى بسيط بس مش سهل!

 

البساطة جاية من فكرة إن كل المطلوب منك تقدم محتوى عالي الجودة ومفيد للجمهور المستهدف باستمرار في أي شكل وفي أي مكان.

 

الصعوبة جاية إن بعد فترة بتظهر بعض المشاكل زي ضغط الشغل وقلة الوقت، زي نضوب الأفكار، زي الزهق، زي إن البيزنس معندوش موارد وحاجات تانية كتير!

 

الحلول للمشاكل دي تتمثل في مثلا استراتيجيات الـ Content Recycling، الـ Evergreen Content، الـ Intelligent Content وحاجات تانية كتير …

 

المفروض انت يكون في دماغك كل الحلول والافكار دى، وتتعلم ازاى وامتى تستخدمها عشان اما تتحط في موقف تعرف تتصرف.

 

فى الاول وفى الاخر انت بتاع تسويق، وظيفتك تسوق للبيزنس وتساعد في تحقيق مبيعات باستمرار باستخدام كل حاجة جوه دماغك.

 

يعني بقدر ما انت فاهم وبتعرف تنفذ، بقدر ما هتقدر تكون ناجح في تسويق أي منتج أو خدمة.

 

وبس كده انا خلصت كلامي.

 

بص بقي …

 

كل حرف انكتب وانت لسه قاريه في المقال ده تساوي كتير اوى، انا شايف ان المحتوى ده من افضل واجود ما كتبت على موقع osamasalah.com.

 

انت اتعلمت ايه هو التسويق بالمحتوى وازاى تطبقه على البيزنس بتاعك خطوة بخطوة.

 

اتعلمت افكار كتير، شفت استراتيجيات وخطوات وتعليمات عملية.

 

عندي ليك طلب واحد!

 

التطبيق.

 

طبق وبس.

 

وحط في دماغك الكلام اللي انت لسه قاريه ده قيمته عالية جدا، وانا مش طالب منك أي مقابل غير إنك تساعد في نشره.

 

اشكرك مقدما ^^

 

حاجة أخيرة!

 

لو عايز تعرف وتتعلم كل ازاى تكتب محتوى يجيبلك ترافيك، و Leads، و Customers، دوس هنا.

 

خطوة بخطوة تعلم كيف تكتب:

 

Blog Post احترافي مكتمل الأركان يساعد البيزنس يكسب Online Authority، ويطلع في النتيجة الأولى فى جوجل، ويجيب لك +1000 زائر شهريا بدون مجهود إضافي.

 

Sales Page تعرض كل حاجة عن المنتج أو الخدمة اللي بتقدمها، وتساعدك تبيع المنتج/الخدمة باستمرار بدون اعلانات، وبدون كتابة بوستات أو مقالات كل أسبوع (اكتبها مرة واحدة، استخدمها لمئات المرات).

 

Long Form Content تجيب بيه Leads (أكتر من 300 Lead جديد كل شهر) مهتمين جدا بالمنتج والخدمة ومستعدين يشتروا – من غير تكلفة كبيرة في الإعلانات (أو من غير تكلفة اصلا).

 

Email Funnels تبني بيها علاقة وطيدة مع الجمهور، وتزود بيها مبيعات المنتج أو الخدمة اللي بتقدمها بطريقة سلسة غير منفرة حتى لو ماتعرفش حاجة عن الـ Email Marketing.

 

محتوى Landing Page أو Opt-in Pages تخلي على الأقل 12% من اللي يدخل عليها يسجل ويبقي Lead عندك حتى لو ماتعرفش حاجة عن الـ Copywriting والـ Landing Pages.

 

بوستات على الفيس بوك تقنع الجمهور وتبيع المنتجات والخدمات اللي بتقدمها؟ تجيب تفاعل؟ وتبني بيها Community مهتم؟ وتعمل لك Branding بطريقة مظبوطة حتى لو ما تعرفش كتير عن الـ Branding.

 

محتوى قصير يبيع بسرعة، يوصل فكرة المنتج/الخدمة لاي حد بسهولة، وتقدر تستخدمه لـ تويتر وانستجرام، وصف المنتجات/الخدمات، كابشن أي صورة، مقالات قصيرة، Sales Pitch واكتر.

 

طريقة التفكير أو الخطوات/العمليات العقلية (Mental Process) اللي بتيجي أو اللي المفروض تيجي في دماغك وانت بتشتغل (تكتب محتوى، تخطط، تتكلم مع حد، تبيع، تتفاوض الخ).

 

دوس هنا للحصول على كل هذا وأكثر

 

 

 

التصنيفات: Content Marketing

12 تعليقات

khaledissa · 2019-03-25 في 12:32 م

مقال محترم استفدت منه كتير وطبقت منه حاجات علي فكرة بس انا طبقتها بشكل عشوائي من قبل ما اقرأ المقال

    Osama Salah · 2019-03-25 في 2:56 م

    عظيم جدا يا استاذ خالد، بالتوفيق.

marwa ragab · 2019-03-26 في 9:55 ص

حضرتك انسان محترم وعظيم وكل مرة اشوف واقرا حاجة حضرتك بتنزلها بيزداد احترامى ليك
الله يجزيك خيرا

    Osama Salah · 2019-03-26 في 10:55 ص

    أشكرك جدا جدا يا مروة على الكلام الرائع ^^

      Hadeer Fathallah · 2019-09-05 في 1:40 م

      ماشاء الله كلام حضرتك جميل وسهل ومقنع جدا جدا
      وساعدني كتير
      بس كان عندي كام سؤال لحضرتك…
      ممكن؟!

        Osama Salah · 2019-09-07 في 11:10 ص

        أشكرك جدا، وطبعا تحت امرك فى اي سؤال …

Naji Mohamed Mirghani · 2019-05-06 في 1:34 م

اتعلمت منك كبير ، انت متمكن و بسيط وواضح وملهم ، كل كلمة بتكتبها بحس بحبك ليها وللرسالة بتاعتك ، موفق ان شاء الله .

    Osama Salah · 2019-05-07 في 1:19 ص

    أشكرك جدا جدا يا ناجي على الفيدباك الرائع ده ^^

آية مصطفي · 2019-06-05 في 6:59 ص

مقال جميل جدا
ً

    Osama Salah · 2019-06-05 في 9:37 م

    أشكرك يا آية ^^

Mahmoud Ezzeldin · 2019-10-25 في 2:27 م

كيف اقدر اتواصل معك استاذ اسامة للمساعدة فى عمل موقع للبيع على النت

اسال او استفسر او قول رايك ...

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.