fbpx

5 غلطات شائعة فى التسويق بالمحتوى (وازاى تتغلب عليها)

التسويق بالمحتوى لمتوسطى المستوى

 

معظم الناس اللي بتطبق التسويق بالمحتوى (Content Marketing) بتطبقه غلط!

 

عرفت منين؟

 

بقالي +7 سنين بشوف الناس بتحاول تعمل تسويق عن طريق المحتوى، ومش قادرة توصل للفعالية الكاملة من الاستراتجية دى.

 

والسبب؟!

 

فيه 5 غلطات بيقع فيها معظم الناس اللي بتطبق التسويق بالمحتوى …

 

1- معظم الناس اللي بتطبق التسويق بالمحتوى بيعتبروا نفسهم الزبون!

 

القاعدة التسويقية رقم #1 من وجهة نظري إن العميل هو الملك، هو الكل في الكل.

 

أنت مش الزبون.

 

التسويق مش معركة فكرية بينك وبين الزبون!

 

ارائك وقناعاتك الشخصية ملهاش اي قيمة قدام آراء وقناعات الزبون.

 

الزبون هو اللي بيشتري مش إنت.

 

الزبون ملوش دعوة بقد ايه انت عبقري إلا لو العبقرية دي هتساعده إنه يحل مشاكله أو يعيش حياة أفضل.

 

أما تيجي تعمل محتوى، لازم تعمل Shutdown لمخك، وتحط مكانه مخ الزبون.

 

لازم تشوف هل المحتوى اللي بتعمله ليه علاقة باهتمامات الزبون ولا لا؟

 

حاول تتجنب أراء الزبائن واعتمد على رايك، وانت هتفشل 100 %.

 

2- معظم الناس اللي بتطبق التسويق بالمحتوى مش بتكون حاطه هدف واضح للمحتوى!

 

اعمل أي حاجة من غير هدف وانا اضمن لك مليون في المية إنك هتفشل فيها.

 

معظم الناس اللي بتحاول تطبق التسويق بالمحتوى، أول حاجة بتفكر فيها إنها تعمل المحتوى نفسه، وبتنسي تماما هو المحتوى ده معمول ليه اصلا!

 

فيه ناس كتير أما بتيجي تعمل محتوى بتحط هدف زي مثلا:

 

أنا بعمل محتوى عشان اعرّف الناس عن الموضوع ده، أو اقول للناس اني بيبع المنتج الفلاني وأقنعهم بيه.

 

و حاجات كتيرة من هذا القبيل …

 

اللي انت قولته ده هدف، بس هدف غير واضح!

 

الهدف الواضح هو الهدف اللي ينعكس على طريقة عمل المحتوى ويقولك المفروض تعمل ايه بالظبط.

 

خليني اوضح لك!

 

في أي خطة بعملها للمحتوى بكتب الهدف جمبه العنوان جمبه الـ CTA وهقولك ليه لو انت مش عارف!

 

التسويق بالمحتوى

 

عشان العنوان هو الأداة رقم #1 اللي بتخلي الجمهور يدفع انتباهه كخطوة أولي في تفاعله مع المحتوى بتاعك.

 

والـ CTA بيقفل الـ Gap اللى انت عملتها بالمحتوى في دماغ الجمهور.

 

ركز معايا …

 

معنى إنك عايز  تعرّف الناس بالمنتج، يعني انت عايز تعمل وعي (Awareness).

 

العنوان لازم يحتوي على المشكلة أو الحاجة أو الرغبة اللي العميل هيهتم بالمحتوى بتاعك عشانها.

 

والـ CTA لازم يكون فيه الخطوة اللي المفروض يعملها بعد ما تحول من غير واعي لـ واعي بالفكرة أو الموضوع اللي انت بتتكلم عنه.

 

مثال عملي، تخيل لو انت عندك شركة بتبيع أطقم كوبايات للعرايس الجداد، وعايز تعمل محتوى تعرف بيه الجمهور المستهدف إن المنتج ده مفيد ليهم …

 

تعمل ايه؟

 

هتقول إن العنوان مثلا عبارة ” عايزة طقم أطباق يشرفك في أول مقابلة لأهل العريس؟ “

 

في العنوان ده انت لعبت على المشكلة اللى عند البنت اللي متجوزة جديد أو الحاجة اللي هي فعلا بتدورعليها.

 

و الـ CTA إما هتخليها تدخل تتفرج على اشكال مختلفة من المنتجات اللي انت بتقدمها أو تبيع لها منتج بعينه.

 

إذن لو بتعمل محتوى من غير ما تكون محدد ليه هدف واضح، يبقي بلح ولا هتوصل لأي حاجة حتي لو انت بتعمل محتوى كويس.

 

3- معظم الناس اللي بتطبق التسويق بالمحتوى بتنسى التوزيع!

 

انتاج المحتوى هو حجر الأساس لتطبيق التسويق بالمحتوى ولكن لوحده مش كفاية!

 

فيه مشكلة عند معظم المسوقين وأصحاب الشركات وهي إنهم مقتنعين إن طالما عملوا المنتج أو عندهم منتج حلو جدا، إن المنتج هيبيع نفسه!

 

مع إن المنطق بيقول إن عشان الزبون يشتري حاجة، لازم يسمع عنها الأول!

 

ازاى بقي الناس هتعرف أن المنتج بتاعك عظيم لو ماعرفوش إنه موجود من الأساس!

 

المحتوى زيه زي المنتج بالظبط، لو عملت محتوى حلو اوى بس محدش سمع عنه أو شافه، يبقي ولا ليه اى تلاتين لازمة.

 

دي حقيقة مش افتراض من عندي.

 

إذن التسويق بالمحتوى عمره ما هيجيب نتيجة صح 100 % لو اعتمدت بس على الانتاج ونسيت التوزيع والترويج.

 

دوس هنا لقراءة الدليل الكامل لتوزيع وترويج المحتوى خطوة بخطوة.

 

4- معظم الناس اللي بتطبق التسويق بالمحتوى مش بيكونوا عارفين وضع المحتوى في مراحل الشراء اللي بيمر بيها الزبون

 

يوميا بيكلمني أصحاب شركات عايزين يعتمدوا على نفسهم في عمل تسويق للمنتجات أو الخدمات اللي بيقدموها، وبيسألوني المفروض يعملوا ايه بالظبط؟

 

من كتر ما السؤال ده اتكرر، طورت استراتيجية بسيطة ممكن أي حد يعتمد عليها عشان يعمل استراتيجية تسويقية فعالة حتى لو مش خبرة اوى فى التسويق.

 

هاقولك عليها حالا!

 

الاستراتيجية عبارة عن 3 خطوات بسيطة بس عميقة …

 

لو مشيت على الخطوات بحذافيرها، مش هتحتاج بإذن الله لحاجة تانية، والخطوات هي:

 

1- مين الزبون المستهدف؟

2- موجود فين سواء على الإنترنت أو في الواقع وبيعمل ايه هناك؟

3- ايه الخطوات اللي بيعملها – بشكل طبيعي – عشان يشتري اللي انت بتبيعه؟

 

الخطوات دى تبان بسيطة وسهلة وممكن تديك إحساس إن الموضوع اكبر من كده، بس البساطة دى ماحصلتش فى يوم وليلة.

 

أول سؤال كل الناس بتعمل حسابه حتى لو معرفوش يجاوبوا عليه إجابة مظبوطة ولكن بيحاولوا يوصلوا للإجابة.

 

تاني سؤال فيه ناس أقل بكتير بتساله وناس أقل بتعرف تجاوب عليه!

 

تالت سؤال وهو السؤال اللي ليه علاقة بالنقطة اللي بنتكلم عليها وهو السؤال الأقل طرحا، وهو من الأسباب الرئيسية في فشل معظم الناس في تطبيق التسويق بالمحتوى بطريقة صح.

 

ببساطة لازم تشوف الشخص ازاى بيدور وبيشتري اللي انت بتبيعه، وتروح عامل المحتوى المناسب ليه في كل مرحلة من المراحل اللي بيخش فيها.

 

المحتوى بتاعك عمره ما هيجيب نتيجة لو عملته وانت مش عارف الزبون في انهي مرحلة من مراحل الشراء، و محتاج ايه بالظبط فى المرحلة دى.

 

بإختصار فى عالم الإنترنت، بيع بالطريقة اللى الزبون بيشتري بيها!

 

فهمت الفكرة؟

 

5- معظم الناس اللي بتطبق التسويق بالمحتوى مش عارفه ازاى تدير العملية دي من انتاج محتوى وتوزيع و ترويج و تحليل الخ

 

الحاجة اللي مش معمول لها إدراة، عمرها ما بتنجح حتى لو حلوة اوى.

 

في التسويق بالمحتوى بشكل خاص، فيه مشكلة كبيرة بيقع فيها ناس كتيرة من اللي شغالين في المجال وهي الاستمرارية والاتساق.

 

مشكلة المشكلات فى التسويق بالمحتوى

 

الإستمرارية والاتساق – اللي هي بالإنجليزي Consistency – سلاح قوي جدا من أسلحة الإقناع ومفتاح من مفاتيح النجاح الأساسية للتسويق بالمحتوى.

 

آفة معظم الناس بتوع التسويق بالمحتوى هو عدم الإستمرارية والاتساق وده بيخلي كل المجهودات اللي عملوها سابقا من محتوى وغيره تضيع أونطة.

 

ركز يا أستاذ ويا أستاذة عشان هاقولك ازاى تحافظ على الإتساق و الإستمرارية مع بعض …

 

لو انا وعدتك اني هاعمل لك محتوى يساعدك ويفهمك كل حاجة انت عايزها عن التسويق بالمحتوى …

 

وجيت في مرة ما عملتش كده أو غيرت المواضيع اللي بتكلم فيها، انت هتحس اني مش الشخص اللي المفروض تسمع له!

 

إذن لا ينفع تبطل ولا ينفع توعد الناس بحاجة وتعمل حاجة مختلفة!

 

عشان الموضوع ده يحصل بقي، فيه حاجتين مهمين جدا لازم تحددهم …

 

الأولى تعتبر أساس أي استراتيجية تسويق بالمحتوى ، والتانية تعتبر أساس أي خطة تسويق بالمحتوى.

 

** الفرق بين الإستراتيجية والخطة، إن الإستراتيجية بتقولك على الإتجاه اللى يوصلك للهدف اللي انت عايزه، إنما الخطة تعتبر التنفيذ العملي للاتجاه ده **

 

الحاجة الأولي هي الـ Content Marketing Mission Statement ودي وثيقة عبارة عن 3 – 5 سطور بتفسر وبتوضح الأسباب والأغراض اللي عشانها البيزنس بيعمل محتوى.

 

الوثيقة دى هي الأداة اللي من خلالها هتحافظ على اتساق المحتوى اللي بيطلع وهيطلع منك لأخر العمر.

 

الحاجة التانية هي الـ Content Workflow ودي خطوات أو مراحل بتحدد خط إنتاج المحتوى بإختلاف أنواعه، وبتقولك مين بيعمل ايه وهيعمله امتي وبمواصفات عاملة ازاى.

 

والـ Workflow ده هو الاداة اللي هتقدر بيها تحافظ على الإستمرارية بحيث قبل كل شهر هتكون عارف ايه المحتوى اللي هتعمله ومين هيعمله وهيسلمه امتى وهيتم نشره امتي كمان.

 

وبكده هتقدر تحافظ على الإتساق و الإستمرارية مع بعض.

 

دول كانوا 5 غلطات بيقع فيها الناس اللي بتطبق التسويق بالمحتوى وازاى تعالج كل منها …

 

أرشح لك بقوة كتاب Content Marketing Prinicples لو مش عايز تقع فى الغلطات دي، وعايز تكتب محتوى عالي الجودة على أسس علمية.

 

لو عايز تستخدم استراتجيات مختلفة لانتاج محتوى مختلف، وكمان عايز تتعلم ازاى تدير عملية التسويق بالمحتوى من اولها لاخرها.

 

الكتاب حجر الأساس ليك فى مجال التسويق بالمحتوى، من خلال اكتر من 400 صفحة بسرد لك كل حاجة تقريبا تخص أساسيات التسويق بالمحتوى بشكل بسيط.

 

تفاصيل الكتاب كاملة

فكرتين عن“5 غلطات شائعة فى التسويق بالمحتوى (وازاى تتغلب عليها)”

  1. بدنا كمان دسكاونت عالكتاب ضروري
    لاني بدي أشتري كتابين هادا والي ب28$ فبدنا دسكاونت بليز

شارك