fbpx

 

عدد الناس اللي بتشتغل في التسويق بالمحتوى في مصر حسب موقع لينكد إن هو 17084   شخص.

 

الرقم ده كل يوم بيزيد نتيجة وعي الشركات بأهمية التسويق بالمحتوى كاستراتيجية تسويقية يجب توجيه أكتر من 75% من ميزانية التسويق ليها.

 

بالإضافة إلى أن التسويق بالمحتوى من أكتر مجالات العمل طلبا في سوق الفرى لانس، وكمان فلوسه حلوة مقارنة بباقي مجالات التسويق.

 

بس مش كل الناس فاهمة المجال ده صح، وبالتالي مش كل الناس بتعرف تجيب شغل فيه بالمرتب اللي هي عايزه!

 

والسبب؟

 

عدم الفهم الصحيح أساسيات ومبادئ التسويق بالمحتوى، وعدم المعرفة الحقيقية لكيفية تطبيق الأساسيات دى.

 

فيه 5 مفاهيم مغلوطة أو خرافات عن التسويق بالمحتوى هي السبب الرئيسي اللي بيخلي أدائك مش على المستوى المطلوب (Underperform).

 

يلا نبدأ …

 

1- التسويق بالمحتوى مش مناسب لمجال كذا

 

لو انت من الناس اللي بتقول كده، فأحب أقولك ده مش صحيح!

 

التسويق بالمحتوى ينفع لكل المجالات وكل الأسواق.

 

التسويق بالمحتوى بيتم تنفيذه عن طريق إنشاء محتوى ذو قيمة بيحل المشاكل اللي بتواجه الجمهور المستهدف.

 

مهما كان المجال بتاعك رخم أو صعب، حدد الجمهور المستهدف و اعرف وافهم المشاكل اللي بيواجهها، واعمل لهم محتوى فيه حلول للمشاكل دى، وانت هتبطل تقول المجال الفلاني رخم.

 

انت ممكن تقول انا مش عارف أطبق على المجال اللي انا شغال فيه، وساعتها نتكلم واساعدك.

 

إنما تقول إن التسويق بالمحتوى مش مناسب لمجال كذا، ده غلط جدا، ومش بيساعدك غير انك تفضل محتار ومحبط.

 

تعلم كتابة محتوى يحل مشاكل الجمهور المستهدف خطوة بخطوة مهما كان المجال بتاعك (مجانا)

 

2- التسويق بالمحتوى مش بيكلف الشركة فلوس

 

بص يا سيدي، مفيش حاجة ببلاش غير العمى والطراش.

 

التسويق بالمحتوى مش ببلاش، بس مش بفلوس كتيرة برضو!

 

التسويق بالمحتوى مقارنة بالإعلانات، هو بكل تأكيد أقل تكلفة، ولكن عمره ما هيجيب معاك نتيجة إلا أما تستثمر فيه بطريقة صح.

 

وعشان تستثمر فيه بطريقة صح، لازم تتعلم الأساسيات والمبادئ اللي كبار المسوقين في العالم بيمشوا عليها.

 

أولا لازم قبل أي حاجة تعمل استراتيجية للتسويق بالمحتوى (دوس هنا عشان تتعلم تعملها).

 

ثانيا لازم تتعلم كتابة المحتوى صح (دوس هنا عشان تتعلم كتابة المحتوى على أسس علمية).

 

ثالثا لازم تعرف التسويق بالمحتوى صح، هو عبارة عن ايه؟ ازاى بيتم تنفيذه؟ ممكن يساعد اي شركة توصل لايه؟ (دوس هنا عشان تعرف التسويق بالمحتوى حقيقية عبارة عن ايه).

 

3- الناس ما بتقراش

 

مين قال؟

 

الناس بتقرا، وبتقرا دلوقتي اكتر من اي وقت فات!

 

إحنا في عصر جوجل يا برنس، اي حد عايز يشتري أو يعرف حاجة بيدخل يكتب اللي في دماغه في جوجل.

 

الناس بتقرا، والناس بتسمع، والناس بتتفرج، اعمل انت بس محتوى عالي الجودة يحل مشكلة وبيقدم حلول واقعية للناس وملكش دعوة.

 

تعلم كتابة محتوى عالي الجودة يخلي الناس تقراه وتعمل له شير + تقتنع بيك وتشتري منك.

 

4- الموضوع بياخد وقت كبير عبقال ما يجيب نتيجة!

 

انا معاك انه بياخد وقت، بس تعالي أقولك حاجة مهمة جدا …

 

اي بيزنس علشان يزود الربح قدامه خمس طرق مفيش غيرها:

 

1- زيادة عدد العملاء

2- زيادة حجم التعامل مع كل عميل

3- زيادة عدد التعاملات لكل عميل

4- زيادة السعر

5- تقليل التكلفة

 

لو قررت تزود السعر، أو تقلل التكلفة ممكن تقع في مشاكل ماتقدرش تحلها، الحلول دي خطيرة شوية، يعني من الأخر مش قدامك غير طريقة من أول 3 طرق.

 

الطريقة التقليدية لزيادة عدد العملاء أو حجم التعامل أو عدد التعاملات مع طول عميل هي الظهور كتير للناس بالمنتج أو الخدمة اللي الشركة بتقدمها يعني تعمل اعلانات.

 

الطريقة دى كويسة وفعلا بتشتغل ولكن يا دوبك اللى هتدفعه هتلمه او هتكسب مبلغ بسيط، ومع تقدم الوقت المبيعات هتقل، وتبتدى تسأل نفسك هو انا مبيعاتي قلت ليه؟

 

فتبدأ تدفع اكتر فتكسب أكتر شوية، فتدفع اكتر، وحلقة مقفولة!

 

الاعلانات تكلفتها فى الطالع، و المنافسة عمال تزيد.

 

الصح، تكسب ثقة الزبون/العميل وتخليه يرشحك لصحابه عن طريق إنك تتكلم معاه وتشوف مشاكله وتحاول تحلها بالمحتوى.

 

انا مش ضد الاعلانات، بالعكس، الاعلانات جزء مهم جدا من العملية التسويقية إنما ضد إن التركيز كله يكون على الاعلانات مجردة، الصح تستثمر فى أصول تسويقية تساعدك تبني البيزنس بتاعك وتكبره مع الوقت.

 

5- التسويق بالمحتوى سهل واي حد يقدر يعمله

 

فيه ناس بتقول هو ايه الموضوع يعني؟ نكتب بوست ولا مقالة والموضوع خلاص كده!

 

أومال الحاجات دى فين:

 

  • استراتيجية التسويق بالمحتوى (Content Marketing Strategy)
  • ادراة التسويق بالمحتوى (Content Marketing Management)
  • خطة المحتوى لكل قناة تسويقية (Content/Channel Plan)
  • صناعة/كتابة/خلق المحتوى (Content Creation)
  • توزيع وترويج المحتوى (Content Distribution)
  • تجربة المحتوى (Content Experience)
  • تحليلات المحتوى (Content Analytics)
  • المحتوى المٌجمع (Content Curation)
  • المحتوى المٌعاد شكله (Content Repurposing)
  • المحتوى المعٌاد تدويره (Content Recycling)
  • المحتوى الفيروسي (Viral Content)

 

التسويق بالمحتوى مش سهل، ومش صعب!

 

علم التسويق بالمحتوى عبارة عن مجموعة من الأفكار – الأدوات – الطرق – المهارات لو اي شخص عرفها واتقنها، بيقدر يعمل تسويق لأي بيزنس مهما كان بيقدم سواء منتج أو خدمة.

 

كل اللي عليك إنك تشوف ايه هي الأفكار والأدوات والطرق والمهارات اللي بيستخدمها المسوقين بالمحتوى حوالين العالم وبتجيب معاهم نتائج، وتطبقها على الحالة بتاعك.

 

بس كده …

 

التسويق بالمحتوى مجال مش سهل، والشغل فيه مش بسهولة!

 

التسويق بالمحتوى خليط من العلم والفن مع بعض.

 

مين هما المسوقين بالمحتوى؟

 

إحنا مسوقين، و صناع محتوى، و كٌتاب، و مؤلفين، و قصاصين، و حكائين، ومحللين، و رواد أعمال، و علماء نفس، و فنانين، و رسامين، و باحثين، و Public Speakers، و ممثلين، و مخرجين، و كٌتاب سيناريو، و صحفيين، و مبدعين، و مخططين استراتيجيين و حاجات كتير …

 

إحنا واخدين من كل واحد من دول حتة!

 

فيه مننا اللي واخد حتة من حد أكبر من حتة تانية من حد تاني، وده اللي بيميز واحد مننا عن واحد تاني.

 

حياتنا مش عادية أبدا، حياتنا خليط بين كل الحاجات دي!

 

شوية تحسنا بتوع داتا وتحليلات وحاجة تقيلة، وشوية فنانين ومبدعين ومؤلفين. 

 

لو انت بتحب وبتعرف تعمل اي حاجة من الحاجات دى يبقي أنت تنفع تكون مسوق بالمحتوى.

 

حقيقي انا بحب عالم المسوقين بالمحتوى وأفتخر إني جوه العالم ده. دوس هنا عشان تعرف ازاى تدخل جوه العالم ده، وتكون من الشاطرين فيه!

 

 

التصنيفات: Content Marketing

0 تعليق

اسال او استفسر او قول رايك ...

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.