المقال ده موجه للناس اللي مش عارفة ازاى تبدأ في التسويق عبر الإنترنت أو بمعني أدق مش عارفة ازاى تختار مجال من مجالات التسويق الإلكتروني عشان تبدأ فيه!

 

بس قبل ما نبدأ، لازم نوضح شوية مفاهيم متشابكة!

 

التسويق الرقمي VS التسويق عبر الإنترنت

 

التسويق الرقمي (Digital Marketing) حسب موقع ويكيبيديا هو:

 

 

 

“تسويق المنتجات أو الخدمات باستخدام التكنولوجيا الرقمية، بصورة أساسية بإستخدام الإنترنت أو اي وسط رقمي”.

 

كلمة السر هنا هي “وسط رقمي” …

 

معنى كده إن أي حاجة تعتمد على التكنولوجيا الرقمية (0 و 1) تندرج تحت مسمى التسويق الرقمي.

 

يعني مش بس الإنترنت، لا ده التلفزيون، والراديو وغيرهما!

 

إذن التسويق الرقمي مقسوم لجزئين:

 

1- التسويق عبر الإنترنت (Online Marketing)

2- التسويق الغير متصل بالإنترنت (Offline Marketing)

 

قبل ما نتكلم عن التسويق عبر الإنترنت، تعالوا نتكلم عن التسويق اللي مش عبر الإنترنت.

 

التسويق الغير متصل بالإنترنت (Offline Marketing)

 

الـ Offline Marketing مقسوم لـ 4 أجزاء رئيسية:

 

 

 

1- الـ TV Marketing

2- الـ Radio Marketing

3- الـ Mobile Marketing

4- الـ Digital Billboards

 

خد بالك، الـ Offline Marketing جواه أربع فروع أساسية تحت مظلة الـ Digital، وجوه فروع تانية تحت مظلة الـ Traditional زي المطبوعات مثلا، ولكن هنا كلامنا هيكون على الفروع اللي تحت مظلة الـ Digital.

 

كل جزء من الأربعة دول ليه أجزاء تحت منه، وطبعا فيه ببلاش وفيه مدفوع زي ما هنوضح دلوقتي.

 

1- التسويق عبر التلفزيون (TV Marketing)

 

 

بإختصار التسويق عبر التلفزيون هو استخدام التلفزيون – كوسط رقمي – في توصيل رسالة ما لجمهور عريض من المستهلكين.

 

الموضوع ببساطة إن كل شركة عايزة تبيع المنتجات أو الخدمات اللي بتعملها، وعشان ده يحصل، لازم الناس تعرف إن الشركة الفلانية عندها المنتج العلاني وإنه ممكن ينفعهم!

 

فتقوم الشركات تدور على أنسب وأسرع طريقة تسمح لهم إنهم يقولوا اللي هما عايزينه قدام عدد كبير من الجماهير!

 

في دولة زي مصر، التلفزيون من الحلول الفعالة لتحقيق الهدف ده، ولكن ليه عيوب زي إنه مكلف جدا، والعيب الأهم من وجهة نظري إن مفيش Control على الجمهور بحيث ماتقدرش تستهدف الجمهور اللي انت عايزه، لا كله على بعضه كده!

 

الخلاصة، التسويق عبر التلفزيون مكلف جدا بشكل مخيف، و انت مش هتعرف تحدد جمهورك بدقة، ولا هتعرف تحلل سلوكه ورد فعله على الرسالة التسويقية اللي بتقولها، وبالتالي في عصر الإنترنت حاول بقدر الإمكان – لو ليك صوت مسموع في الشركة اللي انت شغال فيها – تقلل الاعتماد على التسويق من خلاله.

 

التسويق عبر التلفزيون ليه جزء مجاني وجزء مدفوع!

 

الجزء المدفوع متمثل في الإعلانات طبعا، والجزء المجاني هو إنك تظهر في البرامج والـ Talk Shows ببلاش، وده طبعا مهمة تخصص مهضوم الحق في التسويق وهو الـ PR أو العلاقات العامة.

 

انا قولت إن التلفزيون وسيلة تسويقية فعالة في مصر، ولكن أهميتها عمالة تقل يوم عن يوم، وده بفضل يوتيوب أولا وباقي قنوات التسويق عبر الإنترنت ثانيا.

 

2- التسويق عبر الراديو (Radio Marketing)

 

 

نفس الكلام اللي اتقال على التلفزيون يُطبق بحذافيره على الراديو، مع الأخذ في الإعتبار إن الراديو مسموع والجمهور اللي موجود عليه صفاته مختلفة شوية عن جمهور التلفزيون.

 

3- اللوحات الإعلانية الرقمية (Digital Billboards)

 

 

الـ Billboards عبارة عن يافطة كبيرة محطوطة في مكان معين على الطريق لتوصيل رسالة ما أو الإعلان عن شئ ما.

 

ميزته أن ناس كتير وهي سايقة عربياتها أو وهي بتتمشي في الشارع بتشوفه.

 

فيه منها النوع التقليدي أو المطبوع (الـ Traditional)، ولكن فيه منها نوع رقمي، وهو نفس فكرة العادية ولكن بصورة تفاعلية (Interactive) زي ما هو باين في الـ GIF.

 

يعني ممكن تعرض عليه فيديو للمنتج بتاعك، أو تعرض Live مثلا للزباين وهي بتتعامل معاك لو عندك Physical Product زي ما ماكدونالدز بتعمل مثلا، أو تعرض عليه رسالتك التسويقية بطريقة تفاعلية زي GIF إلخ.

 

النوع ده مكلف صحيح، ولكن أقل بكتير من تكلفة التلفزيون، وطبعا في مصر فيه عدد قليل منها، ولكن في دبي وأمريكا وأوربا هتلاقيها في كل مكان.

 

4- التسويق عبر الموبايل (Mobile Marketing)

 

 

أخر جزء وأهم جزء في الـ Offline Marketing هو التسويق عبر الموبايل، وهو باختصار يعني استخدام الموبايل في الوصول والتسويق للجمهور المستهدف.

 

أهميته تكمن إن دلوقتي كل شخص معاه موبايل سواء كان موبايل ذكي أو موبايل مش ذكي!

 

لما نيجي نتكلم عن التسويق عبر الموبايل، لازم نتكلم عن واحد من أهم الطرق التسويقية على مر العصور وهو الـ Cold Calling أو الاتصال البارد!

 

ومعناها إن شركة أو مسوق لا تعرفه ولا يعرفك، ولكن جاب رقمك من مكان معين، وفجأة تلاقيه بيكلمك وبيحاول يبيع لك منتج معين.

 

عندك كمان الـ Text Message marketing أو الـ SMS، وهي زي الـ Cold Calling بالظبط من حيث الفكرة ولكن بتكون مكتوبة طبعا، وتتفوق على الـ Cold Calling في أنها أكثر فعالية و Scalable أكتر يعني تقدر تبعتها لناس كتيرة مع بعض في وقت قليل جدا.

 

لو انت مسئول عن جزئية التسويق في الشركة، أو ليك كلمة مسموعة في الشركة، والناس هناك عايزين يشتغلوا Offline، رشح لهم وبقوة التسويق عبر الموبايل.

 

وبكده نكون خلصنا الكلام عن الـ Offline Marketing …

 

التسويق عبر الإنترنت (Online Marketing)

من وجهة نظري المتواضعة، اي شغلانة في الدنيا بتبقي عبارة عن: عقلية + معرفة + مهارات.

 

العقلية أو الـ Mindset هو النظام اللي بيوجّه المعرفة و المهارة في إتجاه معين.

 

المعرفة هي اللي بتَثقل المهارة من ناحية الجودة والأداء، و بتخلق الطريقة اللي بيتعمل بيها المنتج النهائي اللي بيخرج منك.

 

المهارة هي اللى مسئولة عن إنتاج المنتج النهائي اللي الناس بتشوفه و بتحكم على المعرفة وعلى العقلية من خلاله.

 

في الدليل الدسم ده، هتكلم عن التسويق عبر الإنترنت أو الـ Online Marketing في كل مستوى من المستويات التلاتة اللى قولت عليهم.

 

نبدأ على بركة الله …

 

قبل ما نتكلم عن العقلية اللي لازم اي شخص شغال او ناوي يشتغل في التسويق عبر الإنترنت يطورها جوه عقله ، لازم نعرف حاجتين مهمين!

 

الحاجة الأولى، هما اللي شغالين في الـ Online Marketing اشتغلوه ازاى او جم منين؟

 

1- ناس كانت شغالة في الـ Offline ومع تطور ظهور الإنترنت في مصر، ونبوغ المجال أكتر، دخلوا مجال الأونلاين.

 

2- ناس سمعت عن المجال، وقالت اجرب حظي، فراحوا أخدوا كورسات وذاكروا واشتغلوا على نفسهم وكملوا في المجال.

 

كل شخص من الشخصين دول، عنده تأسيس أو Foundation في التسويق مختلف عن التاني تماما.

 

تانى حاجة، هو يعني ايه تسويق عبر الإنترنت اصلا؟

 

التسويق عبر الإنترنت يعني التسويق عبر الإنترنت!

 

اه والله!

 

بص عشان نقدر نحط تعريف للتسويق عبر الإنترنت، لازم نحط تعريف للتسويق.

 

ومن غير خناقات وجدال كتير في تعريف التسويق، انا هاقولك تعريف – من ضمن تعريفات التسويق اللى أنا مؤمن بيها – هو التعريف الأكثر مناسبة في السياق اللي إحنا بنتكلم فيه.

 

التسويق هو فن وعلم إكتساب مجموعة محددة من العملاء المحتملين والمحافظة عليهم وزيادة عددهم.

 

إذن التسويق عبر الإنترنت هو فن و علم إكتساب مجموعة محددة من العملاء المحتملين و المحافظة عليهم وزيادة عددهم عن طريق مجموعة من القنوات عبر الإنترنت مثل السوشيال ميديا، محركات البحث، والبريد الإلكتروني، والمواقع الإلكترونية.

 

نرجع بقى لـ مرجوعنا، ونقول ايه الـ Mindsets أو العقليات اللي المفروض اي حد عايز يمتهن أو بالفعل بـ يمتهن التسويق عبر الإنترنت لازم يطورها في دماغه.

 

3 أفكار يجب عليك تبنيها للنجاح في التسويق عبر الإنترنت

 

1- التسويق هو التسويق، الإختلاف في حاجات تانية!

 

سواء انت كنت الشخص الأول، أو الشخص التاني، لازم تفهم كويس أوي إن التسويق هو التسويق، الإختلاف في حاجتين:

 

1- سلوك البشر

2- التكنولوجيا

 

بعد مليون سنة هيكون التسويق هو هو!

 

في كتاب Content Marketing Principles اتكلمت على جزئية تطور سلوك البشر وجزئية تطور التكنولوجيا، وازاى شكل التسويق كان بيتغير حسب تغير سلوك البشر والتكنولوجيا.

 

صحيح التسويق هو هو من حيث الفكرة والجوهر، ولكن شكل التسويق عبر الإنترنت مختلف لأن الوسط مختلف!

 

ده إنترنت يعني تفاعلي، يعني طريق رايح جاي مش طريق رايح بس.

 

الإنترنت غير سلوك البشر فبقوا عايزين يتعلموا ويقروا ويفهموا الأول قبل ما ياخدوا قرار الشراء وكله بفضل جوجل والمحتوى.

 

الخلاصة، عايز تعرف شكل التسويق هيكون عامل ازاى كمان 10 سنين من دلوقتي، توقع شكل سلوك البشر و التكنولوجيا كمان 10 سنين، وعشان تتوقع المستقبل، لازم تشوف وتحلل الماضي.

 

2- مفيش حاجة ببلاش غير العمى والطراش!

 

حقيقي مفيش حاجة ببلاش، عايز تنجح؟

 

انجح وماله!

 

بس ادفع.

 

أحد أهم الخرافات أو الأفكار المغلوطة عند الناس عن التسويق عبر الإنترنت، إنه ببلاش!

 

يا اخوانا التسويق عبر الإنترنت مش ببلاش، ولكن تكلفته أقل من التسويق اللى مش على الإنترنت زي ما وضحنا.

 

الاعتماد على الاورجانيك بس شئ جميل، ولكن لازم يكون فيه توازن مع الجزء المدفوع.

 

التسويق عبر الإنترنت مش طريقة سريعة لتكبير البيزنس، لا ده موضوع عايز دراسة وفهم صحيح للأساسيات وتطبيق بطريقة مبدعة وذكية.

 

3- التسويق عبر شبكات التواصل الإجتماعي مش أهم حاجة في التسويق عبر الإنترنت

 

معظم أصحاب الشركات ومتخذي قرار التسويق في الشركات في مصر، من غير تفكير ولا تحليل بيشتغلوا على شبكات التواصل الاجتماعي وخاصة الفيسبوك الأول، وده غلط 100%.

 

شبكات التواصل الإجتماعي قناة تسويقية، وقرار اختيار القنوات التسويقية ده ليه أصول مش هباء كده!

 

عشان تحدد القناة التسويقية (الـ Marketing Channel) اللى “لازم” تشتغل عليها، فيه شوية اسئلة لازم تجاوب عليها بوضوح.

  • مين الجمهور المستهدف؟
  • موجود فين؟
  • ايه الموراد اللى تملكها؟
  • استراتيجية التسويق اللى شغال بيها

 

الأسئلة دى كفيلة بأنها تخليك تحسم قرار أنهي قناة تسويقية هتعتمد عليها.

 

إذن، على حسب مكان وجود الجمهور المستهدف، هدف الشركة، والموارد اللى تمتلكها، هتختار القناة التسويقية المناسبة.

 

يعني الإختيار مابيكونش على أساس أن الناس كلها بتشتغل على القناة الفلانية، أو لانها الاشهر، فيه شركات عادى جدا مش بتشتغل على الفيسبوك!

 

 

دول كانوا 3 أفكار لازم أي مسوق عبر الانترنت يؤمن بيها ويكون بيفكر في التسويق عبر الإنترنت بالأسلوب ده.

 

ده كان فيما يخص العقلية، ندخل بقي على المعرفة.

 

الفروع الرئيسية لـ التسويق عبر الإنترنت (Online Marketing)

 

التسويق عبر الإنترنت مقسوم لـ 4 أجزاء رئيسية:

 

 

 

1- التسويق عبر المحتوى (Content Marketing)

2- التسويق عبر محركات البحث (Search Engine Marketing)

3- التسويق عبر وسائل التواصل الإجتماعي (Social Media Marketing)

4- التسويق عبر البريد الالكتروني (Email Marketing)

 

كل جزء من دول ليهم جانب Organic يعني مجاني، و جانب Paid يعني مدفوع.

 

نبدأ على بركة الله ^^

 

1- التسويق بالمحتوى (Content Marketing)

 

التسويق بالمحتوى أهم جزء في التسويق عبر الإنترنت، وده مش عشان انا بحب المجال ده جدا وشغال فيه من زمان، إنما عشان من غيره مفيش حاجة من التلاتة التانيين هتشتغل!

 

بإختصار شديد التسويق بالمحتوى هو استراتيجية تسويقية يتم تنفيذها عن طريق عمل وتقديم محتوى عالي الجودة لجمهور مستهدف و محدد بهدف كسب ثقته ودفعه لاتخاذ قرار ربحي بالنسبة للشركة.

 

التسويق بالمحتوى بحر كبير، وتعلمه بالكامل ممكن ياخد منك سنين عشان تقدر تجمع كل خيوطه وتفك شفراته، ولكن انا سهلت عليك الطريق ده عن طريق المقال الدسم ده.

 

التسويق بالمحتوى ذاته جواه أجزاء كتيرة، من أهمها طبعا الـ Content Creation، وأنا عامل كورس مجاني عبر الإيميل عن الموضوع ده.

 

عشان تشتغل في التسويق عبر المحتوى، فيه 27 مهارة أساسية من وجهة نظري لازم تظبط نفسك فيهم.

 

2- التسويق عبر محركات البحث (Search Engine Marketing)

 

التسويق عبر محركات البحث جزء مهم جدا برضو، ومش مهم عشان أنا قولت كده، إنما تعالي نفكر بالعقل كده …

 

دلوقتي أول ما أي حد مننا بيواجه مشكلة معينة أو بيكون عايز يعرف حاجة معينة، بيعمل ايه؟

 

بيجري يروح لجوجل أو أي محرك بحث تاني يساله على حل المشكلة دي، وبالتالي الجزء ده ماينفعش الشركات تستغني عنه إلا فى أضيق الحدود.

 

الجزء ده بعبع لناس كتيرة بسبب إنهم فاهمين إنه كله حاجات معقدة وتكنولوجيا وإن جانب الفن فيه قليل جدا مقارنة بباقي الأجزاء!

 

بس كل الكلام ده مش حقيقة و اوهام، الجزء ده ممتع جدا، بس محتاج شخص صبور ودقيق وبيحب التفاصيل مهما كانت صغيرة، وعنده تفاني في العمل غير طبيعي لإن الموضوع مرهق ذهنيا وبدنيا زي كل فروع التسويق عبر الإنترنت على فكرة.

 

الجانب الـ Organic من التسويق عبر محركات البحث اسمه SEO إختصار لـ Search Engine Optimization.

 

السيو عبارة عن شوية حاجات بتتعمل جوه المواقع الإلكترونية بحيث تظهر في ترتيب معين فى نتائج البحث لكلمة معينة.

 

أما الجانب الـ Paid من التسويق عبر محركات البحث فهو متمثل فى الـ Search Ads اللي هي عبارة عن ترويج لنتيجة معينة من النتائج اللى بتظهر فى قائمة نتائج البحث عن كلمة معينة في جوجل.

 

الإسم الأشهر للنوع ده هو PPC Ads اللى هو Pay per Click ، ويطلق عليه الإسم ده عليه نظرا عن الـ Pricing Model بتاع نوع الإعلانات دي الدفع مقابل الضغط على الإعلان.

 

من المصادر اللي لازم تقرأها لو كنت عايز تتخصص في المجال الـ SEO، هي 6 أدلة مجانيين في غاية البساطة والجمال، وهما:

 

1- Beginner’s Guide to SEO من Moz

 

2- The Advanced Guide To SEO من Quick Sprout

 

3- The Definitive Guide To SEO In 2019 من Backlinko

 

4- A Complete Guide to Getting Started in SEO من Search Engine Journal

 

5- Search Engine Land’s Guide To SEO من Search Engine Land

 

6- SEO Made Simple: A Step-by-Step Guide من Neil Patel

 

السيو بيتجدد وبيتغير بإستمرار، عشان كده لازم ماتكفيش بأنك تقرا الـ 6 أدلة اللي قولت لك عليهم، ولكن تتابع الـ 6 مواقع بصورة مستمرة عشان تطور نفسك بصفة مستمرة.

 

طبعا لو عايز مصادر بالعربي، اكتب في جوجل سيو وهيظهرلك شوية مواقع عربية تقدر تبتدي منها بس الاحسن تبدا بالـ 6 مصادر اللي قولت لك عليهم، أو تشوف حد مشي الطريق قبلك عشان يقصره عليك زي ما انا عملت فى المثال ده.

 

3- التسويق عبر وسائل التواصل الإجتماعي (Social Media Marketing)

 

للأسف التسويق عبر وسائل التواصل الإجتماعي يبان سهل، وعشان كده الشغلانة قربت تكون شغلانة اللي ملوش شغلانة!

 

سبب الإنهيار ده هو الحاجات اللي بنشوفها في المجال ده يوميا من تسعيرات غريبة، وكلام عجيب وغير علمي من ناس كتير!

 

للاسف قليل أوي اللي مدي التسويق عبر وسائل التواصل الإجتماعي قيمته في مصر تحديدا والعالم كله عموما.

 

عدد قليل اوى اللى بيعرف – عمليا – ازاى يخلي الـ Social Media تلعب لصالح الـ Business.

 

الجانب الـ Organic منها، إن المحتوى يظهر بشكل مجاني وسط الـ Feed بتاع الجمهور المستهدف، وده ليه شوية شروط لو اتعملت صح في ظروف صح هتجيب معاك نتائج كبيرة.

 

الجانب الـ Paid منها يسمى بالـ Social Media Ads أو الـ Feed Ads، وهو عبارة عن إن المحتوى اللي الشركة بتعمله يظهر بشكل طبيعي وسط الـ Feed بتاع الجمهور المستهدف.

 

عشان تشتغل في المجال ده، لازم تكون بتحب تتواصل مع البشر، وبتحب تؤثر فيهم ، وبتحب تتعلم وتعلم ، وعندك طولة بال ، وأهم حاجة أهم حاجة تكون بتعرف تسمع!

 

وطبعا لازم تتعلم الأساسيات الصح!

 

دول مقالين كبار حاولت ألم فيهم أساسيات التسويق عبر وسائل التواصل الإجتماعي، الأول بيتكلم في العلم من فوق ، تقدر تقول الـ Foundation اللي من غيره الجزء التاني يضيع واللى هو بيتكلم عن تطبيق وممارسات العلم بشكل عملي.

 

1- أساسيات التسويق عبر وسائل التواصل الإجتماعي (الجزء الأول)

2- أساسيات التسويق عبر وسائل التواصل الإجتماعي (الجزء الثاني)

 

وبما إن الفيسبوك هو أكبر منصة تواصل إجتماعي وأكثرها أهمية بالنسبة للناس في مصر، فالفيسبوك عمل حاجة إسمها Facebook Blueprint وهي عبارة عن مجموعة كورسات مجانية في التسويق عبر الفيسبوك وانستجرام.

 

وأخيرا لو عايز تتعلم اعلانات الفيسبوك على اصولها، اقرا الأدلة اللي بيعملها الناس بتوع AdEspresso بتمعن.

 

4- التسويق عبر البريد الالكتروني (Email Marketing)

 

باختصار التسويق عبر الإيميل هو إستخدام الايميلات بتاعت مجموعة من الناس في التسويق ليهم.

 

وعشان ده يحصل لازم يكون معاك Email List من ناس عارفه وموافقة انك ترسل لها حاجات على الايميل بتاعها، و عشان ده يحصل بدوره لازم تقدم لهم شئ ذو قيمة بشكل مجاني في مقابل إنهم يدوك الإذن ده!

 

زي بالظبط ما انا عملت أما قدمت كورس عمل المحتوى بشكل مجاني، فهمت؟

 

بعد ما بيكون عندك قائمة بريدية محترمة جاية بطرق مشروعة، بتبتدى تبعت لهم محتوى مفيد بصورة مستمرة لحد ما يشتروا اللي انت بتبيعه، وبتفضل مكمل معاهم حتي بعد ما يشتروا.

 

عشان تدخل مجال التسويق عبر البريد الإلكتروني لازم تكون بتعرف تتعامل مع التكنولوجيا ، وبتحب وبتعرف تبيع على الإنترنت.

 

لو عايز تتعلم التسويق عبر البريد الإلكتروني يبقي روح عند Marketo وانت هتلاقي مقالات وأدلة وكتب إلكترونية عن كافة المواضيع اللي ليها علاقة بالتسويق عبر البريد الإلكتروني.

 

….

 

وبكده أكون خلصت كلامي عن التسويق عبر الإنترنت، وأتمنى أكون عند حسن ظنك وفى مرمى توقعاتك وأن يكون الدليل ده فعلا دليل ليك.

 

ازاى تبدا في التسويق عبر الإنترنت؟

 

دلوقتي هجاوب على السؤال ده بطريقة أكثر وضوحا مستعينا بكل اللي اتشرح، فركز معايا الله يبارك لك عشان الكلام كبير.

 

أول حاجة محتاج تعملها تعرف انت مين؟

 

انا عارف ان سؤال انت مين ده ممكن يكون مرهق ومستفز في بعض الاحيان لكتير من الناس، ولكن اهميته تكمن في انه بيخليك تعرف ايه المناطق اللي انت كويس فيها فتعتمد عليها، وايه المناطق اللي انت مش كويس فيها وتقويها، ونتيجة لده بتوصل للى انت عايزه بسرعة.

 

هات ورقة وقلم، واقسم الصفحة نصين، النص الاولاني اكتب فيه الحاجات اللي بتحب تعملها مهما كانت، والنص التاني اكتب فيه الحاجات اللي بتعرف تعملها مهما كان ادائك فيها.

 

هات ورقة تانية، واقسم الصفحة نصين، اكتب في النص الاولاني الطريقة اللي انت بتحب تتعلم بيها، وفى النص التاني اكتب الطريقة اللي انت بتحب تخرج اللي في دماغك بيها.

 

دلوقتي حط الورقتين جمب بعض وبص لهم كتير، وفكر اكتر، وبعدين ابتدى جمع المتشابهات جمب بعض أو اللي ليهم علاقة ببعض جمب بعض.

 

انا عارف ان التمرين اللي فات ده سهل من حيث الكلام، لكن تطبيقه صعب، بس انت اعصر دماغك واسال اللي حواليك لحد ما توصل لحاجة، ولو لاقيت الدنيا ضلمة كملني ونوصل مع بعض لنتيجة حلوة.

 

تاني حاجة انك تشوف أنت هـ تؤدي أحسن في انهي مجال!

 

الموضوع ملوش علاقه بالحب، الموضوع ليه علاقة بأنهي منطقة إنت هتبدع فيها وفقا لـ سماتك الشخصية وده عشان ماتاخدش وقت كبير تايه ومش واصل لنجاح مبدئي في كاريرك.

 

وفقا لنتيجة الورقتين اللي فاتوا، وفى ضوء معرفتك بالمجالات بتاعت التسويق عبر الإنترنت، ابتدى اختار مجال واحد ودوس فيه بقلب جامد من خلال المصادر اللي ذكرتها عند كل جزء فوق.

 

تالت واهم حاجة إنك تشوف ناس في المجال اللي انت اخترته وتتصاحب عليهم، وتستفيد منهم وتتعلم منهم وتناقشهم.

 

وأخيرا كلما تعلمت أكثر، كلما ربحت أكثر.

 

أشكرك لوصولك للنقطة دى، وده إن دل على شئ، فهو يدل على إنك على أول الطريق إنك تكون حاجة عظيمة في المجال بتاعنا ^^

 

 

التصنيفات: Content Marketing

14 تعليقات

عمرو محمد · 2018-02-16 في 3:21 ص

أستاذ / أسامة
بالنيابة عن نفسى وعن كل من استفاد من المعلومات الغزيرة المنشورة على هذا الموقع .. يشرفنى أن أتوجه إليك بجزيل الشكر و عظيم التقدير .. و زادك الله علما و وفقك دائما لما فيه الخير .. و أود أن أستشيرك فى مشكلتى حيث أننى كنت أعمل صيدلانيا لمدة 15 سنة .. و الآن لدى فكرة مشروع صغير للتسويق فى مجال خدمات الرعاية الطبية و الصحية بإستخدام instant messengers مثل الواتساب أو التيليجرام .. و المشكلة هى أننى أبحث عن شريك لتنفيذ ذلك المشروع .. فما هو رأيك ؟ و هل هذا المجال قابل للتسويق فى مصر ؟

    Osama Salah · 2018-02-16 في 6:16 م

    أهلا بيك أستاذ عمرو ^^

    أولا أشكرك جزيلا على الكلام الأكثر من الرائع ^^

    ماقدرش اجاوبك على سؤال هل المشروع قابل للتنفيذ فى مصر ولا لا من غير ما افهم المشروع هيعمل ايه، وساعتها نشوف اذا كانت الناس فعلا عايزة اللى انت هتقدمه ولا لا!

    فى الفترة الحالية صعب اشترك معك كشريك ولكن طبعا يمكن استشارتي فى اي أمر تريد ، وفى إنتظار التفاصيل الخاصة بالفكرة إذا كنت مهتم.

وسام · 2018-03-24 في 3:07 م

المعلومات الكتييييرة اوي دي اكيد مبذول فيها مجهود كبير وحقيقي شكرا انك بتشاركنا فيها

    Osama Salah · 2018-03-24 في 5:43 م

    أشكرك جزيلا يا وسام على كلامك الرائع ^^

Eman Badr Badr · 2018-04-02 في 9:58 ص

شكرا ليك ع المعلومات القيمه فعلا

    Osama Salah · 2018-04-02 في 11:40 م

    أشكرك يا إيمان ^^

ecommercedevelopmentegypt · 2018-05-29 في 11:46 ص

شكرا يا اوس على المقاله دى
يا ريت نتواصل تلفونيا عشان محتاج مساعده منك . انت اللى قولت (ولو لاقيت الدنيا ضلمة كملني ونوصل مع بعض لنتيجة حلوة.)
اتواصل معاك ازاى ؟

    Osama Salah · 2018-05-29 في 12:12 م

    زى ما تحب، إما بالإيميل أو بالتليفون.

    إيميلي osama@osamasalah.com
    رقمي 01142590309

Mody · 2018-09-09 في 7:04 م

بالنسبة لي أصعب جزء في التسويق عبر الإنترنت هو التسويق بالمحتوى .. مش عشان حضرتك ذكرت إنه أهم شيء ولكن لأنه بالفعل عايز مهارة كتابة غير عادية للخروج بمقالة ذات جودة عالية تجذب بيها القاريء أنه مش بس يكملها للأخر وبتركيز شديد .. لأ ده لدرجة أنه يقتنع بيك ويطلب منك شراء أو إمتلاك السلعة اللي بتقدمها .. وده الحقيقة السبب ف إني وصلت لهنا وفعلاً بإرادتي كملت المقال للأخر وبكامل إرادتي هشتري منك الكتب اللي محتاجها بإذن الله هيتم التواصل مع حضرتك قريباً عسى إني أستفيد من علمك ويكون سبب نجاحي في حياتي العملية.

    Osama Salah · 2018-09-11 في 6:17 ص

    الحقيقة يا مودي أنا بشكرك جدا على كتابة التعليق ده بالتفصيل ده، فعلا هيساعدني كتير الفترة اللى جاية، اشكرك وفى انتظار إننا نتقابل داخل الكتب.

gehan Elgazar · 2018-12-27 في 6:06 م

جزيت خيرا علي السلاسه في العرض.. السهل الممتنع.

    Osama Salah · 2018-12-28 في 2:14 م

    أشكرك جدا ^^

Robin · 2019-04-23 في 9:44 ص

I can only imagine how much research has gone into this. I like your writing skills as it makes one feel included in the journey. Thank you for the valuable notes. world expo 2020

    Osama Salah · 2019-04-24 في 1:44 م

    You are welcome ^^

اسال او استفسر او قول رايك ...

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.