fbpx

 

فيه تحديات كتيرة بتقابل المسوقين بالمحتوى سواء المبتدئين أو المحترفين زي:

 

  • تعمل ايه لو ماعندكش خبرة أو معرفة في الموضوع اللي بتكتب فيه محتوى؟
  • ازاى تكتب محتوى يخلي القارئ يكمله لحد الاخر من غير ما يزهق مهما كان المحتوى طويل؟
  • ازاى تكتب محتوى محتوى يبيع أي منتج أو خدمة بطريقة سلسلة بدون تكلف؟

 

وغيرها كتير.

 

في المقال ده انا هشارك معاك 11 تحدي أو مشكلة بتقابل المسوقين بالمحتوى، وهقولك ازاى تتعامل وتحل كل تحدي أو مشكلة منهم.

 

يلا نبدأ …

 

1- تعمل ايه لو ماعندكش خبرة أو معرفة في الموضوع اللي بتكتب فيه محتوى؟

 

متعملش محتوى في موضوع انت مش فاهم فيه، ولو اضطريت لده، اختار فكرة المحتوى اللي تقدر تحولها لمحتوى محدش من المنافسين يقدر يعمل زيه.

 

مش شرط خالص تؤلف محتوى جديد من دماغك، ممكن تروح تسأل الموظفين المختصين واللى فاهمين في الموضوع اللي عايز تعمل عنه محتوى، وتاخده وتصيغه وهيكون اقوي من اللي انت هتعمله.

 

ممكن تشوف محتوى معمول بالفعل ومحقق نتائج كبيرة، وتاخده وتعمل محتوى أطول وأكبر منه، بتفاصيل أكتر أو تكتب عن نفس الموضوع من زاوية مختلفة.

 

ماتقولش معلومة مش هتعرف تكملها لحد الاخر، وما تسألش سؤال مش هتعرف تجاوبه احسن من اي حد.

 

متقدمش إحصائية أو رأي من غير ما تكتب جمبه المصدر، وما تاخدش كلام حد إلا لو هتقول إن ده كلامه وانت بتحلله أو بتقول تعليقاتك عليه.

 

فكر بطريقة بديهية!

 

الناس كلها مقتنعة ان البديهي بيكون متوقع، لكن انا شايف عكس كده تماما، البديهي عمره ما كان متوقع!

 

عندك مثلا واحد زي الشيخ الشعراوي رحمة الله عليه، كان بديهي جدا في تفسيره، و انا مابقولش كده دلوقتي لاني فهمت اللي هو شرحه بأسلوبه البسيط وبالتالي بقي بديهي ، لا فعلا هو كان بديهي جدا.

 

البديهي يكسب في المحتوى، اقولك ازاى؟

 

تخيل انك عايز تعمل قطعة محتوى عن طريقة عمل صنية البطاطس، تعالى سوا نتخيل ازاى هنعمل صنية البطاطس، عشان تعمل الـ Outline بتاع قطعة المحتوى.

 

مثلا هتقولي انزل السوق اجيب الحاجات، بعد كده مرحلة الغسيل و التنظيف، ثم التقشير والتجهيز، التقطيع، النار، التوابل، وقول وقول!

 

الحاجات دى بديهية لاي ست بتعرف تطبخ أو أي راجل بيعرف يطبخ، وأنا اللي مش بعرف أطبخ، قدرت اعرفها واعمل قطعة محتوى متكاملة من غير ما تاخد مني وقت كبير في عمل Research، ولا اني اجيب افكار.

 

في أقل من دقيقة بقى عندي كل ده، بس اما شغلت البديهة.

 

ومن غير ما اكون خبير خد بالك.

 

2- ازاى تكتب محتوى للزبون المستهدف بالظبط؟

 

انا دايما بقول ان الاستهداف كذا مستوي، استهداف الاداة نفسها زي اعلانات الفيسبوك، جوجل الخ، واستهداف المحتوى نفسه.

 

من أول سطر في قطعة المحتوى أو حتى من العنوان لازم ناس تكمل وناس تمشي، لان المفروض المحتوى بتاعك معمول لناس معينة مش لكل الناس، وناس معينة اقصد حد بعينه مش 3 أو 4 حدود مع بعض!

 

عشان كده قبل ما تكتب سطر واحد من المحتوى لازم تكون عارف وفاهم المشكلة اللي الزبون بيدور على حلها.

 

وده تعرفه عن طريق الكلام مع الزبون بشكل مباشر أو عن طريق إجراء استطلاعات رأي أو عن طريق مراقبة وتحليل التعليقات على السوشيال ميديا.

 

مينفعش تكتب محتوى وانت مش محددة شريحة واحدة بس توجه لها المحتوى.

 

أي محاولة منك لكتابة محتوى عام أو لأكتر من شريحة، المحتوى هيطلع وحش جدا حتى لو انت شاطر وموهوب.

 

وانت بتكتب المحتوى حاول تكون بسيط وصدوق، يعني بلاش الاسلوب الصحفي، وبلاش اسلوب المدرسين، اكتب بطريقة سلسة سهل تتفهم.

 

ماتخليش اللي بيقرا يحس إن فيه حد قاصد يقول له حاجة بعينها، اكتب بطريقة طبيعية.

 

شيل من دماغك فكرة إنك لازم تبيع له، أو لازم تقنعه، قدم له المعلومات اللي هتخليه مقتنع إنه يشتري بتسلسل طبيعي من غير تكلف.

 

فهمت؟

 

3- ازاى تخلى اى حد يقرا المحتوى بتاعك يتفاعل معاه؟

 

وانت بتكتب المحتوى، بلاش تبقى فيلسوف ومعقد، الكلمات البسيطة أفيد من الكلمات المعقدة، البسيط الناس بتحبه، أما المعقد الناس بتهرب منه لانهم مش فاهمين هو بيقول ايه.

 

هدف أي محتوى إنه يتقرا وان الناس تقتنع بالفكرة اللي بتقدمها كخطوة أولى للاقتناع بإنهم يشتروا منك، أي حاجة تانية مش مهمة، انت مش مترشح لجائزة الصحافة العالمية ولا هتاخد جايزة نوبل في الأدب.

 

الأستاذ الدكتور أحمد خالد توفيق بيقول:

 

“إن التحذلق بحر لا ينتهي ولا يجف أبدًا. أذكر أنني كنت في ندوة لأديب شهير، واستضاف ناقدًا كبيرًا، ألقى محاضرة طويلة قاتلة عن منهج جديد للنقد، أطلق عليه (الخارطة الجينية للإبداع).

 

هلل له الموجودون وصفقوا. لم أفهم الكثير مما قال لأنني غبي، فاتصلت بأغلب من حضروا الندوة لأستزيد من علمهم. لم أجد واحدا قد فهم ما يريد الرجل قوله.

 

اتصلت به هاتفيًا وقلت له في بلاهة:

 

– أنا فلان. كنت أريد أن أعرف تفاصيل منهجك في النقد بالخارطة الجينية.

قال في برود: – أي خارطة؟

– الخارطة الجينية للنقد.

– هل أنت متأكد من أنك اتصلت برقم صحيح؟

 

وضعت السماعة وأدركت أن الرجل هو نفسه لا يعرف حرفًا عما قاله لمدة ساعة في الندوة. لكن العنوان رهيب ويجمد الدم في العروق، ويشعر من لم يفهمه بأنه هو الغبي. “

 

ثم ينصحك وينصحني، فيقول:

 

“عندما تقابل شخصًا يقول لك: “إن هذه الأنطولوجيا التي كتبها فلان تنبعث من رؤية بانورامية للمدينة الكوزموبوليتانية. برغم ما فيها من شوفينية واضحة وما يتميز به الكاتب من ديماجوجية، فإنها يمكن أن تكون هرمينوطيقا متكاملة تمتاز بالكثير من الابستمولوجية”.

 

عندما تقابل هذا الشخص فعليك أن تفر منه فرارك من الأسد. أنت – بلا فخر – في حضرة شخص متحذلق لا يمكن التعامل معه أبدًا. أنت في مأزق حقيقي.”

 

فهمت؟

 

4- ازاى تعمل خطة محتوى لأي قناة تسويقية في أقل من ساعة؟

 

خطة المحتوى فيها عناصر كتيرة بس أهم 3 عناصر هما:

 

الزبون المحتمل، وأفكار المحتوى، والقناة اللي هينزل عليها المحتوى.

 

لو عملت خطة محتوى فيها العناصر التلاتة دي بس، اوعدك إن المحتوى اللي هيطلع منك أحسن من المنافسين حتى لو عندهم أحسن واحد بتاع خطط.

 

أي منتج أو خدمة – في رأيي – عبارة عن مجموعة من الحلول اللي بتحل مشاكل معينة عند الجمهور المستهدف.

 

حدد شريحة واحدة بس تكتب لها المحتوى، حدد منتج أو خدمة واحدة بس عشان تبيعها ليهم، طلع أكبر عدد من الأفكار اللي تساعدك تشرح كل حل بيقدمه المنتج لكل مشكلة بيعاني من الزبون.

 

اكتب وانشر.

 

5- ازاى تخلى عدد كبير من الناس تشوف المحتوى بتاعك؟

 

انت كتبت محتوى عالي الجودة ومفيد، ولكن عدد قليل شافه وتفاعل معاه، تفتكر هيكون له تأثير كبير؟

 

أكيد لا.

 

عشان كده لازم زي ما بتهتم بكتابة المحتوى، تهتم بتوزيع وترويج المحتوى.

 

اعرف اكتر عن توزيع وترويج المحتوى

 

6- ازاى تكتب محتوى يحقق مبيعات بطريقة سلسة بدون نفاق أو تكلف؟

 

كتابة المحتوى اللي يبيع صعب جدا، نظرا لأن الموضوع متشابك وبيدخل فيه عوامل نفسية كتيرة، سواء من اللي بيكتب أو من المشتري.

 

ولكن انا سهلت عليك الموضوع من خلال معادلة مجربة لكتابة محتوى يبيع بدون تكلف أو نفاق.

 

دوس هنا لتعلم طريقة كتابة محتوى يبيع خطوة بخطوة

 

7- معنديش افكار أكتبها! (الطريقة المثلى لكتابة محتوى غني بالأفكار)

 

يمكن أكبر مشكلة بتواجه المسوقين بالمحتوى هي قلة أفكار المحتوى، وفيه استراتيجيات كتير لعلاج الموضوع ده، لكن انا شايف إن الحل النهائي يكمن في اللي هقوله حالا.

 

انت شوال.

 

انا اسف والله مقصدش!

 

بس حضرتك فعلا شوال.

 

اصحى كل يوم الصبح وقول لنفسك انا شوال، هاعبي ايه النهاردة وهافضي ايه؟

 

انا عن نفسي بعمل كده، بقرا كتير في مجالات يمكن ماتخطرش على بالك، عشان اما اجى اعمل محتوى الاقي مليون فكرة ومليون طريقة اعبر بيها عن المحتوى اللي بعمله.

 

وكمان عشان اقدر احط نفسي مكان العملاء بتوعي اللي هما بخلفيات مختلفة واهتمامات مختلفة.

 

أصلا مش هتكتب حلو الا اما تقرا حلو لكل الناس الحلوة!

 

بصوا بقي، في مصر إحنا متخصصين إننا نبدأ من الصفر ونعيد إختراع في ام العجلة، ماعرفش ليه بيحبوا العجلة في مصر!

 

انت ليه تبدأ من النقطة اللي انت واقف فيها؟ ما تبدأ من أخر نقطة حد وصل ليها!

 

لسه مش فاهم؟

 

اعمل قايمة قصيرة من 5 كتاب أو صانعي محتوى انت بتحبهم جدا، و روح اقرا لهم كل حاجة عملوها، و شوفهم وهما بيتكلموا عن طرقهم واساليبهم، و خد اللي بيقوله وطبقه عليك بس بظروفك أنت ولمستك انت.

 

وهنروح بعيد ليه؟!

 

انا اول ما بدات مجال الـ Content Marketing، روحت جريت على نيل باتل و Hubspot و Content Marketing Institute ومن بعدهم Copy Blogger، اللي هما 4 عمدان قوية جدا في العلم ده في العالم كله.

 

ومسكت شركة شركة منهم ودرستها كويس و قريت تقريبا كل حاجة مهمة اتعلمت عندهم من ساعات ما بدوا في 2007 لحد 2014 (ساعتها يعني)، ومن ساعتها بقيت متابعهم وبشوف كل جديد بيعملوه.

 

ونتيجة لده، بقي عندي ميزة رهيبة وهى انى عارف اصل الاستراتيجيات اللي هما شغالين بيها وبمجرد ما أقرا عنوان أي قطعة محتوى هما بيعملوها بقيت اعرف محتواها هيكون ايه والـ Call to Action هيكون ايه كمان.

 

ماتحاولش تقلد اي حد في عمل المحتوى، ذاكر اللي بيعمله كل الناس، وحط عينك على الـ Patterns، واستخدمها في عمل المحتوى بتاعك.

 

لو مابتقراش مش هتعرف تكتب، ولو مش بتتعلم ولا بتطور نفسك باستمرار مش هتعرف تشتغل.

 

8- ازاى تعمل المحتوى اللي يجيب نتائج (ثقة، تفاعل، Leads، ترافيك … الخ)؟

 

التسويق بالمحتوى مش هيجيب نتيجة لو متعملش بشكل استراتيجي ممنهج، طب يعني ايه تعمل محتوى بشكل استراتيجي ممنهج؟

 

فيه حاجة عندنا في عالم الـ Content Marketing اسمها Sequential Content.

 

الـ Sequential Content ده عبارة عن سلسلة أو قطع محتوى مرتبة في تسلسل واضح بهدف الوصول بالعميل من نقطة لنقطة أخري.

 

التعريف من دماغي لإن محدش بيتكلم على المحتوى اللي بالشكل ده حتي اللي بيعملوه!

 

دلوقتي العميل واقف عند النقطة أ، وانت عايز توديه للنقطة ب، عشان يروح من النقطة أ للنقطة ب لازم يمر بمحطات معينة.

 

كل محطة تعتبر قطعة محتوى، مطلوب منك تعمل محتوى مترابط متسلسل توصل بيه العميل للمكان اللي هو عايزه.

 

مثال، شركة توزيع موبايلات، العميل عايز يشتري موبايل، يبقي تعمل سلسلة محتوى متسلسل من اول يعني ايه موبيل والمفروض يبص على ايه ومايبصش على ايه، وازاى يعرف ان السعر كويس ولا مبالغ فيه، وكل التفاصيل اللى تؤهله إنه يشتري موبايل وهو متطمن.

 

لو عملت كده يبقي انت كسبت ثقة العميل، والبيزنس بتاعك اكتسب Authority (الملك)، وبنسبة تتعدى الـ 90% هيشتري منك انت.

 

9- ازاى تكتب محتوى يشجع الناس على إنهم يكملوا للآخر ويعملوا اللي بتطلبه منهم (اتصال، تفاعل، شير، شراء، دوسة على لينك معين … الخ)

 

عنوان المحتوى لازم يعمل حاجة واحدة بس، وهي: يخلي الناس تهتم إنها تقرأ المحتوى كله، وده ليه طرق كتيرة. (اعرفها من هنا)

 

وهدف كل سطر في المحتوى إنه يخلي الناس تكمل السطر اللي بعده، أيوة يعني اعمل ايه؟

 

اعتمد على أسلوب “الكلمات التسلسلية”.

 

أسلوب “الكلمات التسلسلية” أسلوب انا بستخدمه وهو من ابتكاري.

 

مفيش حاجة اسمها كده!

 

الأسلوب ده بيقول إن كل كلمة مؤدية لما بعدها، وكل جملة تؤدي لما بعدها، وكل فقرة بتكون جزء من الصورة اللي عايز يرسمها المحتوى ككل.

 

الأسلوب ده بيخلي اللي بيقرا يحس إنه شايف صورة متحركة قدامه، وده لإني بصور له الكلام عن طريق إني بخليه يحس إني بحكي له حدوتة.

 

وبالتالي بيقعد وقت كبير جوه الموقع، ودي إشارة لجوجل إن المحتوى بتاعي Likable أو الناس بتحبه.

 

 

الأسلوب ده تفاعلي جدا يعني تحس إن قاعد بتكلم معاك، وده بيضيف متعة لعملية التعلم.

 

وده بيخلي الناس ترجع مرة تانية عشان تشوف المحتوى الجديد.

 

عشان تعمل كده تخيل إنك بتكتب لشخص واحد بس، والشخص ده قاعد جنبك.

 

الطريقة دي بتضمن أن المحتوى يكون متسق وليه علاقة بالفكرة الرئيسية، ومفيهوش حرف ملوش لازمة.

 

10- اعمل Research مكثف و دقيق لو عايز تخلي المحتوى بتاعك فريد من نوعه ومختلف

 

لو قالوا لك تشتغل ايه لو مش هتشتغل في كتابة المحتوى، قول لهم هشتغل Google Researcher وده ببساطة لان ¾ يومك انت بتعمل Research على جوجل، ودى الطريقة الوحيدة للتأكد أن المحتوى بتاعك مميز ومفيش حاجة زيه.

 

انا شخصيا بدخل لحد الصفحة 20 و 30 في جوجل عشان اتاكد أولا من صحة المعلومة اللي بقولها حتى لو متاكد منها 100%، وثانيا عشان اجيب افكار محدش بيتكلم عنها، وثالثا عشان اكتب بثقة وده الفرق بين أي محترف في كتابة المحتوى وهاوى مكسل مستعجل.

 

كل يوم بيجيلى أسئلة من نوعية معنديش افكار، مش عارف ألاقي أفكار أكتبها، و ردي على الناس دي بيكون دور كويس وفى مصادر مختلفة.

 

جوجل عندها في الإرشيف بتاعها مئات المليارات من صفحات الويب اللي فيها محتوى، متخيل الرقم؟!

 

مصر فيها بتاع 35 مليون نفر بيعمل محتوى على الفيسبوك، بقي معقول من الملايين دوي مش هتلاقى فكرة تنفع للموضوع اللي بتتكلم عليه؟!

 

ودى مصر بس، شوف باقي المليار وشوية اللي على الفيسبوك بمختلف اللغات والبلدان، دول يطلع منهم أفكار قد ايه؟

 

ادخل جوجل واكتب الموضوع اللي انت عايز تتكلم عنه بكل اللغات، وجمع أفكار من اللي هتشوفه، وبلو رفيه جلمة ولا فقرة عجبتك، مفيش مانع حطها دلوقتي في الفايل اللي شغال عليه.

 

كمان ممكن تدور في الكتب، وممكن تدور في الفيسبوك.

 

أوعي تعمل زي المبتدئين وتدور بكلمة واحدة بس، دور بكلمات مختلفة.

 

خد كل فكرة من اللي معاك ودور بيها هتجيب أفكار تانية كتير.

 

اعمل Outline للمحتوى قبل ما تكتب حرف واحد، ده لو عايز تعمل محتوى عبقري في وقت قليل.

 

انت كده معاك عنوان قطعة المحتوى، والمقدمة، والخاتمة، والـ Call to Action، ناقص بس تكتب قلب المحتوى اللي هتشرح فيها المشاكل بالتفصيل وهتقدم فيه الحلول بكافة تفاصيلها، وبكده عملت محتوى عالي الجودة فعلا وفى وقت قليل.

 

ملحوظة: للاستفادة القصوى من النصائح العملية الموجودة فى المقال ده، لازم تقراه على الأقل مرة كل يوم لمدة أسبوع.

 

الخطوة اللي بعد كده؟

 

عندى ليك طلب شخصي جدا، انت أكيد متابع جيد، وأكيد – بنسبة كبيرة – اخدت كورس كتابة المحتوى خطوة بخطوة اللى انا عملته على الايميل، ممكن تبعت لى المحتوى اللى عملته قبل الكورس، وبعد الكورس …

 

أما لو لسه ماخدتش الكورس، مفيش مشكلة، الكورس هيوصلك بشكل مجاني تماما.

 

اكتب الاسم الاول ليك يعني لو محمد حسن، يبقى محمد، واكتب ايميلك، واكتب رقم تليفونك.

 

 

لو عندك اي استفسار او سؤال بتدور على اجابة عليه بقالك فترة، اكتب لى كومنت وانا هرد عليك بنفسي …

 

التصنيفات: Content Marketing

0 تعليق

اسال او استفسر او قول رايك ...

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.