ملحوظة: هذا المقال عبارة عن شابتر مجاني من كتاب Content Marketing Principles، تقدر تحصل على الكتاب كامل من خلال اللينك ده.

 

محتاج ايه عشان تكون مسوق بالمحتوى محترف؟

 

1- معرفة أساسية

2- مهارات حرفية

 

أما تتعلم المعرفة الأساسية، وتتقن المهارات الحرفية اللازمة لتنفيذ المعرفة، بتتطور عندك حاجة تالتة وهي الحس الفني اللي إحنا بنقول عليها الخبرة.

 

في المقال ده هنتكلم عن المهارات اللازمة عشان تكون مسوق بالمحتوى محترف.

 

وهنتكلم عن المهارات دي باستخدام مفهوم اسمه T Shaped Skills.

 

يلا بينا …

 

يعني ايه T Shaped Skills؟

 

مسوق بالمحتوى

 

عبارة عن مجموعة من المهارات العامة، والمهارات الخاصة التي يحتاجها الفرد لإتمام مهمته على أكمل وجه.

 

دلوقتي هقولك على 27 مهارة حرفية لازم تتقنها لو عايز يبقي ليك شأن في مجال التسويق بالمحتوى.

 

إتقان المهارات دي مش بيحصل في يوم وليلة، إنما ملاحظة وممارسة مستمرة.

 

مجال التسويق بالمحتوى مش صعب، بس مش سهل، الموضوع محتاج مذاكرة وممارسة وتوجيه كتير.

 


المهارات العامة للمسوق بالمحتوى


 

1- الإستماع (Listening)

 

فيه فرق بين إنك تسمع، وإنك تستمع.

 

بالانجليزي تسمع يعني Hear إنما تستمتع يعني Listen.

 

الاولانية Physiological، والتانية Psychological.

 

المطلوب إنك تستمتع مش تسمع.

 

كلمة اسمعك، تحسها كده طبيعية مفيهاش جهد!

 

إنما أستمع ليك، ايوة ليك انت، أنت بالذات، يعني هاعمل مجهود إضافي عشان اسمعك، لانى مهتم بيك.

 

الـ Listening بيترجم نفسيا عند اللى بيتكلم إن الشخص اللى بيسمعه ده مقدر مشاعره ومتفهم وضعه وقرارته و مهتم بيه.

 

وده اللي المفروض أي مسوق بالمحتوى محترف يعمله، يسمع بانصات كلام الزبون المحتمل، ويحسسه انه مهتم، عشان يقدر يحل له المشكلة اللي بيعاني منها أو يشبع له الرغبة اللي عنده.

 

طب و ده اعمله ازاى؟

 

دّرب نفسك عليه.

 

أي كومنت، رسالة، ايميل، مكالمة تليفونية، كومنت في جروب، كومنت في موقع، Review في موقع ما، أي كلام يقوله الزبون في أي مكان على الانترنت لازم تسمعه وتكتب ملاحظاتك عنه.

 

** الناس اللي بتسأل في موقع Quora و موقع Reddit و موقع أمازون وأي موقع لبيزنس زي البيزنس بتاعك بس أجنبي، هما يعتبروا اعتباريا الجمهور المستهدف بتاعك، روح هناك وشوف هما بيقولوا ايه على المنتجات الشبيهة، ولا رايكم ايه في موضوع المحتوى اللى انت هتعمله **

 

كل البشر بيعانوا من نفس المشاكل وعندهم نفس الرغبات، مع اختلاف النهج اللي بياخده كل منهم عشان يحل المشكلة ويشبع رغباته.

 

مهارة الاستماع من أهم المهارات اللي بتحدد ما إذا كنت هتنفع تبقى مسوق بالمحتوى ولا لا، وبتحدد إذا كنت هتكون من المحترفين ولا هتفضل على قد حالك طول العمر.

 

2- الشرح (Illustrating)

 

أينشتاين بيقول “إذا لم تستطع شرح فكرتك لطفل عمره 6 أعوام فأنت نفسك لم تفهمها بعد”.

 

أنت كمسوق بالمحتوى لو قالوا لك تشتغل إيه غير إنك تكون مسوق بالمحتوى، لازم تقول لهم اشتغل مدرس.

 

طب ليه؟

 

اصلك مُعلم ومٌتعلم، وظيفتك تشرح للجمهور معلومات بطريقة بسيطة تتفهم.

 

فلو انت مش بتعرف تشرح، هتلاقي مشكلة في مجال التسويق بالمحتوى، ولكن ده مش معناه إنك تسيب المجال وتمشي، لا، خلي عندك مثابرة، اتعلم.

 

هات صحابك واختار موضوع ما وحاول تشرح ليهم بحيث يكون مفهوم بالكامل بالنسبة لهم.

 

هات اخواتك الصغيرين والكبار وحاول تشرح لهم موضوع ملوش علاقة باهتماماتهم مرة وليه علاقة باهتماماتهم  مرة تانية وشوف هيفهموا اللي هتقولوا ولا لا.

 

مهارة مهمة وبيترواح فيها المسوقين بالمحتوى من وحش، لكويس، لجامد.

 

هو كل الأساتذة زي بعض؟!

 

3- ازاى تتعلم (Learning)

 

أثمن مهارة عندك هي أنك تكون بتعرف تتعلم.

 

إحنا في عصر المعلومات، والمصادر كتيرة، واللى المفروض تتعلمه أكتر وأكتر، واصلا انت مطلوب منك أنك تعلم الناس، ومش هتعرف تعلم الناس إلا أما تكون بتعرف تتعلم.

 

انت معلم ومتعلم.

 

لازم تتعلم ازاى تتعلم.

 

ده كورس مجاني من منصة رواق مهم في الجزئية دى. 

 

كونك بتعرف تتعلم ازاى، ده بيفتحلك سكك ماكونتش تتصور انها في يوم ممكن تفتتح، بيخليك مميز وسط أي مجموعة كانت.

 

المهارة دى من أهم المهارات اللي لازم تكون موجودة عند المسوق بالمحتوى المحترف، وده لاننا بنكتب محتوى تسويقي في مجالات كتير، ولازم نكون فاهمين في المجالات دي، فلو مش بنعرف نتعلم وبسرعة، هنقع بسرعة.

 

وكمان عشان الشخص اللي بيعرف يتعلم لوحده، ده كنز بالنسبة لأي شركة، لانه دايما هيطور نفسه.

 

4- التعاطف الفكري (Empathy)

 

أنا بحب فلان، أنا مرتاح لفلان، أنا بثق في فلان، أنا بحب أتكلم مع فلان، أنا هاروح أشكي لفلان، أنا هاحكي لفلان، فلان ده هو الوحيد اللى هيسمعني.

 

السبب؟

 

حاجة إسمها الـ Empathy، وترجمتها الحرفي التقمص العاطفي أو التعاطف (التعاطف مش الشفقة).

 

التقمص العاطفي يعني القدرة على فهم مشاعر وظروف الأخر من وجهة نظره هو، يعني فهم وتقدير ظروف الغير لان ممكن في يوم أكون مكانه.

 

فيه ناس كتير بتبص للأمور من منظورها الشخصي بس، وبتهمل متعمدة أو غير متعمدة وجهة النظر الأخرى، أو بمعنى أدق ما بتعرفش تحط نفسها مكان الناس التانية ودايما بتفكر فى نفسها وبس.

 

الحل بسيط لكنه مش سهل، حط نفسك مكان الآخر، اعتبر نفسك مكانه قبل ما تحكم عليه، قبل ما تلومه، قبل ما تتخانق معاه، اخلع نظارتك وألبس نظارة الآخر.

 

مفيش حاجة إسمها الزبون ده غبي، أو الـ Fans دول أغبية وهيشلوني!

 

الناس دى عندها مشاكل وأنت اللي قررت بمحض إرادتك أنك تتدخل وتحلها، يبقى تصبر وتحاول تتفهم موقفهم ودوافعهم عشان تقدر تبيع لهم.

 

المهارة دى هتخليك توصل لأكتر من ¾ فعالية المحتوى قبل ما تبدا تعمله أصلا!

 

ليه؟

 

انت عارف الزبون بتاعك كويس، عارف هو عايز ايه، ومتفهم هو عايزه ليه، وبالتالي هتقدر تقدم له اللي هو عايزه، وده المطلوب.

 

5- التبسيط (Simplifying)

 

انت ممكن تشرح موضوع المحتوى، ولكن تاخد وقت كبير جدا في شرح اللي انت عايزه!

 

أو تسحب كهربا زيادة من مخ المتلقي، أو تخليه يبذل مجهود كبير عشان يفهم اللي انت عايزه!

 

صحيح في الاخر انت شرحت اللي عايز تقوله ولكن هل دي احسن طريقة؟

 

التبسيط هو الإجابة.

 

البساطة هي أنك تشيل كل الحاجات اللي مش ضرورية، كل حرف وكل كلمة لا تؤدي غرض.

 

فيه ناس فاكرة إن كل ما تحط معلومات كتيرة عمال على بطال في قطعة المحتوى تبان مبهرة، و لكن ده غلط تماما!

 

الناس دلوقتي مش عايزة تنبهر، الناس عايزة حاجة تنجز، حاجة تقول لهم يعملوا ايه في الوقت المناسب في الظرف المناسب.

 

ودى تتعلمها ازاى؟

 

إجبر نفسك انت تعبر عن كل موضوع بتعمله في تويتة واحدة، وإن ماقدرتش يبقى تحاول مرة واتنين وتلاتة.

 

كل قطعة محتوى بتعملها هي عبارة عن شوية أفكار، كل فكرة منها لو قدرت تعملها في تويتة هتوصل لأكبر قدر ممكن من التبسيط.

 

بس خد بالك الحج اينشتاين بيقولك ” ينبغي أن نبسّط كل شيء بقدر الإمكان، ولكن دون أن نفرط في تبسيطه “.

 

اتفرج على الدحيح وشوف هو ازاى كصانع محتوى بيبسط العلوم والمواضيع اللي بيتكلم عنها.

 

6- الإبداع (Creativity)

 

هو الإبداع مهارة؟

 

اه مهارة، وطالما مهارة يبقى ينفع نتعلمها.

 

طب هو يعني ايه إبداع أصلا؟

 

الـ Creativity هي عمل روابط جديدة بين أشياء قديمة، عشان في الأخر تظهر حاجة جديدة تماما، أو يعني زي ما قال ستيف جوبز Connect the dots …

 

الفكرة مابتجيش من فراغ، بيكون فيه شوية حاجات قديمة، وفيه حد بيشوف اللي محدش عارف يشوفه، بيتكشف روابط بين الأشياء محدش قادر غيره يشوفها، وبناء عليه بيطلع بحاجة مبتكرة جديدة، هي دى الـ Creativity.

 

7- مهارة الاستقراء

 

القدرة على رؤية سيناريوهات المستقبل، والقدرة على استنباط وفهم طبيعة الأمور سريعا، والقدرة على التحليل والتجميع والخروج بنتيجة سريعة أقرب للصواب هي دى مهارة الاستقراء.

 

عشان تتعلم المهارة دى، فأنت لازم تدرس أسواق كتيرة ، وصناعات مختلفة، وتحاول تفهم عوامل النجاح والفشل في كل صناعة، ومرة مع مرة هتتطور المهارة دى عندك.

 

طب والمهارة دى مفيدة في ايه؟

 

المهارة دى هتخلى المحتوى اللي طالع منك يحمل أهم صفة الشركات بتجري وراها وهي صفة الـ Authority.

 

8- الإقناع (Persuading)

 

انت راجل بتاع تسويق في المقام الأول، لو ماعندكش ملكة الإقناع بالحجة والمنطق والعاطفة، يبقى هتعاني لحد ما تتطور المهارة عندك.

 

لازم تقرا كتاب Influence للدكتور Robert Cialdini.

 

9- مهارة السؤال الصح

 

التعليم الكويس مش اللى يعلمك إزاى تجاوب على الأسئلة صح، إنما اللى يعلمك تسأل الأسئلة الصح.

 

الجملة اللى فاتت دى هي معيار الحكم – من وجهة نظري – على أي تعليم أيا كان فين، معيار الحكم على جودة أي كتاب بقراه، أى مقال بتعلم منه حاجة أو أي فيديو بتفرج عليه، أو أي كورس باخده.

 

أصل لو التعليم هيخليك تجاوب على الأسئلة صح، يبقى أنت هتحفظ لا محالة، هتضطر تحفظ مواقف بعينها عشان تعرف تجاوب، إنما لو التعليم هيخليك تسأل الأسئلة الصح فأنت هتتعلم ازاى تفكر وإزاى تاخد قرار فى موقف ربما ماشوفتش قبل كدة!

 

المسوق بالمحتوى المحترف فاهم مش حافظ، عارف أي كان الوضع، ايه الاسئلة اللى لما تتسأل، كل حاجة تبان والموقف يتحل.

 

10- مهارة حل المشكلات

 

اقرأ Case studies على قد ما تقدر، وادخل فى تجارب مختلفة ومتنوعة.

 

لو عملت كده مع الوقت، هتلاقي نفسك قادر على حل أي مشكلة بتشوفها ولا سيما مشاكل العملاء بتوعك.

 

11- القيادة (Leadership)

 

أكيد مش هتفضل طول عمرك في المستوى التنفيذي، اكيد هيجي يوم عليك وهتكون Chief Content Officer أو مسئول عن إدارة فريق المحتوى في الشركة.

 

وحتى لو انت لسه في المستوى التنفيذي، فـ مسئوليتك أنك تطلع بمحتوى من جميع أفراد جوه الشركة، وده يتطلب مستوى معين من القيادة.

 

للاسف مش هاقدر أقولك تتعلمها ازاى، ولكن أؤكد لك أنك ممكن تتعلمها.

 

اتفرج على الفيديو ده 

 

12- مهارات التواصل الفعال (Communication Skills)

 

انت كمسوق بالمحتوى مش بس بتتواصل مع الجمهور المستهدف بتاعك، إنما بتتواصل مع فريق عمل مختلف عنك في السمات الشخصية والمهام الوظيفية، وكمان بتتواصل مع المديرين، وده بيتطلب مهارات عالية في التواصل.

 

حتى لو انت شغال فرى لانسر ومش معاك تيم، فلازم أكيد هتتواصل مع العملاء.

 

أيا كان فمهارات التواصل السليم مكون أساسي من مكونات المسوق بالمحتوى المحترف.

 

 

دول كانوا 12 مهارة عامة لازم تتوفر فى المسوق بالمحتوى المحترف، ولو عندك قصور في مهارة منهم، مفيش مشكلة، اتعلمها.

 

يلا بينا نعرف المهارات الخاصة للمسوق بالمحتوى …

 


المهارات الخاصة للمسوق بالمحتوى


 

1- الكتابة (Writing) 

 

الطبيعي عند اي مسوق بالمحتوى هو الكتابة، فلو انت مش عارف تكتب، يبقى عندك مشكلة كبيرة اوى فى مجال التسويق بالمحتوى.

 

الكتابة أكيد موهبة، ولكنها مهارة برضو، وكمان علم.

 

طالما هى مهارة يبقي ينفع تتعلمها، وطالما علم يبقي ينفع تدرسه، ونتيجة إتقان المهارة، والمعرفة القوية بالعلم هتتولد عندك الموهبة والحس الفني.

 

انا عامل كورس عن طريق الإيميل في موضوع كتابة المحتوى، والكورس بالرغم من قيمة العالية اللي تعدي 1000 جنيه، إلا إنه مجاني.

 

أعتقد إنك اخدته، ولو ماخدتوش مفيش مشكلة …

 

دوس هنا للتسجيل مجانا فورا.

 

2- الكلام قدام العامة (Public Speaking)

 

من أهم أنواع المحتوى هو الفيديو، وأكتر حاجة مانعة المسوقين بالمحتوى من الاعتماد على الفيديو هي ضعف مهاراتهم في الكلام قدام العامة.

 

لو انت عندك Startup والمهارة دى عندك عالية، يبقي ابدأ فورا في سلسلة Video Content عن المشكلة اللي شركتك المؤقتة بتحلها، وابقي ادعيلي أما تحقق الـ Traction اللي نفسك فيه.

 

تتعلم المهارة دى ازاى؟

 

بسيطة، فكك من أي مخاوف واطلع للناس، هيجري ايه يعني؟ ما انت دلوقتي خايف أو مش جاهز او متردد و مفيش حاجة حصلت.

 

اتدرب كتير على المهارة دي، وشوف بداية الدحيح ومعظم الناس بتاعت اليوتيوب كانت ازاى.

 

3- البحث والتنقيب (Research)

 

أحد أهم المهارات عند أي مسوق عموما على الإطلاق، بس أهميتها عند الراجل بتاع المحتوى لا تضاهي أهميتها عند أي مسوق تاني.

 

التسويق بالمحتوى أداة لإكساب الشركة Credibility.

 

الـ Credibility يعني أقل نسبة شك في المعلومة المطروحة، وأكبر نسبة ودرجة تصديق و ثقة للمعلومة.

 

طب أقل نسبة شك، وأكبر نسبة تصديق أو موثوقية هتيجى ازاى؟

 

عليك نور، بإجراء بحث عميق (يا جماعة انا بدخل لحد الصفحة العاشرة في جوجل، وسعات للصفحة العشرين).

 

مش بس كده، انا بدور في أمازون، وبدور في كتب، و سعات بلجا لورق بحثي، انا مدرك تماما لأهمية المهارة دى، والحمد لله أدعي أنها من أقوى المهارات عندى.

 

الإنترنت شبكة متشابكة من المعلومات، ورجل المحتوى الشاطر هو اللي يعرف يطلع منها اللي هو عايزه.

 

طب ودى تتعلمها ازاى؟

 

أولا أوعي تستهل، وتقول حرف ملوش مرجعية، عشان لو جالك نقد تعرف تواجهه بكل ثقة وحزم.

 

ثانيا روح اتعلم ازاى تدور في جوجل، وفي كل المواقع المشابهة.

 

ثالثا لازم تروح تدور على موضوع واحد كل يوم بغرض تفلية الإنترنت فيه حرفيا، يعني مايكونش فيه حرف اتقال عنه انت مش على علم بيه.

 

4- توليد الأفكار (Ideation)

 

أكتر حاجة مضايقة المسوقين بالمحتوى وبالذات المبتدئين هي أفكار المحتوى.

 

هو ازاى اجيب افكار للمحتوى؟

 

ده أكتر سؤال بيتكرر يوميا، والإجابة عليها هاغطيها في مقال كامل كبير مفصل، هحاول احط فيه كل الطرق والأساليب اللي تضمن لك يكون معاك Content Idea Generator Machine ما بتعطلش.

 

لازم تنسي جملة “معنديش أفكار أو مش عارف أجيب أفكار” …

 

الجملة اللي فاتت دى من الخرافات والأفكار الغلط اللي في دماغ ناس كتير في مجالنا.

 

لان ببساطة انت عندك مخ، والمخ وظيفته الأساسية هو توليد الأفكار.

 

طلع أفكار كتير، بسبب ومن غير سبب، حلوة ووحشة، مناسبة وغير مناسبة، منطقية ومجنونة، من كل المصادر الموجودة، من تعليقات الناس، من كتاب قريته زمان، من بوست على الفيسبوك، من كل حتة.

 

5- مهارات اللغة السليمة (Language)

 

كل لغة فى الدنيا ليها قواعدها الخاصة، وليها طابع مميز ليها، والأكيد أن ليها روح وثقافة المتحدثين بيها.

 

لو بتكتب محتوى عربي أو أنجليزي أو لاوندى، لازم تكون عارف قواعد اللغة، وطريقة الكلام.

 

،لو فصحي يبقى النحو و الهمزات، لو عامي شوف التعبيرات الشائعة اللي بيتم استخدامها.

 

لو إنجليزي يبقي لازم تبقي شارب اللغة كأنك واحد من أهلها، ده لو عايز توصل لأكبر تأثير بالمحتوى بتاعك.

 

مهارات اللغة مهمة جدا لأي مسوق بالمحتوى نفسه يكون محترف.

 

6- تنظيم وتظبيط الكلام (Formatting)

 

بيقولوا العين بتاكل قبل الفم!

 

ده صح، لان الشكل الجمالي والتنظيم الاحترافي من أهم علامات المحتوى عالي الجودة اللي الشركات ممكن تدفع فيه فلوس اكتر.

 

قطعة المحتوى عبارة عن شوية معلومات متجمعة في مكان واحد، طريقة عرضها وتنظيمها مهمة جدا.

 

الكلام متقسم لفقرات، والفقات متقسمة لجمل، وفيه علامات ترقيم، ولو فيه قائمة انت عامل لها ترقيم ولا سايبها عايمة وحاجات تانية كتير.

 

مهارات تنسيق المحتوى لو مش موجودة عندك، عمر ما حد هيرضى عن المحتوى اللي انت عامله، وبالذات انت.

 

7- تجربة المستخدم (UX)

 

الـ Content Marketing مش بس Content Creation، ده فيه فروع تانية زي الـ Content Experience.

 

يعني ايه تجربة المحتوى (Content Experience)؟

 

هو عبارة عن Overlap بين علم الـ UX و الـ Content Marketing.

 

التجربة اللي بيمر بيها الجمهور أثناء استهلاك المحتوى كفيلة انها تدي للبراند Authority و Likeability مفيش حاجة تانية ممكن تحققها.

 

أصل أنت بتحل له مشكلة بيعاني منها ومنغصة عليه عشته، وبتقدم له قيمة بتحسن مستوى حياته، وكل ده في سياق تجربة ممتعة.

 

طب هل المطلوب أنك تبقى خبير في الـ UX؟

 

لو تقدر اكيد هتبقي ميزة تنافسية عندك، وهتفتح قدامك Potential وخاصة لو هتشتغل فى Startup، ولكن كل المطلوب منك انت تعرف الأساسيات وتحاول تطبق قدر الإمكان.

 

أكاديمية حسوب قامت بإنتاج كتاب محترم جدا، ومترجم عن Crash Course أجنبي، فيه أغلب إن مكانش كل الأساسيات اللي انت محتاج تتعرف عليها.

 

ده كتاب أكاديمية حسوب، و ده الكورس الأصلي.

 

تعلم المبادئ الأساسية، وابدع في طريقة تطبيقها.

 

8- حكي القصص (Storytelling) 

 

يا تري إيه أهم صفة شكلت نجاح ستيف جوبز؟

 

الإجابة هي الـ Storytelling.

 

العم جوبز بيقولك إتفضل ألف أغنية في جيبك، بيقولك انت عبقري ومختلف بس لو استخدمت الجهاز بتاعنا.

 

جوبز خير من يحكي، والناس تسمع وتسقف.

 

خليك زي جوبز.

 

9- كتابة النسخ (Copywriting)

 

يعني ايه Copywriting؟

 

الـ Copywriting هو فن وعلم كتابة Copy.

 

يعني ايه Copy؟

 

الـ Copy عبارة عن محتوى الغرض منه اقناع الزبون المحتمل بمنتج أو خدمة معينة و التأثير على قراره الشرائي عشان يشتري المنتج/الخدمة.

 

وصف المنتجات في مواقع الـ Ecommerce يعتبر Copy، الايميلات اللي بتيجي لك وغرضها البيع عبارة عن Copy، الاعلانات اللي بتشوفها على النت دي برضو Copy، المحتوى اللي بيكون فى الـ Landing Pages و الـ Sales Pages برضو عبارة عن Copy بيكتبها الشخص اللي اسمه Copywriter.

 

الـ Copywriter بيكتب عنوان أي قطعة محتوى، وبيكتب الـ Call to Actions كمان.

 

باختصار أي كلام في البيزنس غرضه البيع، بيكتبه الـ Copywriter.

 

المهارة دى ضرورة ملحة عند أي مسوق بالمحتوى عايز يكون محترف.

 

10- الإدارة (Management)

 

مراحل إنتاج المحتوى مرهقة وصعبة، انت متخيل انك المفروض مسئول عن خط إنتاج كامل؟

 

خط الانتاج ده ممكن يكون فيه أكتر من شخص، وأكتر من عملية بتحصل؟َ!

 

عشان كده مهارات الإدارة السليمة حاجة أساسية عند أي مسوق بالمحتوى.

 

تتعلم المهارة دى ازاى؟

 

اعمل سيرش في جوجل بكلمة Management Methodology.

 

11- التخطيط (Planning)

 

التخطيط مهارة مهمة عشان تتسلق أي سلم وظيفي في أي شركة، ومهمة عشان تحقق نجاح في حياتك الشخصية، ومهمة عشان تنجح أي مشروع انت مساهم فيك أو تمتلكه.

 

التخطيط بسيط جدا يا جماعة، الموضوع بيبدأ بهدف محتاجين نحققه، فنبتدى نخطط عشان ده يحصل، وهنا تكمن خطورة وحساسية المهارة دى.

 

لازم يكون عند المسوق بالمحتوى مهارات وضع الأهداف، ورسم خطط تنفيذية استراتيجية لتحقيق الاهداف دي.

 

12- التحليل (Analysis)

 

من احب المهارات لقلبي هي مهارة التحليل، لانى شايف – بعكس ناس كتير – إن المهارة دى مكون مهم  من مكونات مهارة الإبداع!

 

أصل عشان تكتشف روابط خفية بين أمور ممكن تبان لحد عادى انها مش مرتبطة، لازم مستوى عال من التحليل.

 

انت أصلا كمسوق مطلوب منك تحلل شغلك، وشغل المنافسين، وشغل القوى المؤثرة على السوق، وتحلل السوق، وكل ده بشكل مستمر وشبه يومي.

 

وعشان تتعلم المهارة دى، فأنت لازم تبتدى تبص للأمور بنظرة مختلفة …

 

أولا مفيش حاجة اسمها صدفة في الشغلانة بتاعتنا دى، كل حاجة لسبب، ودورك أنك تعرف السبب ده.

 

ثانيا مفيش حاجة ليها وش واحد، ومفيش حاجة إتجاه واحد، كل شئ في الكوكب ليها طبقة تانية، وكل حاجة ليها أكتر من إتجاه، لازم تبقى فاهم ده كويس أوى.

 

خلي عندك فضول إنك تعرف أكتر …

 

13- قراءة البيانات (Data Reading)

 

الداتا اه مهمة، بس الأهم هو ازاى تقراها وتحولها لخطة تنقل البيزنس خطوة لقدام.

 

ازاى من شوية أرقام أو إحصائيات تتوصل لـ Insight يخليك تاخد Educated Decision يطور من الشركة اللي انت مسئول عنها، أو يخليك تعمل استراتيجية تكبر البيزنس.

 

المهارة دى من أهم المهارات وأهميتها هتزيد الفترة اللي جاية.

 

14- مبادئ التصميم

 

المسوق بالمحتوى دائما في اتصال مع مصمم الجرافيك!

 

ده عنده فكرة عايز التاني ينفذها، وده عايز يبعت له التصميم ومايكونش فيه أي تعديلات!

 

ده يقول لده انت اللى غلطان، وده يقول لده انت اللي مش شاطر!

 

انا ماليش دعوة بالمصمم هنا، انا ليا دعوة بالمسوق بالمحتوى.

 

بص يا سيدي، مفيش حد يقدر يقرا دماغك ولا يشوف الفكرة بتاعتك زي ما اهي موجودة في دماغك بالظبط!

 

يعني ايه؟

 

يعني لو ماعرفتش توصل فكرتك صح بوضوح للمصمم، لا تلومن إلا نفسك، هو هينفذ اللي هيفهمه منك، الموضوع كله في ايدك انت.

 

طيب جالك التصميم وانت عايز تشوفه مناسب ولا لأ، تعمل ايه؟

 

بص على توازن الألوان، الخطوط، الأيقونات والرسومات والشخصيات المستخدمة كرموز للتعبير عن فكرة المحتوى، مدى وضوح الفكرة عن طريق الـ Alignment و الـ Hierarchy والـ Contrast الموجود في التصميم.

 

ده مقال مهم من شركة ادوب هتتعلم فيه اساسيات التصميم اللي بيها تحكم على جودة على أي تصميم 

 

الخلاصة: لازم تتعلم مبادئ التصميم عشان انت بتشتغل مع مصممين، بس مش لازم تعمل بنفسك التصميم، دي شغلانة منفصلة ملهاش دعوة بكونك مسوق بالمحتوى.

 

15- المهارات الخاصة بكل قناة تسويقية

 

بتعرف تشتغل على انستجرام؟ فيسبوك؟ تويتر؟ المواقع الإلكترونية؟ الايميل؟

 

كل قناة تسويقية ليها المهارات والطرق والأفكار التسويقية اللي تنفع معاها، وهنا بيتميز مسوق عن مسوق.

 

انت بتعرف تشتغل على كام قناة بطريقة علمية احترافية؟

 

في المقال ده هتعرف 19 قناة تسويقية مهمة جدا، وهتتعلم ازاى تشتغل على كل منها 

 

وبكده نكون خلصنا المهارات اللازمة عشان تكون مسوق بالمحتوى محترف.

 

دول 27 مهارة، وأكيد فيه غيرهم، بس دول الاساسين، شوف انت تملك ايه منهم، وايه اللي عندك نقص فيه، وانت عارف المفروض تعمل ايه …

 

قولنا فى أول المقال إن عشان تكون مسوق بالمحتوى محترف محتاج معرفة أساسية، ومهارات حرفية.

 

فى المقال ده اتكلمنا عن المهارات الحرفية، ناقص المعرفة الأساسية.

 

 طالما جيت لحد هنا يبقى أنت مهتم جدا تطور مهارتك ومستواك فى التسويق بالمحتوى، عشان كده اقدم لك كورس THE NEXT LEVEL …

 

الكورس ده هتتعلم فيه مهارت وطرق وخطوات كتابة الـ Blog Posts، والـ Landing Page، والـ Emaill Funnels، والـ Sales Pages.

 

الموضوع كله مُركز حوالين 3 أهداف: ترافيك، و Leads، و Customers.

 

يعني هتتعلم ازاى تكتب محتوى يجيبلك ترافيك للموقع بتاعك بشكل مستمر، ويجيبلك Leads بدون اعلانات ومهتمين و Targeted جدا لمنتجاتك او خدماتك، وكمان هتتعلم ازاى تجيب زبون/عميل بشكل دوري باستخدام المحتوى.

 

تفاصيل الكورس وسعره واللى هتطلع بايه منه وكل حاجة كل حاجة، هتلاقيها فى الصفحة دى، دوس هنا. 

 

 

التصنيفات: Content Marketing

23 تعليقات

Nada · 2017-07-23 في 10:36 ص

مقال مفيد جدا و مكتوب بطريقه حلوة اوى
أنا لسه على أول درجه من السلم و هحاول استفاد من الكلام ده

    Osama Salah · 2017-07-28 في 10:53 م

    أشكرك يا ندى على رايك العظيم جدا بالنسبة لى ^^

    حاولي على قد ما تقدري تطبقي وتستفادى من الكلام ده الاستفادة القصوى ، ولو فيه حاجة عصلجت معاكي ، انا تحت امرك فى اى وقت ^^

sara · 2017-08-01 في 7:26 م

من كلامك عن ال content والمهارات اكتشفت اني بعمل ده بقالى سبع سنين ومش حاسة لاني بشتغل مدرسة كمبيوتر لطلبة ماشوفوش كمبيوتر وطلبة شافوه والمفروض اتارجت فى الاخر عشان سمعتي 😀 بس انا حاليا عايزة اعمل شيفت للكارير، وده اللى جابني للماركتينج ..انت لخصت الدنيا شكرا

    Osama Salah · 2017-08-05 في 10:38 ص

    اشكرك يا استاذة سارة على رايك ^^

    لو حابة اى مساعدة فى التسويق، تحت امرك!

Eman · 2017-09-08 في 5:17 م

بشكرك على المقال الجميل ده … و بحييك على اسلوبك السهل و الممتع و اللي خلاني أقرأ كل حرف فيه و انا متشوقة اقرأ اللي بعده ? و ده بيدل على انك ما شاء الله ماركتير شاطر.
محتاجة بس اعرف اكتر عن ال Ideation و كمان ازاي ممكن اكون Creative أكثر … لو في resources تساعدني بيها ياريت ?
شكرا ليك جدا ?

    Osama Salah · 2017-09-09 في 7:13 ص

    أشكرك يا إيمان على الثناء الجميل ده ^^

    أنا عامل eMail Course مجاني عن الـ Content Creation وهو عبارة عن 17 إيميل ، كل إيميل بداية من الرابع بيشرح درس او خطوات من خطوات عمل المحتوى ، الإيميل السادس تحديدا بيتكلم عن جزئية الـ Content Ideation دى ، لينك التسجيل اهو http://bit.ly/Content-Creation101

    بالنسبة لموضوع الكريتفيتى، فالاول حددى طريقة أو طرف تفكير انت كويسة فيها ، زى التفكير البديهي أو التفكير التحليلي ، بعدين قولي لنفسك دايما فيه زواية تانية للموضوع ، وابتدى دوري عليها.

    يعني حطى الـ Mindsets دي فى دماغك:

    مفيش حاجة أتجاه واحد ، العالم 5d اصلا
    مفيش حاجة ليها استخدام واحد ، المهم تعرفي تستخدميه صح
    لازم تعودي نفسك تسالي السؤال الصح

    الحاجات دى لو عملتيها بشكل مستمر ، مهارة الابادع عندك هتزيز بشكل ملحوظ.

      Eman · 2017-09-09 في 8:20 ص

      بشكرك جدا على ردك 🙂 انا بالفعل اشتركت فى الكورس رقم واحد و بعدين شفت صفحتك و البلوج و استلمت اول ايميل امبارح 🙂 هحاول افهم اكتر عن ردك و ان شا ءالله اقدر اوصل لحاجة كويسة 🙂 شكرا ليك جدا و استاذنك تستلم اسئلتى اللى جاية برحابة صدر 🙂 🙂

        Osama Salah · 2017-09-09 في 11:00 ص

        على الربحب والسعة فى اى وقت ^^

        Osama Salah · 2017-09-09 في 11:01 ص

        على الرحب والسعة فى اى وقت ^^

amira amin · 2017-11-02 في 7:23 م

انا فعلا استفدت كتير من مقال حضرك .ينفع بيك دايما

    Osama Salah · 2017-11-04 في 10:23 ص

    أشكرك للغاية يا أميرة ^^

سُمية · 2017-12-15 في 5:04 م

السهل الممتنع.. مقال مفيدتقدر من خلاله تحدد المهارات اللي تمتلكها والمهارات اللي محتاج تتعلمها..
والشيء الجميل اني طلعت ب 20 مهارة انا عارفة اني كويسة فيهم و 5 مهارات ماعنديش عنهم أي فكرة وده بيوفر على أي حد الوقت إنه يدعم المهارات اللي عنده فيها فقر فعلًا.. ويحط إيده على مواضع القصور بسهولة..
شكرًا جدًا..

    Osama Salah · 2017-12-16 في 1:38 م

    بدون مبالغة من أفضل التعلقيات الثرية اللى جات لى ، وده لان طريقة تنظيم الكلام تنم عن طريقة تنظيم الأفكار، وده فى حد ذاته مهارة مهمة لأي حد هيشتغل فى المحتوى، بس عايز يا سمية برضو تشوفي المهارات اللى انت بتقولي لانك حلوة فيها ، وتشوفي نفسك حلوة لحد فين؟!

    تحياتي ^^

Angham · 2018-12-26 في 3:07 م

المقال جميل جدا وانا متابعه حضرتك من وقت الميل بتاع تعليم المحتوي واستفدت كتير جدا ودا افدنى انى بدأت ف مجال كتابة المحتوي وحاليا شغاله بكتب مقالات متنوعة ومختلفة متطابقة مع السيو
ممكن حضرتك تفيدنى ازاى اقدر اتعلم أساسيات اللغة زي ظبط الهمزات والتاء وغيرهم من الحروف وقواعد الكتابه

Ashraf Ref3t · 2018-12-27 في 12:12 ص

عاجبني جدا شغلك
حضرتك ماركتير مميز وفاهم كويس انت بتعمل ايه
بحاول اتعلم من كل حاجة بتعملها إلا الكتب بس عشان غالية عليا ?

    Osama Salah · 2018-12-27 في 4:48 ص

    أشكرك جدا جدا يا أشرف، وباذن الله بتطبيق اللى بشرحهولك، تكسب أكتر، وتشتري الكتب وتطور نفسك أكتر.

Asmaa MouraedElkady · 2018-12-27 في 9:37 ص

ف حاجات مقدرتش افهمها كويس ف المقال ده لانها غير مزودة بأمثلة و مختصرة بشكل كبير

    Osama Salah · 2018-12-27 في 5:52 م

    قول لى يا اسماء ايه الاجزاء اللى ماقدرتيش تفهميها وهاعيد شرحها مرة تانية ليكي …

Asmaa MouraedElkady · 2018-12-27 في 9:39 ص

المقال بتاع القنووات مفيش منه مترجم بالعربى ?

    Osama Salah · 2018-12-27 في 5:45 م

    للاسف لا يا أسماء!

Mona alameer · 2019-02-04 في 1:18 ص

كنت بدعى ربنا امبارح ساعة المطر انه يلهمنى بكارير احقق فيه مواهبى واكون مستمتعه بيه وابدع فيه ..

كنت بسيرش على الcontent writing وقابلت مقال حضرتك ده .. استفدت كتير جدا ولمض كتير نورت فى دماغى ..

تقريبا عندى ١٩ مهاره والدنيا وضحت بالنسبالى ممكن اركز على ايه واتعلم ايه .. وخصوصا ان حضرتك كمان حاطط لينكات اتعلم منها واقوى بيها نفسى ..
طريقة حضرتك فى الشرح حلوه اوى وكأنى شايفاك فى فيديو او واقف قدامى فى كلاس تشرحلى .

ده اول مقال اقراه فى المجال ده بس حبيت الموضوع اوى? وهكمله قراءه واهتمام لحد ما اشوف هوصل فين .

ربنا يوفقك وينفع بيك دايما

    Osama Salah · 2019-02-09 في 6:12 م

    أشكرك جدا استاذة مني على الفيدباك الرائع ده ^^

    تحياتي

اسال او استفسر او قول رايك ...

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.