أهلا بيك فى سلسلة أساسيات التسويق عبر مواقع التواصل الاجتماعي – الجزء الثاني.

 

فى السلسلة دي بقدملك كورس مجاني سريع فى التسويق عبر مواقع التواصل الاجتماعي (Social Media Marketing).

 

الهدف من السلسلة دي هو:

 

1- تغطية علم التسويق عبر مواقع التواصل الاجتماعي تغطية شاملة.

2- تأسيس أي حد عايز يشتغل أو بيشتغل فعلا فى المجال تأسيس صحيح على أسس علمية.

3- توفير مصدر تعليمي عالي الجودة بيقدم معلومات ممنهجة وعملية مش معلومات عشوائية ونظرية.

 

دوس هنا لقراءة الجزء الأول ومعرفة أساسيات التسويق عبر مواقع التواصل الإجتماعي

 

فى الجزء الأول قولنا عشان توصل لمكان/ة أبعد من اللى المفروض اي حد يوصل له فى مجال التسويق عبر مواقع التواصل الاجتماعي، فيه 6 علوم تانية لازم تعرف أساسياتها كبنية تحتية لدماغك، وهما:

 

  • الـ Marketing
  • الـ Business
  • الـ Psychology
  • الـ Sociology
  • الـ Media
  • الـ Technology

 

ده كان من ناحية الـ Setup بتاع دماغ اى حد شغال فى صميم المجال ده، ومن الناحية التنفيذية قلت إن العلم ده مقسوم لـ 5 أجزاء تنفيذية.

 

انهاردة هنتكلم عن كل جزء منهم بالتفصيل …

 

الجزء الأول: المحتوى

 

المحتوى هو بنزين العربية، والعربية هي مواقع التواصل الإجتماعي، وبالتالي لو مفيش محتوى، العربية مش هتدور اصلا!

 

ولو فيه محتوى (بنزين) وحش العربية هتبوظ، إنما لو البنزين عالي الجودة وفعلا مفيد، العربية هتجري بسرعة، فهمت الفكرة؟

 

ايه المحتوى اللى المفروض ننشره على وسائل التواصل الاجتماعي؟

 

اي معلومة أو نصيحة أو شرح بيقدم للجمهور قيمة كبيرة، وبيساعدهم يكونوا افضل فى  حياتهم، وأكيد لازم يكون ليه علاقة باللى انت بتبيعه.

 

المحتوى لازم يبقي عن الناس مش عنك انت ولا شركتك ولا منتتجك، الناس بتحب نفسها، بتحب حد يتكلم معاهم فى  مشاكلهم ويقدم لهم حلول، اعمل كده.

 

المحتوى ليه أنواع، زي الصورة أو الفيديو أو الإنفوجرافيك أو الكلام النصي أو المقالات القصيرة.

 

المحتوى بيختلف حسب القناة اللي هيتم نشره فيها، مثلا الفيسبوك حاليا مكان متميز للفيديو وبالذات القصيرة، بنتريست مكان الإنفوجرافيك، تويتر مكان الكلام النصي القصير، انستجرام مكان الصور.

 

المحتوى ليه أهداف، والطريقة اللي هيتكب بيها هتختلف حسب الهدف ده، مثلا ممكن تكون عايز Brand Awareness واللى ممكن تعمله عن طريق:

 

1- تحديد الفئة المستهدفة من الجمهور للمنتج/الخدمة اللى انت بتقدمها.

2- تحديد المشاكل اللى المنتج او الخدمة بيحلها للفئة المستهدفة دى.

3- ايجاد حلول أصلية للمشاكل دي بشرط الحلول دي تكون موجودة فى المنتج او الخدمة.

4- اكتب محتوى عالي الجودة يشرح المشاكل بالتفاصيل ويقدم الحلول.

 

الخلاصة: اوعي تبطل تكون مفيد على السوشيال ميديا، اكتب كل يوم محتوى مفيد، محتوى تعليمي، محتوى تفاعلي، وبرضو بيع مش هاقولك لا، ولكن التركيز الأكبر لازم يكون على تقديم القيمة.

 

فى رايي الشخصي إن البيع على شبكات التواصل الإجتماعي ليه أصول، والافضل البيع يكون من خلال ويب سايت، أو ايميل، أو تليفون، او اي قناة تسويقية تتسم بالخصوصية، مش قنوات عامة زي الفيسبوك مثلا.

 

عايز تتعلم تكتب محتوى عالي الجودة على أسس علمية؟ انا عملت كورس عن طريق الايميل، عبارة عن 17 ايميل، كل يوم الساعة 10 بيجي لك ايميل بيشرح لك موضوع معين.

 

الكورس بشهادة +130 شخص قيمته المادية ماتقلش عن 1000 جنيه، وقيمته العلمية كبيرة جدا، لدرجة إن ممكن ماتلاقيش كورسات بفلوس بتقولك الكلام ده.

 

الكورس مجاني 100%.

 

اكتب ايميلك، اسمك الاول، ورقم الموبايل عشان تسجل فى الكورس.

 

 

بعد ما تسجل، هيجي لك ايميل Confirmation فيه لينك لازم تدوس عليه عشان الكورس يبدأ يجي لك.

 

الجزء الثاني: استراتيجية التسويق عبر مواقع التواصل الإجتماعي

 

يعني ايه استراتيجية؟

 

خطوات ممنهجة للوصول لهدف ما.

 

اذن أول جزء فى استراتيجية التسويق عبر مواقع التواصل الإجتماعي هو الأهداف.

 

طب ايه هي الاهداف اللى ممكن اوصل لها من خلال السوشيال ميديا؟

 

كتير، وبيتم تحديد الاهداف حسب الغرض اللى الشركات بتستخدم السوشيال ميديا عشانه.

 

مثلا شركة بتستخدم السوشيال ميديا عشان تبني مجتمع بيحبها ومتفاعل معاها، يبقي الهدف زيادة التفاعل وحجم المتابعين.

 

مثلا فيه شركة بتستخدم السوشيال ميديا عشان تجيب ترافيك لموقعها، يبقى على طول كده الهدف بتاعك يكون Drive مثلا 150 الف واحد شهريا لموقع الشركة من خلال الفيسبوك وتويتر.

 

الرقم اللي انا قلت عليه (الـ150 الف) ده بيتم تحديده عشان 3 حاجات:

 

1-  الـ Benchmark في الـ Industry اللي انت بتلعب فيها.

2- عدد الناس المهتمة باللى انت بتقدمه على قنوات السوشيال ميديا المختلفة.

3- الـ Budget المتوفرة معاك عشان تحقق الهدف ده.

 

طبعا مش محتاج أقولك إن الأهداف دى لازم تبقى SMART، وإن الـ Focus على هدف أو هدفين بالكتير هيوصلك للي انت عايزه بسرعة.

 

تانى جزء في استراتيجية التسويق عبر مواقع التواصل الإجتماعي هو تحديد القنوات التسويقية.

 

أصل الـ Social Media قنواتها كتيرة، عندك فيسبوك، انستجرام، لينكدإن، تويتر، بينتريست الخ …

 

هاقولك دلوقتي 3 خطوات بسيطة لو طبقتها هتقدر تقرر انهي قناة تسويقية المفروض تشتغل عليها.

 

1- مين الجمهور المستهدف؟

2- موجود فين وبيعمل ايه؟

3- هتروح تتكلم معاه ازاى وعايز تقول ايه؟

 

مثلا لو انت بتستهدف ربات البيوت، دول موجودين فين؟ فى تويتر؟ فى الفيسبوك؟ وبيعملوا ايه هناك؟ يعني بيتكلموا فى ايه؟ وانت لما تروح تتكلم معاهم هتقول ايه؟

 

طيب انا هشتغل على كل القنوات مع بعض، لو عندك موراد لده اعمل مش هاقولك غلط، بس ماتشتغلش على قناة عشان لازم تكون موجود وخلاص، او عشان اللى بتعمله هنا تعمله هناك، كل حاجة وليها حاجة يا سيدنا.

 

تالت جزء في استراتيجية التسويق عبر مواقع التواصل الإجتماعي هو المحتوى.

 

بإختصار هنا بتعمل شيت اكسل محترم كده وتسميه Editorial Calendar ودى أداة تنظيمية للمحتوى اللي هتعمله، وأهم نقطتين فيها هما الوقت اللي هينزل فيه المحتوى، والقناة اللي هينزل عليها، وعدد المرات الأسبوعية أو اليومية اللى هتنشر فيها.

 

وزود كمان شيت وسميه Content Ideas وده عشان تطلع فيه الأفكار اللي هيتم طرحها من خلال قنوات السوشيال ميديا، وتحديد مين المسئول عن تنفيذها.

 

المفروض أول كل شهر، يتقعد مع نفسك أو مع فريق العمل وتعمل Brain Storming بس قبل ما تعمله ما تنساش يبقي معاك إجابة التلت اسئلة اللي قلتهم في حتة تحديد القناة اللي هتشتغل عليها.

 

دول أهم تلت أجزاء لازم وحتما ولابد تبقى موجودة جوه أي استراتيجية للتسويق عبر مواقع التواصل الإجتماعي.

 

أنت دلوقتي عملت استراتيجية وعرفت ايه هي الاهداف اللى عايز توصل لها؟ وايه القنوات اللى هشتتغل عليها؟ وايه المحتوى اللى هتنشره؟ وهتنشر كل قد ايه؟ وامتي بالظبط؟ وكتبت المحتوى كمان نشرته، تعمل ايه تاني؟

 

الجزء التالت: الـ Responding

 

فى الجزء الأول من السلسلة دى، قلنا إن الفرق بين الـ Media العادية والـ Social Media، إن الأخيرة الجمهور يقدر يقول رأيه وتعليقه على المحتوى المعروض بكل سهولة، ومحدش يقدر يمنعه من انه يعمل كده، على عكس الـ Media العادية لإن الميكروفون مع اللي بيذيع بس.

 

إذن وبصراحة مطلقة لو الشركة اللي انت شغال فيها بتهمل الرد على تعليقات ورسائل الناس تبقى مش فاهمة يعني ايه سوشيال ميديا، واستمرار وجودها بيخسرها مابيكسبهاش (فيه استثناءات قليلة شركتك أكيد مش واحدة منهم).

 

الـ Responding يعتبر بحوث تسويق مابتقفش، الـ Responding مكنة لأفكار محتوى مابيخلصش، الـ Responding وسيلة قوية للدخول جوه قلوب وعقول الجمهور المستهدف.

 

في الـ Responding ماينفعش تعمل نفسك مهتم، أنت أما مهتم أما لا، وهتتقفش بسهولة لو بتكدب أو بتنافق.

 

زى ما بتفرح بالتعليقات الإيجابية، زقطط للسلبية وفكر ازاى ترضى صاحبها عشان تخليه مسوق عندك في الشركة من غير ما يبقى موظف فيها.

 

لو عايز How To في جزئية الـ Responding هقولك خليك إنسان وحس بالإنسان اللي قدامك، وحاول تحط نفسك مكانه وتشوف بعينه وتسمع بوادنه وتحس بقلبه، وتحاول تحل له مشكلته مهما كانت وياريت بسرعة قدر الإمكان.

 

1- قبل ما ترد على اي تعليق او رسالة أو منشن، اقراه كويس اوى.

2- افهم النقطة اللى صاحب الكومنت او الرسالة عايز يوصل لها.

3- عيد صياغة التعليق او الرسالة عشان تتاكد انك فاهم صح.

4- رد بشفافية وصراحة، وحافظ على كونك صاحبه ومتفهم رايه.

 

الجزء الرابع: الإعلانات الممولة على مواقع التواصل الاجتماعي

 

الإعلانات بالظبط عاملة زي الميك اب، والـ Business هو البنت اللى بتحط الميك اب ده، لو البنت (الـ Business) حطت ميك اب كتير و خلاص (اعلانات كتير وملهاش اى قيمة) هتبقى شبه الضفدعة مع احترامى الكامل للضفدعة طبعا ومحدش هيعبرها (مفيش Customers)، أما لو حطت ميك اب خفيف يبين جمالها (محتوى عالي الجودة) العرسان هيجروا عليها ومش هتلاحق عليهم.

 

يعني يا ريت ما يكونش هدفك أنك تعمل إعلانات على الفيسبوك مثلا وخلاص!

 

، لا الهدف يكون التواصل مع الجمهور المستهدف من أجل حل مشاكله، والإعلانات أداة مش أكتر لمساعدتك على الانتشار والوصول بالظبط للجمهور.

 

ده من الناحية الفلسفية، إنما من الناحية التنفيذية، الفترة اللى جاية هاعمل لك مقالات عن ازاى تعمل إعلانات فى الفيسبوك و إعلانات فى تويتر إلخ.

 

ولو انت مستعجل، ده مصدر مجاني تقدر تبدأ بيه فى الاعلانات الممولة للفيسبوك.

 

الجزء الخامس: التحليل

 

في الشغلانة بتاعتنا دى اللي مابيحللش شغله أول بأول بيكون أعمى.

 

طب يا عم من الأول كده احلل ايه ولا ايه ولا ايه؟

 

الموضوع بسيط جدا، من الأول خالص انت حطيت هدف معين، شوف هتقيس الأداء في الوصول ليه ازاى؟

 

مثلا لو كان هدفك بناء Community حوالين حاجة معينة، يبقى تقيس عدد وجودة الكومنتات اللي بتيجي وشكرا، لو هدفك Brand Awareness يبقى تشوف الـ Reach والـ Shares الخ.

 

طب الفيسبوك مثلا بيدينا Insights معقدة اوى وكبيرة اوى، اعمل ايه؟

 

قبل ما اجاوبك على السؤال ده عايز أقولك جملة خدها إقتباس وحطها في دماغك “مش مهم الداتا ، المهم ازاى هتقراها وتحولها لـ Action تحسن أداء شغلك بيه”

 

نرجع لسؤالنا ،اعمل ايه؟ خد اللى انت عايزه بس.

 

يستحسن تعمل Analytics لكل قناة على حدة شهريا (وكل بوست وكل يوم وكل أسبوع) ، وبعدين لكل القنوات مع بعض، عشان تعرف أداء السوشيال ميديا في خدمة البيزنس كـ Marketing Channel، وطبعا عشان تعرف أداء كل SM Channel على حدة وتقرر تستثمر في مين أكتر كوقت ومجهود وفلوس، وتسيب ايه وهكذا.

 

التحليل مهم جدا يا جماعة والله.

 

دى مصادر مجانية مفيدة فى موضوع تحليل الاداء على وسائل التواصل الاجتماعي (بالانجليزي).

 

كده انا خلصت الخمس أجزاء الرئيسية وأرجو لو فيه حاجة مش مفهومة بشكل كويس، تقولوا لى تحت في الكومنتات.

 

التسويق عبر مواقع التواصل الإجتماعي في التنفيذ مش بس الخمس حاجات اللي اتكلمنا عنهم، فيه 3 حاجات تانية مهمة جدا وهي:

 

1- الـ Social Media Design

2- الـ Social Media Crisis Management

3- الـ Social Media Listening & Monitoring

 

ودول موضوع الجزء التالت اللي ماقدرش اوعدكم انه هيكون هنا قريب.

 

التصنيفات: Social Media Marketing

18 تعليقات

newhomeegypt · 2018-02-16 في 10:39 م

مقال رائع جدا لأ حد مبتدىء فى عمل الاستراتيجى

    Osama Salah · 2018-02-17 في 9:32 ص

    أشكرك ^^

Ahmed Farhat · 2018-03-16 في 1:44 ص

مقال اكثر من رائع.. ربنا يكرمك

    Osama Salah · 2018-03-17 في 1:54 ص

    أشكرك يا عم أحمد ^^

mahmoud · 2018-03-21 في 7:59 م

لا لا لا لا لا
ابوس ايديك الثالث بسرعه

    Osama Salah · 2018-03-21 في 9:39 م

    طب هضمت الأتنين الأوليين كويس ولا لسه يا عم محمود ؟

rofyda · 2018-06-03 في 4:01 ص

ازاي اعمل تحليل لكل بوست بنزله ؟

    Osama Salah · 2018-06-03 في 11:40 ص

    اهلا بيكي يا روفيدا ^^

    تقصدى تحليل من ناحية ايه؟ ارقام واداء؟ ولا جودة؟ ولا ايه؟

Anas Mustafa · 2018-09-08 في 10:52 ص

أرجو معرفة إجابة واضحة من حضرتك ومحددة لأماكن مقترحة من وجهة نظرك لتسويق المنتجات الخاصة بشركتي (شركة العمران العقارية)، والمنتجات هي عبارة عن شقق ومحلات للبيع وللإيجار، علماً بأن العمل يقع في 6 أكتوبر وكذلك كل الوحدات العقارية موجودة في السادس من أكتوبر؟

    Osama Salah · 2018-09-11 في 6:29 ص

    أهلا يا أنس، شوف الجمهور المستهدف فين وبيدور فين، واظهر قدامه، بسيطة!

    مثلا فى جروب معين، فى كلمات بحثية معينة فى جوجل، فى موقع معين، فى صفحة فيسبوك معينة إلخ إلخ، تمام؟

لوشا · 2018-10-02 في 10:20 م

تكفى لا توقف ابداع ماشاء الله اسلوبك رائع و بسيط وانا هضمت الدرس ي ريس??
اشكرك
جزاك الله خير

    Osama Salah · 2018-10-03 في 10:46 ص

    أعزك الله يا لوشا، أشكرك ^^

Sheren El Habak · 2018-10-16 في 1:43 م

استفدت جدا انا شغاله فى شيركة ماركتينج و انا مدرستش اى حاجه فا كنت حابه اعرف و اتعلم عشان يكون مستوايا من مستوى الناس اللى معايه و درسين المجال ده على احر اشتياق لقرائة الجزء التالت و شكرا

    Osama Salah · 2018-10-17 في 1:13 م

    على الرحب والسعة يا شيرين ومبسوط جدا ان المقالين فرقوا معاكي.

    أشكرك ^^

Doaa · 2018-12-02 في 10:53 ص

ممكن نموذج سوشيال ميديا كونتنت

ايناس · 2019-01-12 في 11:45 م

ازاى اعمل تحليل للبوست من حيث الاداء و هلى فى اداه فى فيس بوك تساعدنى

اسال او استفسر او قول رايك ...

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.