fbpx

أهلا بيك فى سلسلة أساسيات التسويق عبر مواقع التواصل الاجتماعي – الجزء الأول.

 

فى السلسلة دي بقدملك كورس مجاني سريع فى التسويق عبر مواقع التواصل الاجتماعي ( Social Media Marketing ).

 

الهدف من السلسلة دي هو:

 

1- تغطية علم التسويق عبر مواقع التواصل الاجتماعي تغطية شاملة.

2- تأسيس أي حد عايز يشتغل أو بيشتغل فعلا فى المجال تأسيس صحيح على أسس علمية.

3- توفير مصدر تعليمي عالي الجودة بيقدم معلومات ممنهجة وعملية مش معلومات عشوائية ونظرية.

 

يلا بينا نبدأ بس لازم تكون فى كامل تركيزك، الموضوع مش صعب، ولكن برضو مش بالسهولة اللى خبراء ومختصين كتير فى المجال بيروجوا للمجال بيها.

 

من وجهة نظري الشخصية، علم التسويق عبر مواقع التواصل الاجتماعي مبني على 6 محاور أساسية.

 

عشان تكون متميز فى المجال ده، لازم تكون ماسك السبع محاور كويس اوى.

 

عمرك فكرت هي إسمها Social Media Marketing، ولا إسمها Marketing Media Social؟

 

المحور الأول: يعني ايه Marketing؟

 

قبل ما أقولك تعريف علم التسويق اللي انا مقتنع بيه، لازم تفهم إن لو التعريف أو المنظور اللي انت متبنيه مش هيخليك تنفذ بسهولة، يبقى التعريف ده مش دقيق وتنظير على الفاضي.

 

التعريفات تعتبر حدود الحاجة اللى بيتم تعريفها، مثلا أسامة صلاح طويل والدغ، لو صفة من دول سقطت عني مش هاكون أسامة صلاح، وضحت الفكرة؟

 

تعريف التسويق:

 

بإختصار هو فن وعلم خلق الطلب على خدمة أو منتج بيقوم بحل مشكلة حقيقية أو إشباع إحتياج عند مجموعة محددة من الناس، بطريقة تلبي توقعاتهم، و بسعر يقدروا ومستعدين يدفعوه.

 

يعني ازاى تخلى الناس تنتبه، وتلاحظ وجود شركتك، وتطلب اللي بتبيعه، وتقول لكل الناس عليك.

 

إذن القاعدة رقم #1: قبل ما تدخل فى مجال التسويق عبر مواقع  التواصل الإجتماعي، لازم تكون فاهم ومقتنع إنك أصلا بتاع تسويق، ولازم على الاقل تعرف أساسيات التسويق (دوس هنا  لو عايز تعرفها).

 

المحور الثاني: يعني ايه Media؟

 

عشان تخلق طلب على منتج أو خدمة، لازم الناس تكون عارفاه في المقام الأول، وبعدين يشوفوا اذا كان مناسب ليهم ولا لا، صح؟

 

الشركات عايزة تبيع منتجاتها وتكسب، بس عارفة إن ده مش هيحصل الا لو الناس أصلا عرفوا انهم بيبيعوا المنتجات دي.

 

وبناء عليه قامت الشركات دي تدور على أحسن وسيلة ممكن يقولوا بيها للناس أن المنتج الفلاني ممكن ينفعهم، وكانت الوسيلة دي هي الـ Media.

 

الـ Media اللى هى وسائل الإعلام، يعني الوسائل اللى بنعرف أو “بنعلم” بيها المعلومات اللى عايزين نعرفها.

 

والميديا أنواع فيه الـ Paid والـ Owned والـ Earned وفيه الـ Free …

 

  • الـ Paid Media

 

زمان كان فيه Mass Production يعني الشركات كانت بتصنع منتجات استهلاكية بكميات كبيرة جدا.

 

وبالتالي كانت الشركات بتروح تتكلم مع Mass Market يعني عموم الجماهير كلهم مع بعض، وبالتالي كنا محتاجين Mass Media كل الناس دي بتتفرج عليها عشان نقدر نوصل لهم.

 

وبناء عليه كانت القاعدة ساعتها “شوف أكتر مكان الناس بتبص عليه و تعالي نحجز فيه فترة زمنية ما”.

 

ده المفهوم الأساسي وراء الإعلانات، شركة بتحجز مساحة أيا كانت المنصة للوصول لجمهور عريض.

 

  • الـ Owned Media

 

وبعكس النوع الى فات، الـ Owned Media عبارة عن إن الشركة بدل ما تحجز جزء من مكان حد تاني، تبني المكان بتاعها، وتستخدمه فى التسويق طول السنة بدون تكاليف الحجز وتقول فيه اللى عايزه بدون سياسات نشر ولا غيره!

 

وانت بتدور على شقة عشان تتجوز فيها، أكيد سمعت النصيحة بتاعت يابني اياك والتأجير، اشتري حاجة بتاعتك احسن عشان المستقبل.

 

ليه يا عم تروح تاجر من حد حتة تقعد فيها شوية، وانت ممكن تبني العمارة بتاعتك تقعد فيها العمر كله.

 

فيه تسويق يبني شركة، وتسويق يساعد الشركة تفضل واقفة على حيلها لفترة، وتسويق بيهد الشركة!

 

فيه التسويق يهد الشركة، وتسويق  يبني الشركة.

 

ملناش دعوة بالتسويق اللى بيهد، خلينا فى التسويق اللى بيبني.

 

التسويق اللى يبني الشركة هو التسويق اللى بيبني Marketing Assets يساعد الشركة وقت ما ميزانية الاعلانات تخلص!

 

هو يعني إيه أصلا Asset؟

 

يعني “مورد له فائدة إقتصادية تملكه أو تتحكم فيه الشركة وتستطيع توليد منه الربح مستقبلا”.

 

إذن يٌفضل بدلا من الاعتماد على الاعلانات، الاعتماد على التسويق بالمحتوى فى بناء تسويق يبني الشركة ويساعدها تكبر بتكلفة أقل.

 

  • الـ Earned Media

 

كلمة Earned يعني يجني أو يكسب، وهنا انت لا بتدفع ابيض ولا احمر، انت بتخلي الـ Media تتكلم عنك، ودي في الأغلب بتبقى مهمة تخصص مغضوب عليه فى مصر والسبب مجهول وهو الـ PR.

 

أحد أهم أشكال الـ الـ Earned Media هي الـ Word of Mouth واللى بيتولد أما تعمل حاجة تستاهل إن الناس تتكلم عنها، ودلوقتى بيتم كسب الـ Media بأحد إستراتيجيات التسويق بالمحتوى، وهي الـ Viral Content.

 

  • الـ Free Media

 

والمتمثلة فى قنوات السوشيال ميديا و محركات البحث (الجزء الـ Organic) ودي ببلاش بس محتاجه حد فاهم كويس أوى وصايع فى نفس الوقت، عشان يستغلها لصالح الشركة اللي بيشتغل لحسابها.

 

إذن القاعدة رقم #2: لازم تتعلم أصول لعبة الـ Media والتاثير فى الجماهير، وازاى تستخدم أي حدث في صالح البيزنس بتاعك.

 

المحور الثالث: يعني ايه Social؟

 

دايما بقول إن بتطور التكولوجيا، التسويق بيتطور.

 

زمان الـ Media كانت عبارة عن التليفزيون والراديو والمجلات والجرايد، ووقت ظهور كل حاجة من دول، كان فيه ثورة فى التسويق.

 

بس كل وسائل الإعلام دى فيها عيب وهو أنها إتجاه واحد.

 

زمان اللي معاه الميكروفون كان يقدر يقول اللى هو عايزه فى أي حتة، وقت ما يحب.

 

أما دلوقتي الريموت بقا مع الناس، الناس تقدر تـ Skip اللي مش عاجباه فى أي وقت، الناس ممكن تـ Ignore أي حاجة مش عاجبها ومش عايزة تسمعها.

 

نتيجة للى فات ده ومع ظهور الإنترنت، طلع شوية ناس قالوا طب ما نخلي الطريق رايح جاي، ونخلي الريموت في ايد الناس، فظهر نوع جديد من الميديا يتميز بأنه طابعه Social، وبقى اسمها Social Media.

 

طب ويعني ايه Social؟

 

يعني إجتماع ، مجتمع ، ناس ، قبائل …

 

وده معناه إن اللي ماينفعش أو مايصحش يحصل في الحياة الواقعية بين الناس وبعضها، ماينفعش يتعمل في الـ Social Media.

 

مثلا مينفعش أما واحد صاحبك يحكيلك مشكلة ويطلب منك حلها، تتأخر في الرد عليه او تنفض له، وبالمثل على الـ Social Media ماينفعش تتجاهل مشاكل الـ Fans لأنك لو عملت كده هتكون بتتعامل مع الـ SM على أنها Traditional Media زي بتاعت زمان.

 

إذن من قوانين الاجتماع اللي بنستخدمها يوميا في حياتنا، هنطلع قوانين لأيه اللي ينفع وايه اللي ماينفعش في عالم الـ Social Media زي ما وضحت في المثال.

 

وبالتالي لو حد قالك تعالي اديك كورس، أعلمك فيه 10 ولا 100 قانون في السوشيال ميديا بمبلغ وقدره، قوله لا شكرا، انا عارف كل حاجة، اللي ينفع في الحياة الواقعية ينفع في السوشيال ميديا، واللى ماينفعش في الحياة الواقعية، ماينفعش في السوشيال ميديا.

 

يبقى  قوانين الواقع الحقيقي تنطبق بحذافيره على قوانين السوشيال ميديا.

 

اذن القاعدة رقم #3: ذاكر علم اجتماع وعلم نفس اجتماعي واعرف ازاى الناس بتتصرف فى وسط المجموعات، عشان تقدر تستخدم ده  فى دراسة سلوكهم وبالتالي التسويق ليهم باستخدام مواقع التواصل الإجتماعي بطريقة صحيحة.

 

الخلاصة: لو أنت مبتدئ فى التسويق من خلال مواقع التواصل الإجتماعي، فيه 3 علوم لازم يكون عنده فكرة قوية عنهم وهما: الـ Marketing، الـ Media، والـ Sociology.

 

كده وصلنا لنص المقال بالظبط، اللى فات مهم جدا، واللى جاي مهم جدا جدا.

 

أغلب الاختراعات/المنتجات/الخدمات/الافكار/الشركات اللى غيرت العالم اللي انت بتشوفها وهتشوفها اعتمدت بشكل كامل على واحد من العلوم التلاتة دول: الـ Business، الـ Technology، والـ Psychology.

 

المحور الرابع: يعني ايه Business؟

 

التسويق عبر شبكات التواصل الاجتماعي جزء من التسويق، والتسويق جزء من الـ Business، وإحنا قولنا يعني ايه SMM ويعني ايه تسويق.

 

يبقي ناقص لنا حاجة مهمة جدا – ومن وجهة نظري سبب في إخفاق ناس كتيرة في المجال ده في مصر – وهي يعني ايه Business؟

 

البيزنس هو عملية متكررة لخلق وتوصيل قيمة الناس  محتجاها او عايزها، بسعر مستعدين وقادرين يدفعوه، وبطريقة تشبع احتياجاتهم وتلبي توقعاتهم، وذلك حتى يستطيع العمل التجاري تحقيق الربح الذي يضمن له الاستمرار، لتكرار تلك العملية مرة أخرى.

 

كل كلمة في التعريف اللي فات ليها مدلول وتعتبر تاسك معين جوه أي شركة، ولو البيزنس فشل لا قدر الله، يبقى بسبب حاجة من الحاجات الموجودة في التعريف.

 

إذن القاعدة رقم #4: لازم تكون فاهم اساسيات انشاء الاعمال والمشاريع التجارية.

 

فاهم يعني ايه Value Creation، وأساسيات الـ Finance، والـ Branding إلخ.

 

وده عشان لو حصل مشكلة تكون عارف مصدرها أو الحتة اللي فيها خلل، مش تجري على طول وتقول على نفسك مش عارف تشتغل، أو العيب في الظروف او العيب فى اي حاجة.

 

العلم نور فعلا.

 

المحور الخامس: التكنولوجيا

 

الـ Social media عبارة عن مواقع إلكترونية، موجودة فين؟ أيوة على الإنترنت، والإنترنت ده أصلا تكنولوجيا!

 

إذا لازم نفهم تكنولوجيا عشان نعرف نتعامل ونستفيد الاستفادة القصوى من مواقع التواصل الإجتماعي.

 


 تاريخ الـ Marketing مرهون بتاريخ تطور التكنولوجيا …

 

اخترعوا الورق والحبر فـ أبتدي الناس تستخدمه في التسويق لأفكارها.

اخترعوا الراديو فـ أبتدي الناس تستخدمه في التسويق للى عايزينه.

اخترعوا التلفزيون فـ أبتدي الناس تستخدمه في التسويق لمنتجاتها.

اخترعوا التلفونات فـ أبتدي الناس تستخدمه في التسويق لنفسها.

اخترعوا الكومبيوترات والإيميلات فـ أبتدي الناس تستخدمه في التسويق اللى بتبيعه.

اخترعوا الإنترنت  فـ أبتدي الناس تستخدمه في التسويق لأفكارها وشركاتها.

 

مع كل إختراع من دول الـ Marketing كان واخد إتجاه معين وليه قواعد بينه ، إذن على حسب الاختراع اللي جاي ، هيتغير الـ Marketing تبعا ليه.


 

ماذا بعد سناب شات؟

 

لو مش فاهم تكنولوجيا عمرك ما هتعرف تجاوب على السؤال ده، ولا هتعرف تستخدم أصلا سناب شات في التسويق لشركتك.

 

ازاى الفيسبوك بيشتغل؟ ازاى تويتر بيرتب الأخبار والهاشتاج؟ ايه منهجية انستجرام في عرض الصور؟ وغيرها من الأسئلة اللي عشان تجاوبها لازم تفهم وتدرس التكنولوجيا اللي الشركات دى بنستخدمها.

 

بالشكل ده هتقدر تروح بالسوشيال ميديا لمستوى تاني أبعد من اللي وصل ليه أي حد.

 

المحور السادس: علم النفس

 

خدها قاعدة عامة كده، أي علم ليه صلة مع الإنسان، لازم تدرس جمبه علم نفس على طول.

 

طب تدرس العلم ده بشكل أكاديمي؟ طبعا لا.

 

علم النفس من وجهة نظري مهارة وعلم، مهارة ملاحظة وتحليل سلوكيات البشر، واللي بيثقل المهارة دى العلم نفسه.

 

إذن القاعدة رقم #6: لازم تدرس علم النفس، وتعرف أهم وأشهر قوانين اللي بتفسر سلوكيات البشر وبتقولنا ليه بنعمل كذا أما يحصل كذا، وهكذا.

 

وبكده أكون خلصت وشرحت لك الـ 6 محاور الاساسية اللى  تعتبر مصدر وأساس اي حاجة انت بتعملها وهتعملها او بتشوف حد بيعملها فى التسويق باستخدام شبكات التواصل الإجتماعي.

 

انا قدمت لك المفاتيح الرئيسية، ورشحت لك شوية لينكات، الباقي عليك. 

 

الأجزاء الستة اللي فاتوا دول يعتبروا بمثابة البنية التحتية عشان تكون قادر تشتغل الشغلانة دى صح، وعشان تقدر ترتقي من مستوى لمستوي لحد ما تقفل اللعبة، وعشان تساعدك في تكوين Mindset قوية وصحيحة من خلالها تقدر تحقق نجاحات استثنائية بإذن الله.

 

بالنسبة للتطبيق بقا؟

 

الحاجات اللى فوق دى زى ما انا لسه قايل Mindset و Foundation يعني الجذور.

 

اومال فين أرض المعمعة؟ اللى اتشرح كان التسويق عبر مواقع التواصل الاجتماعي كنظرية، أما كتطبيق، فالموضوع  مقسوم لـ 5 محاور رئيسية، وهما:

 

1- الـ Strategy

2- الـ Content

3- الـ Responding

4- الـ Advertising

5- الـ Analytics

 

دول خمسة أجزاء تنقسم ليهم الـ Social Media Marketing في الشغل العملي، ودول بقى موضوع الجزء الثاني.

 

دوس هنا عشان تقرا الجزء التاني وتبدأ فعليا فى التسويق باستخدام مواقع التواصل الإجتماعي.

 

التصنيفات: Content Marketing

33 تعليقات

Enas · 2017-06-20 في 10:44 ص

جزاكم الله خيرا :)
كلام مفيد وهارجعله تاني وتالت .. شكرا جزيلا.

    osamasalah · 2017-06-22 في 1:09 ص

    العفو يا إيناس ، ربك ينفع بيكي

      Amir Abdel aziz · 2018-04-16 في 1:27 م

      كلام محترم جدا و ذو قيمه كبيره الحقيقه :)

        Osama Salah · 2018-04-16 في 1:42 م

        أشكرك يا أمير ^^

ريهام · 2017-07-24 في 2:56 م

حلو جدا ومفيد رينا يجعله في ميزان حسناتك

    Osama Salah · 2017-07-28 في 10:53 م

    أشكرك يا ريهام جدا ^^

    تحت أمرك لو ليكي أي سؤال يخص علم وممارسات التسويق.

Ahmed Mohamed Saad · 2017-09-25 في 10:37 م

شكرا جدا هراجعه تانى ان شاء الله ^^
بس انا مسجل من فتره وما فيش حاجه ةصلتنى على ال gmail ؟

    Osama Salah · 2017-09-26 في 7:03 ص

    أشكرك يا احمد ^^

    بالنسبة للكورس ، فدور فى الايميل باسمي Osama Salah وهيظهر لك باذن الله.

Rabie Hamdy · 2017-10-25 في 6:50 ص

مميز

    Osama Salah · 2017-10-25 في 7:47 ص

    أشكرك

Abdulrahman · 2017-11-04 في 3:25 م

شكرا

    Osama Salah · 2017-11-04 في 5:16 م

    على الرحب والسعة يا عبد الرحمن ^^

Mohamed dahab · 2018-03-20 في 7:21 م

اشكرك جدا علي هذا المقال الرائع
بالنسبه لي بحثت كتير عن اني اتعلم علم النفس التطبيقي
فعلي سبيل المثال قرات في الأدب وكتاب ديل كارنيجي
ولكني لم اصل بعد فاذا تكرمت ترشدني علي طريقه سيادتك اتبعتها او طريقه اخري لكي ابدك في تعلم هذا العلم
وجزاك الله خيرا

    Osama Salah · 2018-03-21 في 12:24 م

    ازيك يا محمد، اولا اشكرك جدا ^^

    اقرا كتاب Influence: The Psychology of Persuasion او الملخص بتاعه ، وعامة اقرا فى علم النفس لناس مختلفة، بس انت بتقرا وانت عارف المفروض اللى بتقراه ده مكانه فين فى التسويق، فاهمني؟

Mohamed dahab · 2018-03-21 في 12:42 م

اشكرك علي ردك
طيب زي مين الناس ديه ياريت لو حضرتك تقولي اسماء
ثانيا أنا معنديش خلفيه عن التسويق انا لسه ببدا من خلال مقالات حضرتك فمش هعرف مكانها فين في التسويق
ثالثا يبقي جزاك الله خيرا إذا حضرتك تقولي علي دبلومه offline حضرتك هتحاضرها قريب عشان بجد استفد من سيادتك جدا ومحتاج جدا تكون سيادتك إلي بتحاضر
وجزاك الله خيرا

    Osama Salah · 2018-03-21 في 1:39 م

    أولا يا محمد ، فعلا مش عارف أشكرك ازاى على الكلام الجميل ده ^^

    بص يا ريس، لو لسه ماقريتش مقال اساسيات التسويق ، لازم تقراه حالا.

    ثانيا انا مش فى خطتي للنص الاول من السنة انى اعمل حاجة اوف لاين او دبلومة كاملة ولكن لو انت محتاجها اوى ممكن جيب اتنين معاك تكون ظروفكم متشابهة وانا تحت امرك وامرهم ^^

    بالنسبة للناس اللى بتتكلم فى علم النفس من وجهة نظر التسويق ، دول شوية منهم:

    Robert Cialdini و Roger Dooley و Nir Eyal و Martin Lindstrom و عندك الاخوة Chip Heath و Dan Heath و فيه غيرهم بس دول اللى انا فاكرهم دلوقتي ، وطبعا ماتنساش تقرا فى مدوانت زي Buffer او عامة اكتب فى جوجل Marketing و Psychology وهيظهر لك مقالات مهمة جدا.

    تحياتي ^^

      Mohamed dahab · 2018-03-22 في 1:44 م

      الشكر لله يا فندم
      أولا ده مش كلام ده حقيقه فعلا وربنا ينفع بيك يارب
      ثانيا استأذن حضرتك ترسلي وسيله تواصل مع سيادتك
      وجزاك الله خيرا

        Osama Salah · 2018-03-23 في 3:33 م

        الإيميل الشخصي osama.salah089@gmail.com

        رقمي و قم الواتس اب 01142590309

        الوسيلة اللى تحبها متاحة بالنسبة لى.

        تحياتي ^^

samuelgerges · 2018-06-05 في 4:12 م

مساء الخير يافندم،
بجد حضرتك من أفضل الناس اللي ساعدتني في بداية الطريق اني أفهم الليلة ماشية ازاي.
استأذنك ايه أفضل مصدر أتعلم منه business عن طريق النت؟؟ للأسف صعب علي اني أسافر لارتباطي بالعمل غير ان الكورسات بيبقى سعرها غالي جدًا جدًا.

    Osama Salah · 2018-06-07 في 4:55 ص

    صباح الخير يا افندم، بعتذرلك على التاخير فى الرد.

    أشكرك على رايك العظيم بالنسبة لى ^^

    اعتقد إنك لازم تبدأ تقرا عند Harvard Business Review و Fast Company و Inc. (magazine) ، والافضل طبعا تتابع ناس بتتكلم فى البيزنس وتشوف دراسات وحالات فى البيزنس والاهم والاهم إنك تلاحظ ، تلاحظ كل حاجة حواليك لإن كل حاجة حواليك هي بيزنس.

Salma Abdel Rahman · 2018-08-06 في 9:47 م

السلام عليكم شكرا جدا ليك ع المقالات الرائعه والمفيده جدا
بس في نقطه مش فهماها وهي Owned Media

    Osama Salah · 2018-08-07 في 8:55 م

    وعليكم السلام ورحمة الله وبركاته يا سلمي ^^

    الـ Owned Media إن الشركة يكون عندها منبر إعلامي خاص بيها ملكها مش بتدفع إيجاره كل شهر، وتكون متحكملة فيه بمزاجها تحط اللى هي عايزه فى اي وقت وتتحكم فى اللى يشوفه كمان.

    على عكس الميديا المعتادة اللى هي مدفوعة وليكن مثلا قناة على التلفيزيون، الجمهور مش بتاعك، ده جمهور القناة او البرنامج او المسلسل وهيسمع رسالتك التسويقية غصب عنه، يعني قلما تلاقيه مهتم، القناة حقها توافق على المحتوى او لا، مدة والمحتوى بتاعك هيتشال، ولو هيفضل فكل شهر هتدفع شئ وشويات، فهمتي؟

لوشا · 2018-10-02 في 9:28 م

اكثر شي مفيد ومختصر ومقنن قريته هذي السنة ماشاء الله لا قوة الا بالله .. نفع الله بك ي اخي ابدعت واثريت المحتوى العربي
جزيت خيرا

    Osama Salah · 2018-10-03 في 10:45 ص

    أشكرك جدا على الفيدباك الرائع ده يا لوشا ^^

Abdelrahman Mahmoud · 2018-10-27 في 6:34 م

السلام عليكم انا مسؤل دعايه وعلاقات ف جمعيه اهليه غير هادفه للربح وف منحه 3 شهور عن social media markting مقدمه من معهد تكنولوجيا المعلومات iti ومش عارفه اقنع الناس بيها وباهميتها ف سوق العمل اعمل ايه واقولهم ايه

    Osama Salah · 2018-10-28 في 1:12 ص

    بسيطة، شوف المنحة دي هتعود عليهم بايه، وقول لهم ده، وفكرهم باللى هيخسروه لو ماخدوش المنحة دى، وفكرهم برضو باللى هيكسبوه، وطبق المقال ده حرف حرف

    https://osamasalah.com/sales-content

F123 · 2018-11-07 في 1:03 ص

المقال اكثر من رائع الصراحة لامم الموضوع بطريقة حلوة . انا حفظت الموقع في bookmarks وبقيت اديه لاصحابي المهتمين بالمجال ?. شكرا كتير لمجهودك .
كنت حابة بس ترشيح لكتب او فيديوهات او مقالات للاساسيات الستة الي في المقال . يعني حاجة للمبتئين لكن مغطية الموضوع . انا نزلت influence the psychology of persuasion الي حضرتك رشحته وحابة لو ينفع حاجة زيه في باقي الاساسيات . هتكون مساعدة عظيمة بجد ?

    Osama Salah · 2018-11-08 في 10:39 م

    أشكرك جدا جدا يا أفنان على دعمك ^^

    بالنسبة لطلبك حاضر هاعمله فى مقال منفصل.

    أشكرك ^^

Jomana · 2019-01-22 في 10:03 ص

انا فعلا بعاني في مجال الماركتنج في مصر جدا. انا اصلا خبرتي توازي سنين تثؤيبا اساسها كانت PR بالاخص ازاي احل مشاكل العملاء في مجال السياحه والتعليم وشركات كبيره وقررت اعمل ماجيستير وبالفعل عملت MBA ماجيستير اداره اعمال قسم تسويق.

انا بقالي سنه ونص بدرس في الاول كنت مبسوطه جدا بالمجال لانه صوت العميل اللي هوه اصلا موهبتي واساس خبرتي وفهم احتياجته وازاي تقدر تحل مشاكله مع القوه الشرائيه ليه. لكن بصراحه لما حاولت انزل سوق العمل التسويقي كميه الكفته اللي شوفتها وكميه الفتي اللي بعيده كل البعد عن المعني الحقيقي للتسويق انا احبطت جدا.

فيه ناس كتير استاذ اسامه اصلا مش مدركه الفرق بين التسويق والمبيعات. وده عشان اغلبهم داخلوها حرفنه مش علم خالص. زي بالظبط لما تلاقي نقاش بيقول علي نفسه مهندس ديكور والمصيبه ان فيه طبقه بتصدقه وده مش بيقع لواحده ده بيوقع كل الناس اللي بتشتغل وبتدرس سنين عشان تقدر تطلع كلمه من بقها قبل ما تتكلم.

مقالاتك رائعه واحب اعرفك انك تقريبا انت وقله قليله جدا من المصريين او العرب عموماَ اللي بتابعهم لانهم فاهمين بيقولوا ايه مش بيعملوا عجين او بيع كلام والسلام. انا بشكرك وربنا يوفقك

    Osama Salah · 2019-01-23 في 12:36 ص

    حقيقي كنت مستمتع جدا وانا بقرا الفيدباك بتاعك عن السوق، لان بيوثق حاجة حقيقة ملموسة فى السوق، بس عندى راي مختلف، السوق هيفصل فيه ناس وحشة وناس نص نص وناس حلوة اوى، الفكرة فى المحالاوت اللى بيبذلها كل واحد فينا لحد ما يحين اللحظة ويوصل للنقطة اللى بيطمح فيها.

    أتمنى لكي كل التوفيق، وأشكرك جدا جدا على رايك المهم جدا بالنسبة لى.

    تحياتي ^^

mohamed ibrahim · 2018-06-01 في 11:19 م

جميل جدا وكل كلمه لها مدلول معين كفايه اني اقول انك رتبتلي افكاري …..واتمني باقي المقالات تكون بنفس المستوي

Osama Salah · 2018-06-03 في 11:39 ص

أشكرك يا محمد وأتمنى نفس أمنيتك ^^

أساسيات الـ Social Media Marketing (الجزء الثاني) - Osama Salah · 2017-06-13 في 3:35 م

[…] الجزء الأول من السلسلة دى، اتكلمنا عن خارطة علم الـ Social Media Marketing من […]

اسال او استفسر او قول رايك ...

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.