fbpx

 

التسويق بالمحتوى علم حديث نسبيا، بدأ بشكل منظم من 2007 بس!

 

مفهوم التسويق بالمحتوى موجود من زمان جدا، ولكن كعلم ممنهج يقدر عموم الناس تاخده وتذاكره وتتخصص فيه ماكانش موجود قبل 2007.

 

وانتشر اكتر واكتر في أواخر 2014.

 

ودى صورة من موقع Google Trends بتوضح عمليات البحث اللي حصلت على مصطلح الـ Content Marketing من 2004 لحد انهاردة.

 

زي ماهو واضح كده، العلم ابتدى الناس تسأل عنه وتتعرف عليه في 2007، ولكن انتشر بصورة كبيرة في أواخر 2014.

 

التسويق بالمحتوى

 

يعني احنا بنتكلم فى 4 سنين تقريبا!ّ

 

4 سنين رقم قليل جدا على حوكمة وتنظيم أي علم.

 

عشان كده لحد دلوقتي فيه انتشار لمعلومات مغلوطة أو مش دقيقة عن التسويق بالمحتوى.

 

في رأيي الشخصي فيه 4 أسباب لإنتشار المعلومات المغلوطة والغير دقيقة عن التسويق بالمحتوى، وهي:

 

1- عدم الصبر والاستعجال والجرى وراء أي حد بيقول “هتبقي … بسرعة”.

 

2- الـ Over Simplifying أو التبسيط لدرجة التشويه وفقدان الشئ معناه الأصلي.

 

3- غياب خارطة الطريق أو البوصلة والشغل بدون معرفة ايه معايير الصح والغلط.

 

4- كثرة الكتب والنظريات والاستراتيجيات والأدوات مع غياب طريقة الاختيار واستخدام كل استراتجية/طريقة/فكرة/أداة.

 

واحدة من المعلومات المغلوطة في مجال التسويق بالمحتوى هي:

 

التسويق بالمحتوى (Content Marketing) هو هو التسويق الضمني أو التسويق الداخلي (Inbound Marketing) ومفيش فرق بينه وبين كتابة المحتوى (Content Writing) أو كتابة الاعلانات (Copywriting).

 

في المقال ده هنوضح الفروق بين كل المصطلحات دي بشكل واضح لا يدع مجال للشك.

 

يلا بينا …

 

ما هو التسويق بالمحتوى ببساطة؟

 

التسويق بالمحتوى (Content Marketing) عبارة عن استراتيجية تسويقية الغرض منها زيادة عدد الزبائن/العملاء بتكلفة أقل من تكلفة الإعلانات عن طريق كتابة ونشر معلومات مفيدة وذات صلة بمجال عملك، وذات صلة باهتمامات الزبائن/العملاء المحتملين باستمرار على المواقع الإلكترونية ووسائل التواصل الإجتماعي.

 

يعني كتابة المحتوى جزء من أجزاء التسويق بالمحتوى.

 

اينعم هو 50% من عملية التسويق بالمحتوى إنما مش كل العملية.

 

طب ايه باقي أجزاء التسويق بالمحتوى؟

 

– استراتيجية التسويق بالمحتوى (Content Marketing Strategy)

 

– ادراة التسويق بالمحتوى (Content Marketing Management)

 

– خطة المحتوى لكل قناة تسويقية (Content/Channel Plan)

 

– صناعة/كتابة/خلق المحتوى

 

– توزيع وترويج المحتوى (Content Distribution)

 

– تجربة المحتوى (Content Experience)

 

– تحليلات المحتوى (Content Analytics)

 

– المحتوى المٌجمع (Content Curation)

 

– المحتوى المٌعاد شكله (Content Repurposing)

 

– المحتوى المعٌاد تدويره (Content Recycling)

 

– المحتوى الفيروسي (Viral Content)

 

وحاجات تانية كتير.

 

الموضوع مش بس كتابة محتوى، الموضوع تسويق بالمحتوى.

 

انت مش كاتب محتوى، انت مسوق بالمحتوى، يعني دورك تعمل تسويق لاي منتج/خدمة باستخدام المحتوى.

 

انت لا كاتب، ولا صحفي، انت مسوق.

 

وضحت؟

 

يعني ايه التسويق الضمني أو التسويق الداخلي (Inbound Marketing)؟

 

سنة 2007 تم تأسيس شركة Hubspot، وتأسيس معاها مدرسة تسويقية اسمها الـ Inbound Marketing.

 

الـ Inbound Marketing باختصار شديد هو أي فعل أو فكرة او نشاط تسويقي يخلي الجمهور المستهدف يجي للبيزنس بتاعك، عن طريق إنه يلاقي عندك اللي بيدور عليه.

 

على عكس الـ Outbound Marketing اللي هو عبارة عن أي فعل أو فكرة أو نشاط تسويقي بيتم فيه مطاردة الزبون في كل مكان بمحتوى مش مهتم بيه ولا عايز يسمعه.

 

مبدأ الـ Inbound مبني على إنك بتمشي مع العميل خطوة بخطوة من أول مرحلة إنه لسه ما يعرفكش، لمرحلة إنه بيحبك ومستعد يشتري منك أي منتج/خدمة جديدة هتقدمها.

 

نفس مبدأ الـ Permission Marketing.

 

أداة تنفيذ الـ Inbound Marketing هو المحتوى.

 

ازاى؟

 

إنتاج محتوى مجاني عالي الجودة (في جميع قنوات التسويق عبر الانترنت زي الموقع الإلكتروني، الفيسبوك، انستجرام، محركات البحث، الايميل وغيرهم) فيه إجابة أو حل لمشكلة حقيقية بتواجه الجمهور المستهدف، وبكده تقدر تخلي الجمهور المستهدف يدفع انتباهه وتاخد الاذن منه عشان تسوق له.

 

وبخطوات ممنهجة تبتدى تتواصل مع الجمهور ده، عشان تعمل له حاجة اسمها Nurting أو رعاية، وهي باختصار تطوير العلاقة معاه، وتجهيزه لإنه يشتري.

 

يعني في الـ Inbound Marketing بنبيع، وبنبيع بشكل مباشر، الفرق الوحيد، إننا مش بنبيع على طول، ولا بنبيع لاي حد.

 

فهمت؟

 

الـ Inbound مش مكلف ماديا، ولكن مكلف من حيث الوقت والمجهود لأنه بيتطلب عمل محتوى أصلي عالي الجودة، من خلاله الجمهور المستهدف بيديك الثقة والـ Authority، اللي هما أهم حاجتين عشان تحقق مبيعات اون لاين.

 

كل مدرسة تسويقية ليها منهج بتمشي عليها عشان تثبت وجهة نظرها، الـ Inbound Marketers عندهم منهجية بيمشوا عليها برضو اسمها:

 

The Inbound Methodology.

 

الـ Inbound Methodology كانت أربعة مراحل اللي هما:

 

Attract – Convert – Close – Delight

 

ودى الصورة اللي كانت بتعبر عنها …

 

ولكن الكلام ده أختلف دلوقتي بعد تعديلات عملوها بتوع Hubspot عشان الـ Inbound Methodology تكون 3 مراحل بس، وهما:

 

 

التسويق بالمحتوى

 

Attract – Engage – Delight.

 

يعني باختصار تجذب عملاء محتملين من خلال إنتاج محتوى عالي الجودة في الويب سايت بتاعك وترويج المحتوى على وسائل التواصل الاجتماعي ومحركات البحث.

 

وبعدين تتفاعل معاهم كأنك صديق حميم من خلال الايميل أو أي وسيلة تواصل شخصية.

 

وبعدين تدلعهم وتميزهم عن أي حد تاني عن طريق انك تكون ليهم كمستشار العائلة كده.

 

إذن الجهود التسويقية لازم تركز إنها تخلي عدد كبير من الناس تزور موقعك وتتفاعل معاك على وسائل التواصل الاجتماعي، ونسبة منهم تكون Leads، ونسبة منهم تكون زبائن/عملاء بالفعل.

 

أي حاجة تانية مش مهمة.

 

إذن الـ Inbound Marketing عبارة عن مدرسة تسويقية أو اتجاه تسويقي، إنما التسويق بالمحتوى عبارة عن الاستراتيجية أو الطريقة الامثل لتنفيذ مبادئ المدرسة دي، وكتابة المحتوى هي الفعل التنفيذي اللي بيطبق مبادئ التسويق بالمحتوى.

 

فهمت؟

 

يعني ايه Copywriting؟

 

فيه خلط كبير بين كتابة المحتوى (Content/Creation/Writing)، وكتابة الإعلانات أو كتابة النسخ اللي هي اسمها Copywriting، ناس تقولك مفيش فرق، وناس تقولك اللي بيشتغل ده يشتغل ده ولغبطة!

 

يعني ايه Copywriting؟

 

الـ Copywriting هو فن وعلم كتابة Copy.

 

يعني ايه Copy؟

 

الـ Copy عبارة عن محتوى الغرض منه اقناع الزبون المحتمل بمنتج أو خدمة معينة و التأثير على قراره الشرائي عشان يشتري المنتج/الخدمة.

 

وصف المنتجات في مواقع التجارة الإلكترونية (الـ Ecommerce) يعتبر Copy، الايميلات اللي بتيجي لك وغرضها البيع عبارة عن Copy، الاعلانات اللي بتشوفها على النت دي برضو Copy، المحتوى اللي بيكون فى الـ Landing Pages و الـ Sales Pages برضو عبارة عن Copy بيكتبها الشخص اللي اسمه Copywriter.

 

الـ Copywriter بيكتب عنوان أي قطعة محتوى، وبيكتب الـ Call to Actions كمان.

 

باختصار أي كلام في البيزنس غرضه البيع، بيكتبه الـ Copywriter.

 

إنما المحتوى التعليمي، المحتوى اللي بيشرح ويبسط معلومات معقدة، محتوى المدونات، محتوى الفيديوهات، محتوى الانفوجرافيك، محتوى المقالات …

 

كل ده بيكتبه كاتب المحتوى، وبيخطط ليه المسوق بالمحتوى.

 

طب هو ينفع بتاع المحتوى يكتب Sales Page يعني يعمل شغل الـ Copywriter؟

 

اه طبعا.

 

الـ Copywriting مهارة أساسية من مهارات المسوق بالمحتوى المحترف.

 

طيب إذا كان كتابة محتوى يبيع من اختصاص الـ Copywriter، اومال كتابة محتوى لمحركات البحث ومتوافق مع قواعد الـ SEO من اختصاص مين؟

 

يعني ايه كتابة محتوى لمحركات البحث؟

 

يعني ايه SEO Content؟

 

الـ SEO Content عبارة عن محتوى معمول بغرض الظهور في نتائج بحث جوجل بكلمات وجمل معينة في النتائج الأولي.

 

واللى بيكتب المحتوى ده ممكن يكون Copywriter وهنا اسمها SEO Copywriter، وممكن يكون كاتب محتوى في الأساس وهنا بيكون اسمه SEO Content Writer.

 

الخلاصة: ملكش دعوة بالمسميات لأنها مضيعة للوقت، ركز على التاسك المطلوب منك تنفيذه، وشوف ايه هي الأدوات والمهارات اللي هتحتاجها عشان تنجزه.

 

وكل ما تحترف عمل تاسك، ادخل على اللي بعده لحد ما توصل لدرجة الاحتراف النهائية (Master).

 

طالما وصلت لحد السطر ده يبقى انت إما مبتدئ وعايز تتعلم التسويق بالمحتوى، وهنا لازم الاول تتعلم كتابة المحتوى على أصول علمية، وفى الموضوع ده عملت لك كورس مجاني.

 

قيمة الكورس تتعدى 1000 جنيه، ولكن انت هتاخده مجانا.

 

دوس هنا عشان تاخد الكورس (لينك التسجيل في اخر الصفحة اللي انت هتدخل عليها).

 

أما أذا كنت متوسط المستوى، عشان كده عملت لك مجموعة من الكتب المجانية اللي هتساعدك تكون افضل.

 

دوس هنا واقرأ تفاصيل كل كتاب، واللى تحسه بيحل لك مشكلة أو تحدي أو هيساعدك تكون افضل نزله (الكتب كلها مجانية).

 

اخر حاجة وهو طلب شخصي!

 

ممكن في التعليقات تحت، تقولي ايه التحدي أو المشكلة اللي بتقابلك في التسويق بالمحتوى؟

 

يعني مثلا تحديد وفهم الزبون المحتمل، افكار المحتوى، كتابة المحتوى … الخ.

 

انا هرد على كل تعليق بنفسي.

 

التصنيفات: Content Marketing

4 تعليقات

Mohamed Elisely · 2019-03-12 في 9:31 م

مشكلتي دايما في الافكار وبعد ما اوصل لفكرة حلوة ،، وأكتب المحتوي مش بيعجبني خاالص ، بفكر كتير في الي هيقرأ المحتوي وبحاول اشوفه بعينه واشوف هيتأثر بيه ازاي ويتفاعل ازاي ،،، واكتر حاجة محبطة بعد ما يتنشر لو التفاعل عليه كان اقل بكيتر من المتوقع

    Osama Salah · 2019-03-13 في 6:38 ص

    طب قولي يا محمد، انت ماعندكش ازمة انك تجيب افكار كتيرة فى وقت قليل؟ ولا ازمتك فى انك تجيب افكار حلوة؟ ولا الازمة فى تنفيذ الافكار دي بطريقة حلوة؟

Bahaa Aldeen Farouk · 2019-03-15 في 10:44 م

المحتوى اللي بكتبه الحمد لله بيكون عليه تفاعل كويس جدا و بيكون فيه أكتر من 1500 واحد مهتم بالمنتج و لكن الطلب على الشراء مش بيكون بالحجم المتوقع مع العلم أن ببعت التفاصيل في ملف pdf لكن واحد مهتم , و لكن بحس المردود مش متناسب مع عدد المهتمين بالموضوع
المجال تسويق الرحلات السياحيه

    Osama Salah · 2019-03-16 في 9:15 ص

    هل الجمهور عايز ومستعد يدفع تمن العرض بتاعك؟ ونسبته قد ايه؟

    يعني 1500 منهم كام واحد اشتري؟

اسال او استفسر او قول رايك ...

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.