fbpx

كتابة المحتوى خطوة بخطوة لغير المحترفين

كتابة المحتوى من المواضيع التي قٌتلت بحثا في الويب العربي، ولكن بالرغم من أهمية الموضوع إلا أن المقالات أو المصادر التعليمية اللي بتغطي الموضوع ده قليلة اوى، وتقريبا كلهم مصادر ضعيفة ماعدا كام مصدر كده!

 

كتابة المحتوى من أهم المهارات الواجب توافرها في أي مسوق بالمحتوى، ومفيش شركة دلوقتي بتطلب ناس تشتغل في السوشيال ميديا أو في الـ SEO أو في التسويق بالمحتوى أو الإعلانات عبر الإنترنت إلا وتشترط وجود مهارة كتابة المحتوى!

 

عشان كده في المقال ده، هشرح من واقع خبرتي ازاى تكتب محتوى ابداعي بطريقة مناسبة للجمهور المستهدف، وفي الوقت ذاته مناسب لطبيعة مجال البيزنس.

 

في البداية احب اجاوب على كام سؤال ممكن يكونوا بيدوروا فى دماغك!

 

1- هو المحتوى ده مكتوب لأنهي مستوى و لأنهي ناس بالظبط؟

 

أولا المحتوى ده موجه لكل واحد شغال في مجالات التسويق عبر الإنترنت وبيمارس التسويق بالمحتوى.

 

بتوع الـ SMM (اختصارا لـ Social Media Marketing) بيكتبوا محتوى، وبتوع الـ SEO بيكتبوا محتوى، وبتوع الـ eMail Marketing بيكتبوا محتوى، بتوع الـ Affiliate بيعلموا محتوى.

 

أصحاب الـ Startups المفروض يكتبوا محتوى كطريقة تسويقية غير مكلفة من حيث الأموال ولكن طبعا مكلفة وقت وجهد كبار!

 

ثانيا المحتوى ده موجه للمسوقين من جميع المستويات ماعدا المستوى المتقدم، يعني من المبتدئين وانت طالع!

 

2- كتابة المحتوى هتكون كتابة انهي نوع بالظبط؟

 

بص يا سيدي، إحنا اتفقنا قبل كده في كورس الـ Content Creation المجاني إن أصل اي محتوى هو مكتوب!

 

وقولنا أن أنواع المحتوى أصلا تلاتة بس، وهما المكتوب والمسموع و المرئي.

 

وبيختلف وبيتشكل كل نوع من المحتوى عشان يديني مثلا المقال والقائمة والفيديو والانفوجرافيك الخ.

 

في المقال ده هتكلم على كتابة المحتوى المكتوب، وهقول بعض الملاحظات السريعة في النوعين التانيين.

 

3- كتابة المحتوى لانهي قناة تسويقية بالظبط؟

 

أكيد انت بتسال دلوقتي، طيب يا عم أسامة اللي هتشرحه ده هيكون كتابة المحتوى للفيسبوك ولا لـ لينكدان ولا كتابة المحتوى للمواقع ولا لمحركات البحث ولا ايه بالظبط؟

 

بصفة أساسية هنتكلم عن كتابة المحتوى لـ المدونات و محركات البحث و للفيسبوك.

 

لو عندك اي تساؤل تاني، سيب تعليق وهرد عليك في الحال.

 

يلا بينا نبدأ في شرح كتابة المحتوى خطوة بخطوة …

 

ما قبل كتابة المحتوى

 

فيه 7 أمور أساسية لازم تكون حاططهم في بالك قبل ما تكتب المحتوى، وهما:

 

1- الجمهور المستهدف

 

بص من غير الدخول في تفاصيل كتيرة، انت دلوقتي المفروض شغال في شركة، وعندك استراتيجية تسويق فيها صفحة أو اكتر عن الجمهور المستهدف.

 

المطلوب منك تحدد شريحة واحدة بس منهم عشان توجه لهم قطعة المحتوى اللي هتعملها باذن الله.

 

طب لو انت اصلا مش عارف الجمهور المستهدف يكون مين، تعمل ايه؟

 

موضوع تحديد وفهم الجمهور المستهدف ده يتعمل فيه كتاب مش مقال، فلو مهتم قولي في تعليق وانا هعمله.

 

2- صوت البراند

 

من أهم الغلطات اللي بيقع فيها اي حد بيعمل محتوى، إنه بيكتب بأسلوبه الشخصي!

 

وده مش مشكلة لان كده كده أسلوبه وفكره لازم هيظهر في المحتوى غصب عنه، ولكن اللي اقصده إن المحتوى مش المفروض يوصل فكر و أحاسيس كاتبه، إنما يوصل رسالة وإحساس البراند.

 

بصوا يا معلمين …

 

البراند زي الإنسان بالظبط، الإنسان أما بيتكلم الإنسان الآخر بيعرف عنه شوية حاجات.

 

وهنا مربط الفرس، كل إناء ينضح بما فيه!

 

إذن لازم تكون – كـ كاتب محتوى – عارف ومتقمص شخصية البراند اللي منها طالع صوت البراند وبكده المحتوى بتاعك يطلع يجيب جون على طول.

 

بس فيه مشكلة كبيرة بقي، وهي أن معظم الشركات في السوق المصري مش بيكون عندها أصلا صوت محدد تتكلم بيه!

 

ولكن ده مش عذر للناس اللي بتكتب بصوتها مش بصوت البراند.

 

انت بتقول ايه؟ وبتقوله ازاى؟ وبتقوله ليه؟

 

مثلا انا بتكلم عن التسويق بالمحتوى، بأسلوب علمي منمق ودود، عشان أعلم و أؤثر في حياة الناس العملية والشخصية.

 

السطرين اللي فوق دول عبارة عن صوت البراند الشخصي بتاعي.

 

3- هدف المحتوى

 

تاني أكبر غلطة بيقع فيها كتير من صانعي المحتوى هي عدم تحديد هدف يتسم بالوضوح.

 

هدف البيزنس ← هدف التسويق ← هدف المحتوى

 

هدف البيزنس زيادة الإيرادات، التسويق يقول نزود المبيعات، التسويق بالمحتوى يقول نزود عدد الـ Leads.

 

هدف البيزنس زيادة الإيرادات، التسويق يقول تقلل تكلفة الإعلانات، التسويق بالمحتوى يقول نعمل محتوى بهدف Brand Awareness أو نعمل Viral Content، فهمت الفكرة؟

 

لازم تكون واضح جدا من اللي انت عايزه من قطعة المحتوى، يعني عايز الناس تدخل على لينك معين عشان يبقوا Leads؟ عايز الناس تتفاعل؟ عايز الناس تشير؟ عايز الناس بس تقرا؟ عايز ايه؟

 

خد بالك إن الهدف يؤثر بطريقة كبيرة في طريقة كتابة المحتوى، فضلا عن إن المحتوى نفسه بيكون مختلف.

 

4- نوع وشكل المحتوى

 

هل المحتوى مكتوب أو مسموع أو مرئي؟ وهل هو مقال أو انفوجرافيك ولا ايه؟

 

في انتاج المحتوى، غالبا بيكون فيه شخصين، الشخص اللي بيكتب المحتوى، والشخص اللي بيكمل عملية انتاجه، يعني مثلا لو نوع المحتوى صوتي، فانت هتكتب المحتوى، وفيه حد هيسجل الكلام زي ما انت كاتبه بالظبط!

 

من 6 سنين تقريبا، أما كنت في School of Marketing عملت قطعة محتوى صوتية عن الـ Call to Action، وكان فيها غلطات كتيرة ظهرت في الصوت!

 

كتابة المحتوى

 

من ضمن الغلطات كان الـ Call to Action نفسه، واللى ماينفعش يتقال لواحد بيسمع!

 

هو مناسب جدا لو واحد كان بيقرا، شفت بقى ازاى تفصيلة صغيرة قلبت الدنيا.

 

عشان كده لازم تحدد نوع وشكل المحتوى اللي هيطلع قبل ما تكتب اي حرف.

 

كان نفسي تكون قطعة المحتوى الأصلية موجودة، ولكنها اتمسحت من على موقع اقرا لي لأسباب تقنية لا يعلمها إلا الله.

 

5- القناة التسويقية الأساسية

 

البيت الأساسي بتاع المحتوى بتاعك فين؟ على الفيسبوك؟ على لينكدان؟ على الموقع؟ في كتاب إلكتروني؟ فين بالظبط؟

 

طبعا ممكن تحط المحتوى بتاعك في حتت تانية كتوزيع وترويج ليه، إنما انا اقصد المكان الاساسي بتاعه لان ده هيفرق في كتابة المحتوى.

 

6- الرسالة التسويقية والعرض

 

المحتوى لازم يعمل تسويق، وتسويق يعني خلق الطلب على منتج معين، إذن فيه حاجتين لازم نكون عاملين حسابهم قبل ما نكتب المحتوى.

 

أول حاجة هي الرسالة التسويقية للمحتوى …

 

الرسالة التسويقية للمحتوى اللي انت بتقراه دلوقتي هي:

 

“كتابة المحتوى حاجة أساسية لكل مسوق، ومفيش شركة أو شخص اتكلم عن الموضوع ده بشكل عملي، المقال اللي بين ايدك بيقوم بالمهمة دى”.

 

والكلام ده تقدر تلاحظه في أول فقرتين في المقال، والرسالة العامة نفسها هتلاقيها في العنوان.

 

عشان تعمل رسالة تسويقية، شوف انت عايز تتواصل مع مين (المسوقين غير المحترفين)، وهتقول لهم ايه (كتابة المحتوى)، وليه هما المفروض يهتموا (خطوة بخطوة من خلال خبرة عملية).

 

فهمت يا ريس؟

 

تاني حاجة هي العرض أو الـ Offer …

 

بصوا بقي عشان الحتة دى معرقبة شوية، بس أحسن حاجة تشرح بيها حاجة معرقبة هي المثال …

 

لو دخلت على مدونة Hubspot مستحيل تلاقي مقال عندهم من غير عرض.

 

ادخل أي مقال عندهم وانت هتلاقي في اخره Ebook ليه علاقة بالموضوع، عشان ينقولك لمرحلة تانية في الـ Marketing Funnel بتاعهم لحد ما تشتري.

 

بس مش كل محتوى بيكون شايل عرض، ممكن جدا المحتوى مايكونش فيه عرض، ولكن يكون فيه Sales Pitch في اخره.

 

وطبعا ممكن جدا يكون المحتوى مفيهوش عرض، براحتك!

 

7- هيكل المحتوى

 

في كورس الـ Content Creation وتحديدا في الإيميل رقم 10، شرحت 9 أشكال مختلفة من المحتوى وهيكل كل منهم.

 

لكن!

 

أصلا كل أشكال المحتوى اللي في الدنيا، بيتم هيكلتها حسب هيكل واحد أساسي وهو:

 

العنوان (Headlines)

المقدمة (Introduction)

الجسم (Body)

الملخص (Summary)

الطلب (Call to Action)

 

مهما أختلف شكل المحتوى، هتلاقي بيمشي حسب الهيكل ده، وهو ده اللي هنشرحه بالتفصيل دلوقتي في جزئية كتابة المحتوى.

 

كتابة المحتوى

 

انت كده بقيت عارف ايه اللي المفروض تكون عارفه قبل ما تكتب المحتوى، ودلوقتي هندخل في تفاصيل الكتابة بقي.

 

كتابة العنوان

 

العنوان هو أول حاجة المفروض تكتبها في قطعة المحتوى كلها، ومسموح لك تصرف عليها وقت قد اللي هتصرفه على المحتوى كله.

 

وده طبعا نظرا لأهميته القصوي اللي بتتلخص في إنه العامل الجذاب رقم واحد بالنسبة للجمهور المستهدف واللى على أساسه بياخدوا قرار يشوفوا المحتوى بتاعك ولا ينفضوا.

 

انا علمت كتاب مخصوص عن موضوع كتابة العنوان ده!

 

الكتاب فيه أكتر من 47 مثال عملي من واقع السوق العربي والمصري، بشرح عليهم أهم القواعد لكتابة العنوان، وأهم الكلمات اللي لازم تبقى موجودة في كل عنوان.

 

كتابة المقدمة

 

المقدمة هي تاني حاجة بتشجع الجمهور المستهدف انه يكمل المحتوى بعد العنوان.

 

المقدمة تعتبر المشهد الافتتاحي من اي فيلم، فيه ناس بتبدا المشهد بتعريف الأبطال والحدوتة، وفيه ناس بتبدأ بحاجات غير متوقعة، وفيه ناس بتجيب مشهد النهاية وبعدين تشرح ايه اللي وصلنا للنقطة دى.

 

كل دى طرق لكتابة مقدمة المحتوى، المقياس الوحيد لجودة المقدمة هي انه تشد انتباه الجمهور المستهدف وتخليه يكمل المحتوى للأخر.

 

نيل باتل بيقول أن فيه 3 عناصر لأي مقدمة، وهما:

 

1- السنارة (The Hook)

 

ممكن يكون جملة أو كلمة أو فقرة أو سؤال، وظيفتها إنها تخطف أو تصطاد الجمهور المستهدف للمحتوى.

 

2- الناقل (Transition)

 

دى الجملة اللي بتربط ما بين السنارة واللى هيقدمه المحتوى بتاعك.

 

3- الأطروحة (Thesis)

 

في الجزء ده بتقول ايه اللي هتقدمه في المحتوى، واللى هيشجع الجمهور المستهدف انه يكمل.

 

مثال من مقال عملته لشركة في مجال الفوركس أو مجال بورصة العملات الأجنبية.

 

كتابة المحتوى

 

طب في سؤال، انا بتكتب بوست على الفيسبوك، اعمل ده ازاى؟

 

بص يا صاحب ويا صاحبة السؤال، على حسب حجم المحتوى، و إبداعك الشخصي.

 

ملحوظة، لو المحتوى عبارة عن كابشن بسيط يبقي هو اصلا مش محتوى بالمعني المتعارف عليه، إنما Copy، والـ Copy ليه قوانين ودنيا تانية.

 

طبعا فيه مدارس كتير في كتابة المقدمات زي ما قولنا، ولكن انا بحب مدرسة تقديم المشكلة، وسعات الحل، والمحتوى نفسه بيكون بيوضح الطريق الكامل للوصول للحل.

 

زي مقدمة المقال ده.

 

كتابة جسم المحتوى

 

جسم المحتوى هو المحتوى نفسه، العنوان والمقدمة كان مهمتهم جذب إنتباه الجمهور للجزء ده.

 

الجزء اللي بتوفي بيه بالوعود اللي قطعتها على نفسك في أول جزئين، يعني هنا إما البطيخة تطلع قرعة أما تطلع حمرا.

 

في جسم المحتوى، أسلوبك وفكرك وصوتك بيظهر.

 

ماقدرش اقولك ازاى تكتب جسم المحتوى، لان ده متوقف على الموضوع نفسه، ولكن اقدر افيدك بكام Trick كده يخلوا جسم المحتوى بتاعك ممتاز.

 

  • قسم المحتوى لفقرات، وكل فقرة خليها سطرين أو تلاتة، وبين كل فقرة والتانية مسافة بيضة (دوستين انتر مش دوسة واحدة الله يخليك) زي اللي انت شايفها في المحتوى ده.
  • بسط الكلام، بس ماتبقاش سطحي، بسط الكلام بطريقة تخلي الناس فاهمة من غير ما تضيع معنى وجوهر الكلام.
  • اوعي تحشر، ماتحطش كلمة أو جملة إلا وليها معني، ودليلك في عمل الموضوع ده، إنك تشير الجملة أو الكلمة اللي انت شاكك انها محشورة، لو المعني استقام يبقي كانت حشر، لو لا يبقي في مكانها.
  • لو فيه نقاط، إما ترقمهم أو تعملهم زي ما انا عامل النقط دى بالظبط، يعني تخليهم في شكل Bullets.
  • حسس الجمهور المستهدف أنك فاهمه كويس اوي، وان الكلام ده موجه ليه، وده عن طريق انك تتخيل انه قاعد جنبك وانت بتكتب المحتوى، وتبتدى تتكلم معاه.

 

لو اخدت بالك من الكام نقطة دول، هتلاقي جسم المحتوى مرة بعد مرة بقي أحسن.

 

كتابة الملخص أو الخاتمة

 

انا بحب جزئية الملخص في المحتوى، لإنها فرصة عظيمة لتوصيل الرسالة التسويقية بشكل واضح، وكمان فرصة لمعرفة فيد باك لحظي عن المحتوى.

 

وده عن طريق إنك تقول للناس اللي هما المفروض يكونوا فاهمينه بعد ما قروا المحتوى بتاعك، واللى شايف غير كده بنسبة كبير هيقولك.

 

طب برضو لو انا المحتوى بتاعي عبارة عن فقرتين بس، اعمل ايه؟

 

اعمل خاتمة، قول الجملة أو الرسالة اللي عايز توصلها.

 

كتابة الـ Call to Action

 

ايه هو الـ CTA (اختصارا لـ Call to Action)؟

 

الـ CTA عبارة عن الطلب اللي انت بتطلبه من الجمهور المستهدف بعد ما ينتهوا من اي جزء من المحتوى.

 

يعني مش شرط يكون مكانه في أخر المحتوى، ممكن يكون في النص أو في الأول، ولكن المكان الثابت والأكثر استخداما هو اخر المحتوى، لإن ساعتها يعتبر الفعل المنطقي اللي انت عايز الجمهور المستهدف تعمله.

 

طب ازاى تكتب CTA؟

 

1- ركز على هدف واحد وحيد.

2- استخدم أفعال وليس كلمات لدفع الناس القيام بالفعل.

3- قول للناس ايه اللي هيعود عليهم اما يقوموا بالفعل اللي انت طالبه منهم.

4- اسال الناس سؤال تفاعلي.

5- خليك واضح، بسيط، محدد.

 

طبعا لو فيه عرض مصاحب للمحتوى أو موجود هدف واضح، الـ CTA هيكون اتكتب من قبل ما تكتب حرف في المحتوى اصلا.

 

 

وبكده تكون انتهت مرحلة كتابة المحتوى.

 

ماذا بعد؟

 

ما بعد كتابة المحتوى

 

قبل كتابة المحتوى، قولنا على 7 حاجات لازم تعمل حسابها عشان تقدر تكتب المحتوى المناسب للجمهور المستهدف وفى الوقت ذاته مناسب للبيزنس.

 

وفى مرحلة كتابة المحتوى قولنا ازاى تكتب قطعة محتوى متكاملة الأركان.

 

أما دلوقتي هنقول 3 حاجات المفروض تعملها بعد ما تخلص كتابة المحتوى.

 

1- ارتاح عشان تعمل Edit

 

في مرحلة الكتابة، غالبا انت كنت عامل كده

 

كتابة المحتوى

 

بس جه الوقت اللي تعمل فيه كده …

 

كتابة المحتوى

 

لازم تفصل، وتاخد استراحة من اللي كنت بتعمله، عشان تقدر تراجع وتعدل على المحتوى عشان يخرج في ابهي صورة.

 

طب يا عم اسامة انا ماعنديش وقت اخد راحة بعد ما اعمل المحتوى ولازم انشره بسرعه؟

 

يبقي ادخل المطبخ اعمل كوباية نسكافيه أو شاي، أو ادخل اغسل وشك أو العب ماتش بلاي ستيشن أو اعمل أي فعل بعيد كل البعد عن كتابة المحتوى حتى لو لمدة صغيرة.

 

طبعا المفروض ماتوصلش لمرحلة ان بتكتب المحتوى قبل ميعاد نشره بكام دقيقة يعني، عيب انت كبير!

 

طب بعد ما خدت الاستراحة بتاعتك، المفروض تفتح المحتوى مرة تانية عشان تعمل Edit، بس ازاى؟

 

اقرأ المحتوى للمرة الأولى بحثا عن وجود علامات الترقيم في أماكنها، وعلى وجود المسافات صح الخ.

 

اقرا المحتوى مرة تانية عشان تتأكد أن كل جملة مترابطة مع اختها، وكل فقرة مترابطة مع اختها، والمحتوى كله مترابط و حتة واحدة بيناقش موضوع واحد مهما كثرت التفرعات.

 

اقرا المحتوى للمرة الثالثة عشان تتأكد أن كل حاجة ماشية صح.

 

طبعا موضوع الـ Edit ده مهارة، هتتحسن بالتدريج، بس نصيحتى ليك، قطع نفسك قبل ما حد يجي ويقطعك.

 

2- انشر و اوعي تروح في أي حتة

 

انت عملت مجهود كبير اوي في كتابة المحتوى، بلاش تبوظ الطبخة عشان بشلن ملح زي ما بيقولوا!

 

يعني ايه؟

 

المحتوى بتاعك تم نشره في القناة الأساسية وليكن الموقع، ده مش كفاية، هنا يجي دور توزيع المحتوى.

 

انشر المحتوى بتاعك في الفيسبوك، تويتر، لينكد ان، الإيميل، في كل مكان موجود فيه العملاء بتوعك.

 

وفى كل مكان بتنشره فيه، خليك مركز لمدة ربع ساعة على الأقل، لأن أول ربع ساعة أمر حرج لنجاح المحتوى بالذات على السوشيال ميديا.

 

3- أوعي تنسي التحليل

 

انت حاطط هدف للمحتوى قبل ما تكتبه، بعد ما كتبت ونشرت المحتوى، المفروض تشوف وصلت للهدف اللي انت كنت حاطه من البداية ولا لا؟!

 

من وجهة نظري، حكمي على جودة اي قطعة محتوى من الناحية التسويقية هل هو مناسب للجمهور المستهدف ولا لا؟ وهل هو قدر يوصل للهدف اللي هو كان حاطه من الأول ولا لا؟

 

المهم تحلل أداء المحتوى على القناة اللي نزل فيها، وعلى القنوات اللي تم توزيعه فيها برضو.

 

وبكده نكون خلصنا المقال، وأتمنى اكون ساعدتك بجد في إثراء معرفتك وتحسين ادائك في كتابة المحتوى ^^

 

ماتنساش إني عامل كورس مجاني 100% في الـ Content Creation، هيعلمك ازاى تعمل محتوى بخطوات علمية وعملية، وتحديدا 13 خطوة ممنهجة.

 

انضم لقبيلتي واحصل على كورس المحتوى مجانا 100%

 

كتابة المحتوى من المهارات اللي عمرها ما بتجي من مرة واحدة، لازم تكتب كتير اوى، وتسمح لنفسك ان تكتب حاجات زي الزفت، لإن هي دى اللي هتوصلك لمرحلة الإتقان.

83 رأي حول “كتابة المحتوى خطوة بخطوة لغير المحترفين”

  1. فى نوعين من المحتوى على الفيسبوك .. البيعي واللى بيقدم قيمه او on brand و ال off brand بالنسبه للبيعي او ال on brand ايه المعايير اللى التزم بيها من حيث حجمه؟ لانى ساعات بكتب محتوى بيعي وبيقولولى انه طويل فمحتاج اعرف المقاييس اللى امشي عليها بالنسبه للموضوع ده وشكرا مقدما
    :)

    رد
    • مفيش حاجة اسمها طويل يا امجد، انما فيه حاجة اسمها هو ده مستوفي وكامل كل اللى المفروض يتقال فيه، مثلا انا فى المقال اللى انت قريته انا بتكلن عن كتابة المحتوى، خلاص اللى طلع معايا كافي، كان ممكن اطول؟ اه طبعا. كان ممكن اقصر؟ برضو اه، إنما الصح انه يكون كامل ومستوفي.

      رد
  2. طبعا مجهود رائع ولك وافر الشكر لتقديمك له مجانا.. لكن مش ملاحظ حضرتك مع قدرتك على الكتابة وتعليمك للناس ازاي نكتب محتوى جيد ولافت إن كتابة حضرتك هنا اصلا كلها اخطاء إملائية فظيعة لدرجة بعض الكلمات محتاجة اقف عندها واقرا الجملة اكتر من مرة علشان افهمها!! مانكرش الموضوع مهم وجميل وعرضك حلو بس كمان انا شخصيا لما بلاقي محتوى مكتوب بالشكل ده عادة مش بكمله لانه بيدي انطباع سيء جدا
    مش بنتقد انا بس حبيت الفت الانتباه وفي كورسيز وطرق بسيطة نكتب بيها صح.. تحياتي وبالتوفيق

    رد
    • هو فين الكورس بالظبط انا سجلت وعملت كونفرماشن عالميل ومجاليش الكورس وعماله الف فى المدونة من مده كله كلام عايم بس المفيد مش موجود غير في ال next level اللى بفلوس. أمال كورس مجانى ازاى؟

      رد
      • ازيك ي أمل، لو عملتي تاكيد، فالكورس المجاني 100% جالك، ممكن تبصي فى الاسبام او البروميشن، وقولي من فضلك ايه بالظبط اللى عايزه تتعلمي تعمليه وانا اساعدك؟

        رد
    • طب ممكن تسجل مرة تانية، وتعمل تاكيد، ولو عملت كل ده، بص فى الاسبام او البروميشن فولدر فى الايميل!

      رد
  3. شكراً أخي أسامة موضوع مهم و طرحته باسلوب مفهوم جداً
    شكراً لك ..
    حبيت أعرف إذا ممكن اعرف حسابك على تويتر لو كان فيه مثل هذي المعلومات

    رد
  4. حابين نعرف بقي أكتر عن الإعلانات و إستراتجياتها.

    حاجة كمان ياريت لو تكلمنا ف مقالة عن التسويق الأخضر فى الإهتمام الكبير بالبيئة و الشركات الناشئة الكتير إلى لسه طالعه في المجال ده.

    رد
  5. والله بدعيلك من كل قلبي يا استاذ اسامة
    حضرتك بتدي المعلومه من مكنون قلبك
    ربنا ينفع بيك.
    وصدقا ما قاله رسول الله وهوا ما رايته فيك وفي هذا المقال(خير الناس انفعهم للناس)
    وحضرتك من خيار الناس

    رد
  6. طيب انا حابة أتعلم هالشغلة و سجلت بالكورس لكن مش عارفة أبدا ازاي … انو انا ما بشتغل بهالشي وبدي أبدا أكتب بس مش عارفة كيف اختبر نفسي وعن شو اكتب لانه ما عندي مادة او منتج او شي

    رد
  7. مقالة رائعة,, بس للأسف حاولت أسجل للحصول على محتوى الكورس ومفيش إيميل وصلني لل confirmation

    رد
  8. الseo ايه علاقته بكتابة المحتوى؟ وهل لازم أمستره ولا مجرد آخد فكرة عنه؟

    رد
  9. شكرا جزيلا .. من النادر انى أكمل مقال لأخره ولكن اسلوبك سهل جدا وفجأة لقيت نفسى وصلت لاخر فقرة .. وده يدل على انك فاهم يعنى ايه محتوى يتقدم لجمهور .. عندى استفسارات كتير الحقيقه لانى مازلت اقف على عتبات موضوع كتابه المحتوى ومحتاجه اسأل على كذا حاجه تتعلق بمجال شغلى .. ياترى ايه طريقه التواصل معاك.

    رد
    • أشكرك يا جهاد جدا ^^

      تقدري تاخدى الكتاب اون لاين من اللينك ده https://gumroad.com/l/LlqsU

      بالمناسبة كتاب Content Marketing Principles دلوقتي معروض بـ 15$ بدل من 28$ ومعاه كتاب أنواع المحتوى مجانا.

      لو عندك مشكلة في الاون لاين، ممن فوادفون كاش على الرقم ده ( 01098778304 )

      تحياتي ^^

      رد
  10. يا رايس انت
    بس ممكن تفهمني الفرق الجوهري بين الرسال التسويقية وهدف المحتوى لأني متشتت بينهما
    شكرا

    رد
    • هدف المحتوى مثلا تجميع Leads أو خلق تفاعل مع الجماهير، أو ترافيك، أو لم اعجابات أو تحقيق مبيعات مباشرة.

      الرسالة التسويقية: الطريقة اللى هتحقق بيها الهدف ده، السبب اللى اما تقوله، الجمهور هيحققلك هدفك.

      فهمت يا ريس؟

      رد
  11. مقال ومحتوى أكثر من رائع أ. أسامة صلاح .. على الرغم إني عندي موهبة الصياغة والكتابة وكنت محرر سابق في جريدة مشهورة إلا إني استفدت فعلا من كلامك. وياريت وسيلة للتواصل معك.. وبالتوفيق دائماً وشكراً جزيلاً لك

    رد
  12. السلام عليكم ورحمة الله وبركاتة
    صراحة الموضوع فعلا شيق انا متابع تقريبا كل المقالات اللي كتبتها وشغال علي موقع وبداءت انزل فيه مفالات لو تسمح لي ارسل لك الرابط تشوف المقالات لاني حاسس بياخد مني وقت كتير وفي النهاية هل مقبول اولا ياريت نصائحك
    تحياتي لك

    رد
    • وعليكم السلام ورحمة الله وبركاته ، اشكرك اولا ^^

      ثانيا ابعت لى طبعا كل المقالات اللى انت عايزها فى اي وقت.

      تحياتي ^^

      رد
        • الله يبارك فيك ^^

          بص المقال من بدايته قفلني جدا بسبب إن فيه كلمات كتيرة مش فى مكانها، المقال من حيث كونه معلومات فهو مفيد، إنما كمحتوى متكامل ناقصه كتيرة، اهمها انك تتحدث مع العميل ولا تنظر لمحركات البحث بالطريقة الواضحة، يوجد طرق كتيرة لنشر الكلمات المفتاحية التي تريدها دون الوقوع فى فخ إنك ألة تتحدث مع ألة حتي لو الوضع هكذا، بالنهاية من سيقرا المقال هو إنسان.

          تحياتي ^^

          رد
  13. موضو شامل ووافى بس يحتاج التفاصيل وفعلا أ. اسامة ياريت حضرتك تبدأ بموضوع تحديد الجمهور المستهدف.. فى انتظار كل جديد من حضرتك لأنى نفسى اتعلم صح

    رد
    • تمام جدا يا استاذة سحر ، فى النص الاولاني من شهر 2 هيطلع الاي بوك بتاع الجمهور المستهدف باذن الله.

      رد

شارك