fbpx

7 أدوات مجانية تدعم اللغة العربية لعمل بحث الكلمات المفتاحية

بدون استهداف واختيار الكلمات المفتاحية الصحيحة، كل جهود الـ SEO الباقية لن يكون لها قيمة.

 

الكلمات المفتاحية هي جوهر عملية تهيئة المحتوى للظهور فى النتائج الاولي فى محركات البحث.

 

ما هي الكلمات المفتاحية؟

 

الكلمات المفتاحية او الجمل المفتاحية عبارة عن الكلمات اللى بيبحث بيها الجمهور فى محركات البحث، زي مثلا أفضل نصائح كتابة المحتوى، وضحت؟

 

اذن اول خطوة لكتابة محتوى متوافق مع قواعد السيو عشان يطلع فى النتائج الاولي لجوجل، لازم تقوم باكتشاف واختيار الكلمات المفتاحية المناسبة.

 

ازاى؟

 

عشان تقوم بعمليات اكتشاف الكلمات المفتاحية أو بحث الكلمات المفتاحية (Keyword Research) فيه طرق كتيرة، ولكن أكبر جزء مستحوذ على إهتمام كل اللي شغالين فى مجال التسويق بالمحتوى والـ SEO هو:

 

أدوات بحث الكلمات المفتاحية (Keyword Research Tools)

 

وهنا فيه مشكلة كبيرة أوى لينا كمسوقين عرب، وهي:

 

إن قلما تلاقي أدوات بتدعم اللغة العربية بشكل صريح، بالاضافة إلى إن كتير من الادوات بتكون بفلوس.

 

دلوقتي هشارك معاك 7 أدوات مهمة جدا انا بستخدمها بشكل تبادلي (ومش من ضمنهم Google Keyword Planner على فكرة).

 

الأدوات مجانية، وبتدعم اللغة العربية.

 

في المقال ده، هتتعلم ازاى تستخدم كل أداة من الأدوات اللي هنتكلم عنها، وازاى تجيب منها كلمات مفتاحية تخليك تكتب محتوى يظهر في الصفحة رقم #1 في جوجل.

 

يلا بينا نبدأ …

 

1- UberSuggest (مجانية – تدعم العربية)

 

الاداة دى من الأدوات البسيطة اللي بتدي اقتراحات على الكلمة اللي انت دخلتها، وعلى فكرة نيل باتل اشتراها من كام سنة تقريبا.

 

اكتب الكلمة المفتاحية الأساسية اللي انت عايزها زي ماهو موضح بالصور …

ادوات بحث الكلمات المفتاحية

بعد كده اختار المكان اللي انت عايز تجيب منه الكلمات المفتاحية …

ادوات بحث الكلمات المفتاحية

بعد كده اختار الدولة واللغة اللي انت عايز تعرف عن مستخدميها …

ادوات بحث الكلمات المفتاحية

والنتائج هتظهر كدا …

 

الأداة بتجيب النتائج من جوجل يعني الأداة بتجيب لك ما هو موجود بالفعل، ومش بتقترح عليك من دماغها.

 

ادوات بحث الكلمات المفتاحية

 

2- Answer The Public (مجانية – تدعم العربية)

 

الأداة دى من الأدوات المحببة لقلبي لإنها بتعرض لك النتائج في شكل خريطة ذهنية، وأنا شخصيا بحب الخرائط الذهنية جدا لأنها بتنجز في الوقت.

 

في الاداة انت بتختار تشوف النتائج ازاى، صورة خريطة ذهنية، ولا قائمة في جدول بالشكل المعتاد.

 

يعني هتقدر تشوف النتائج بسرعة وتحدد ما إذا كانت تستاهل ولا لا، وبرضو تقدر تاخدها في هيئة جدول جاهز للاستخدام مباشرة.

 

الأداة دى بتجيب النتائج في 5 أقسام، 3 منهم بتحط Modifier من عندها، والقسم الرابع والخامس هو أهم حاجة لإنه بيعملك إقتراحات وبيجيب لك كلمات مفتاحية ذات علاقة أو صلة (Related Keyword).

 


لو مش عارف يعني Modifier، كمل قراءة …

 

يعني ايه معدلات الكلمات المفتاحية (Keyword Modifiers)؟

 

الـ Keyword Modifiers عبارة عن إضافة بعض الكلمات البسيطة للكلمات المفتاحية الرئيسية، للظهور بشكل أكثر فعالية في محركات البحث.

 

الكلمات دي بتتصنف في قسمين:

 

القسم الأول: كلمات عامة زي أفضل، نصيحة، قائمة، احصل، اختار، أرخص، مختلف، رهيب، والاسئلة عموما زي كيف، ماذا، لماذا إلخ.

 

القسم التاني: كلمات خاصة زي الأعمار، الأماكن، أنواع العلامات التجارية إلخ.

 

مثلا، في جملة “كورس كتابة المحتوى في الدقي”

 

“في الدقي” دى تعتبر Modifier من النوع التاني.

 

مثلا لو الكلمة الرئيسية بتاعتك “كورس إنجليزي”، يبقي ممكن تخليها “احصل على كورس إنجليزي”.

 

إضافة الـ Modifier على الكلمات المفتاحية بتخليك تبتكر كلمات مفتاحية طويلة الذيل، وهي كلمات مفتاحية تمتاز بأن اللي بيدور عليه بيكون أكتر شخص عنده استعدادية (Receptive) لأنه يشتري منك.

 


بصراحة النتائج بتاعت الأداة دي في الـ 4 أقسام الأولي مش مفيدة أوى ولكن بتساعدك في عملية الـ Brainstorming جدا، ويلا نشوف ازاى بشكل عملي.

 

تطوير الكلمات المفتاحية باستخدام Answer The Public

 

انا حطيت كلمة ” التسويق ” والنتائج كانت كالاتي …

ادوات بحث الكلمات المفتاحية

من النتائج دى، تقدر تطلع أفكار وكلمات مفتاحية جديدة زي مثلا ليه التسويق؟ هل التسويق؟ وهكذا.

 

وعامة فكرة الأسئلة مهمة جدا في الكلمات المفتاحية وبالذات للزبون اللي بيكون في مرحلة “واعي بالمشكلة”.

 

في القسم التاني بتحط Modifiers عبارة عن حروف جر زي قريب أو بدون أو لـ إلخ.

 

وطبعا تقدر تستخدمها لتطوير الكلمات المفتاحية الأساسية زي التسويق بدون ميزانية كبيرة أو التسويق للشركات الصغيرة …

 

الفكرة كلها تكمن إن الإقتراحات دى بتفتح دماغك لسكك تانية، وملهاش أي أهمية تانية غير الوظيفة دى.

 

والقسم التالت بيستخدم Modifier المقارنات، زي كذا في مقابل كذا، كذا ولا كذا، ودى برضو أفكار مهمة.

 

أما القسم الرابع فهو بيشوف الكلمات المفتاحية الأساسية ويبتدى يجيب من محركات البحث الكلمة الأساسية جنبها كلمة حسب الحروف الأبجدية.

 

يعني مثلا التسويق + الكلمات اللي تبدا بحرف الالف، التسويق + الكلمات اللي تبدا بحرف الباء، وهكذا.

 

والنتائج دى مش مجدية أوي، ولكن مفيدة في تفتيح مخك لسكك تانية.

 

القسم الخامس في النتائج وهو أهم قسم من وجهة نظري، بتجيب لك فيه الكلمات المفتاحية ذات العلاقة (Related Keywords).

 

مثال للفهم على الكلمات المفتاحية ذات العلاقة، لو مثلا شغال في مجال الطب، وتحديدا في عيادات جراحة عظام، والكلمة المفتاحية هي جراحة عظام، اكتب جنبها كلمات زي تخدير غرفة علميات أدوات جراحية، فهمت؟

ادوات بحث الكلمات المفتاحية

السحر الحقيقي للاداة دى هي البحث بكلمات مفتاحية إنجليزي، وبالذات في القسم اللي بتجيب لك نتائج بالكلمة الأساسية + كلمات تبدأ بحرف A أو B إلخ.

 

شوف مثلا أما كتبت كلمة Marketing …

ادوات بحث الكلمات المفتاحية

 

شوف كم الأفكار اللي طلعت بيه قد ايه!

 

ممكن تدور بالكلمة بالإنجليزي، وبعد كده تاخد الأفكار وتعملها بالعربي.

 

3- Wordstream’s Free Keyword Tools (تدعم العربية – مجانية)

 

دول مجموعة أدوات ليها علاقة بموضوع بحث الكلمات المفتاحية، وهي أدوات مهمة جدا زي ما هنوضح دلوقتي.

 

المجموعة دى عبارة عن 3 أدوات، وهما:

 

  • الأداة الأولى

 

أول أداة من المجموعة دى وهي أداة تقليدية جدا شبه اللي فوق بالظبط، ومفيهاش أي حاجة مميزة.

ادوات بحث الكلمات المفتاحية

 

  • الأداة التانية

 

دي حاجة إسمها Keyword Niche Finder يعني بيقولك على الكلمات المفتاحية اللي لو قدرت تشتغل عليها وتغطيها من كافة الجوانب، هتكسب المنافسين.

ادوات بحث الكلمات المفتاحية

 

وطبعا زي ما انت شايف، كلها مواضيع في غاية الأهمية.

 

** ملحوظة: انا بستخدم أمثلة ليها علاقة بالتسويق عشان أقرب لك الفكرة بما إنك مسوق أصلا، ولكن طبعا الأدوات دى بتقبل جميع أنواع وأشكال الكلمات المفتاحية في أي مجال **

 

  • الأداة التالتة

 

دي أداة إسمها Negative Keyword Tool بتقولك تقريبا ايه الكلمات اللي محدش بيدور بيها!

 

أداة كويسة برضو إنها تفتح مخك لأفكار جديدة سواء للكلمات المفتاحية أو للمحتوى.

ادوات بحث الكلمات المفتاحية

 

4- KeywordTool.io (مجانية – تدعم العربية)

 

دى أفضل أداة في كل الادوات اللي فاتت، والسبب ببساطة إنها بتقترح كلمات مفتاحية فعلا مميزة وفريدة صعب تلاقي أداة تانية تديها لك.

 

الأداة دي بتسمح لك تدور مش بس في جوجل، إنما في يوتيوب، وامازون وبينج …

 

والأهم والأهم إنه بيسمحلك تجيب كلمات مفتاحية من الآب ستور يعني تقدر تستخدمها مش بس في الـ SEO، إنما كمان الـ ASO اللي هو App Store Optimization.

 

سريعا كده، الـ ASO زي الـ SEO بالظبط، بس بدل ما الموقع بيظهر في محركات البحث في نتائج متقدمة مخطط لها، التطبيقات بتظهر في مراتب متقدمة في متاجر التطبيقات المختلفة.

 

ادوات بحث الكلمات المفتاحية

 

ودي شوية من الكلمات المفتاحية اللي طلعتها الأداة عشان تشوف مدى جودة وتميز الكلمات المفتاحية اللي بتقترحها عليك الأداة دي.

 

ادوات بحث الكلمات المفتاحية

 

بص على الكلمات المفتاحية المقترحة ومدى جودتها، وشوف كمية أفكار المحتوى اللي ممكن تعملها …

 

ادوات بحث الكلمات المفتاحية

 

فعلا أداة عظيمة.

 

متنساش تغير المكان اللي بيجي منه الكلمات المفتاحية، جرب كل الأماكن، مرة جوجل ومرة يوتيوب ومرة بينغ ومرة امازون ومرة آب ستور.

 

5- Kwfinder.com (مجانية بحدود – تدعم العربية)

 

الاداة من الأدوات المفضلة عندي برضو، بالرغم من إنها مجانية بحدود!

 

يعني بتديك كل يوم 5 كلمات مفتاحية تبحث عنهم بس، ولو عايز أكتر إدفع بقي، ولكن في اليوم الواحد مش مسموح لك غير بـ 5 كلمات بس.

 

كالعادة كتبت كلمة التسويق، والنتايج كانت كالأتي …

ادوات بحث الكلمات المفتاحية

 

في المثال ده، الأداة اقترحت عليا كلمات مفتاحية من دماغها …

ادوات بحث الكلمات المفتاحية

 

أما هنا الأداة جابت لى إقتراحات للكلمات المفتاحية من خلال التكملة الذاتية أو الـ Autocomplete في جوجل.

 

يعني مثلا لو كتبت في جوجل كلمة التسويق واستنيت لحظة هتلاقي جوجل اقترح عليك كلمات بحثية، الأداة بتجيبها لك بشكل اتوماتيك.

ادوات بحث الكلمات المفتاحية

 

أخر جزء من الأداة وهي إنها بتجيب لك الاسئلة اللي تحتوي عليها الكلمة المفتاحية زي ما انت شايف.

 

خد بالك، إن كل كلمة أو جملة بحثية من دى مفتاح لفكرة محتوى.

 

يعني انت معاك كنز وسيل من أفكار المحتوى.

 

6- Keyworddit (مجانية – لا تدعم العربية)

 

الأداة دى من الأدوات اللطيفة جدا اللي ما قدرتش اتجاهلها رغم إنها مش بتدعم العربية.

 

نظرا لأنها بتجيب الكلمات المفتاحية من الموقع العالمي Reddit اللي هو بيدخله شهريا مليار شخص على مستوى العالم، و طبعا Reddit مش بيدعم اللغة العربية.

 

اللي بيميز الأداة دى عن غيرها، إن النتائج كلها مواضيع مهمة جدا، وخلينا نشوف مثال عملي …

ادوات بحث الكلمات المفتاحية

 

كل اللي عليك انك تستخدم الكلمات المفتاحية دى فى إنك تطلع من دماغك كلمات مفتاحية جديدة و أفكار للمحتوى.

 

يعني مثلا الوظائف المناسبة للمنضمين الجدد لمجال التسويق، موضوع زي ده غالبا مش هتلاقي حد بيتكلم عنه، فهمت الفكرة؟

ادوات بحث الكلمات المفتاحية

 

فعلا أداة اقتراحاتها عظيمة.

 

7- Google Trends (مجانية – تدعم العربية)

 

الاداة دي من الأدوات المهمة في حاجتين:

 

1- بحث الكلمات المفتاحية طبعا

2- تقييم الأسواق

 

لو كتبت في مربع البحث في الأداة كلمة تسويق، ونزلت لأخر الصفحة، هيظهرلك نتائج زي اللي في الصورة دى …

ادوات بحث الكلمات المفتاحية

 

زي ما انت شايف، الاداة بتجيب لك الكلمات البحثية المتعلقة، وكمان بتجيبلك المواضيع المتعلقة.

 

ماتنساش تبقى تدوس على السهم اللي في اخر الصورة عشان تشوف كل النتائج اللي الأداة بتقترحها.

 

انت ممكن تكون شايف إن النتائج مش قوية بشكل كافي، ولكن اتعامل مع الكلمات دي على أساس إنها بذرة، وطورها بعد كده.

 

بالنسبة للإستخدام التاني للأداة دي، من خلالها تقدر تعرف مدى الاهتمام أو مدى الطلب على المنطقة اللي انت ناوي تدخل تنافس فيها.

ادوات بحث الكلمات المفتاحية

 

وتقدر تعرف كمان في أي الأوقات، السوق بينشط وأي الأوقات السوق بيخمل، ودى ميزة مهمة جدا في مجالات زي السياحة والسفر والعقارات والملابس.

 

دول كده كانوا 7 أدوات مجانية وبتدعم اللغة العربية!

 

واحد بيقول في سره دلوقتي لأ دول 6 بس عشان الأداة رقم #6 لا تدعم اللغة العربية!

 

أحب أقولك أيها الذكي برافو عليك انت معاك حق، بس ليه نسيت Google Keyword Planner اللي اشرت ليها في أول المقال؟!

 

أساسيات تقييم واختيار الكلمات المفتاحية

 

معايير تقييم الكلمات المفتاحية هي 3، وهما:

 

1- متوسط عدد العمليات البحثية شهريا (Average Monthly Search Volume)

2- مستوى المنافسة على الكلمات المفتاحية (Competition Level)

3- متوسط تكلفة النقرة الواحدة على الإعلان (Average CPC)

 

مثلا لو كتبت كلمة التسويق في Google Keyword Planner هيظهر لك الصورة دي …

ادوات بحث الكلمات المفتاحية

 

انا هنا استخدمت الفلاتر عشان أجيب نتائج أكثر أهمية، زي مثلا إني حددت إن المنافسة تكون مرتفعة، وبالتالي الكلمات اللي طلعت كلمات كلها مهمة زي ما انت شايف.

 

بسرعة كده، المنافسة على أي كلمة مفتاحية إما بيتكون مرتفعة أو متوسطة أو منخفضة.

 

الكلمات المفتاحية مرتفعة المنافسة VS منخفضة المنافسة

 

كل الناس في المجال بتنصح إنك تحتار الكلمات المفتاحية اللي المنافسة عليها قليلة وتشتغل عليها، وانا كمان بنصح بده في حالة لو انت مش هتقدر ولا هتعرف تعمل محتوى قوي!

 

إنما لو هتعمل محتوى قوي يكسب كل المحتوى بتاع المنافسين، أنصحك تختار الكلمات اللي المنافسة عليها عالية.

 

انا عارف انك أول مرة تسمع النصيحة دى بس اعمل بيها في حالة إنك هتقدر تعمل محتوى فعلا عالي الجودة ويكسب كل محتوى المنافسين.

 

في الصورة اللي فوق هتلاقي كمان حاجة بعنوان ” Avg. Monthly Searches “

 

ودى بتقولك عدد الناس اللي بتبحث عن الكلمة شهريا ودى حاجة مهمة في تحديد قيمة الكلمة المفتاحية اللي هشتتغل عليها.

 

وهتلاقي سعر النقرة على كل كلمة، ودى مهمة لو هتعمل اعلانات، ومهمة برضو في تحديد قيمة الكلمة المفتاحية، لان أكيد الغالي عليه منافسة كبيرة.

 

كده انت عرفت ازاى تكتشف الكلمات المفتاحية باستخدام 7 ادوات مجانية تدعم اللغة العربية، وعرفت كمان ازاى تعمل تقييم للكلمات دي على أساس علمي.

 

الخطوة اللي بعد كده؟

 

تكتب محتوى متميز فى الكلمة المفتاحية اللى انت اخترتها، محتوى عالي الجودة وملوش مثيل.

 

ازاى؟

 

باستخدام كتاب SEO Content Playbook

 

في الكتاب هتتعلم كيفية كتابة محتوى يظهر في النتيجة رقم #1 في الصفحة رقم #1 في جوجل خطوة بخطوة حتى لو انت:

 

– مش خبير فى الـ SEO

– بتقول على نفسك مابعرفش أجيب أفكار عبقرية للمحتوى

– ماعندكش الوقت ولا الجهد لعمل محتوى كتير بصورة مستمرة

– المجال أو النيتش اللي شغال فيه صعب ورخم والمنافسة شديدة

– ماتعرفش كتير عن المجال اللي هتعمل فيه المحتوى

 

 في الكتاب هتلاقي الأفكار – النصائح – الأدوات – الخطوات الفعلية و العلمية/العملية اللي هتخليك تكتب محتوى يظهر في النتيجة رقم #1 في الصفحة رقم #1 في جوجل.

 

ملحوظة: المقال ده جزء من كتاب SEO Content Playbook.

 

دوس هنا للحصول على الكتاب كامل

16 رأي حول “7 أدوات مجانية تدعم اللغة العربية لعمل بحث الكلمات المفتاحية”

  1. شكراً جزيلا على المعلومات الحلوة والمهمة يلي بتقدمها وأحلى شي إنها باللهجة المصرية اللطيفة أنا بقرأ وبسمع صوتك :) … فعلا مجهود رائع تستحق الثناء عليه وفعلا هذا ما يغني المحتوى العربي بالنسبة لمجال التسويقفغالبا هذه المعلومات نجدها في المحتوى الإنكليزي فقط أما باللغة العربية قلما أجد محتوى غني كهذا … أتمنالك مزيداً من النجاح

    رد
  2. بجد شكرا على كل التوضيح ده
    انت نورت ليا حاجة كانت مضلمة قصادى من فترة كبيرة
    ربنا يزيدك كل خير :)

    رد
  3. المدونه دي بسيطه وسهله ومعلوماتها مفيده جدا بالنسبالي كل مقال بياخد مني وقت لفهمه وخصوصا المقال دي فادتني جدا لان كنت بحتاج مواقع لل keywords حتي لو هدفع ليها فلوس بس الاهم انها تكون بتدعم اللغه العربيه فا بجد ربنا يوفقك ودايما تكون عايز تفيد الناس لان مش كل الناس بتكتب اللي جربته واللي فهمته ودايما بطر اعمل سيرش بالانجلش عن اللي محتجاه لان مش كله حاجه متوفره بالعربي
    بس سوالي هنا لما بفكر في مدونه معينه اعملها والبحث عن ال keyword اللي هتكون خاصه بالمدونه دي البحث في الشهر عليها من 1 ل الف فقط ومفيش اي مجال منافسه اطلاقا ..هل ابداء فيها فعلا بس قولت ان اول 6 شهور وهو ههتم فقط بكتابه محتوي خصوصا ان بحب المجال اللي هتكلم فيه دا وفي نفس الوقت متوفر منتجات علي سوق كوم ان اشترك في نظام الافليت بروجرم الخاص بيهم بس بعد 6 شهور مثلا وانزل منتجات علي المدونه واتكلم عنها غير ممكن انزل اعلانات علي المدونه نفسها هل كدا تفكيري صح ؟
    وان اخصص بس اول 6 شهور كل يومين انزل مقال بمعاير السيو وان كل محتوي يكون حصري فعلا
    ولو ع افتراض هتدخلي فلوس بعد كدا تقريبا هتكون حوالي كام تقريبا من خبرتك الشخصيه ؟

    رد
    • أشكرك جدا جدا يا عزة على الفيدباك ده ^^

      رايي ماتبديش الا لو كنت قادرة على جذب ترافيك كافي إنه يدخلك ربح، وعشان نتكلم بتفاصيل وبشكل عملي، احكي لى المدونة عن ايه الخ؟

      رد
  4. بعد التحية
    احب اشكرك علي المجهود اللي انت بتبذله ومن الواضح كده اني بعد ما قرات بعض المواضيع ان الحمد لله في ناس كتيره بتستفاد من مواضيعك ما شاء الله عليك
    ثانيا احب اسالك عن شئ انا دخلت قسم التسويق في شركة مقاولات في احدي الدول بس للاسف انا مشتغلتش في التسويق قبل كده وعليه انا مش عارف ايه اللي المفروض اعمله
    ولازم اجتهد عشان بجد مش هينفع اضيع الوظيفة دي وانا حابب اني ادخل في المجال ده ممكن تساعدني لو تقدر تعرفني ازاي ممكن ابدا
    وشكرا ليك مره تانيه

    رد
    • أهلا يا استاذ محمود، بص يا سيدي، نفذ اللى هاقولك عليه ده خطوة خطوة:

      هات و ورقة وقلم، و 1- حدد الزبون المحتمل ليهم اللى ممكن يشتري اللى هما بيقدموه 2- حدد ميزات ونقاط تميز الشركة عن المنافسين 3- حدد القنوات التسويقية اللى هتشتغل من خلالها (فيسبوك، تويتر، ويب سايت إلخ) 4- طلع افكار تسويقية تربط ما بين اللى عايزه الزبون المحتمل، واللى بتقدمه فى الشركة، نفذها وانشرها على الفنوات دي بشكل مستمر.

      اللى قولت لك عليه دى الخلاصة، ولكن الموضوع فيه تفاضيل أكتر بكتير، بس ابدا وتابع معايا بعد كده …

      ودى حاجات هتساعدك:

      https://osamasalah.com/online-marketing/
      https://osamasalah.com/content-writing/
      https://osamasalah.com/sales-content/
      https://osamasalah.com/strategy/

      تحياتي ^^

      رد
  5. طيب أنا عندي مشكلة مع مقالاتك بشكل عام .. خصوصاً اني من النوع اللي بيحتار كتير ..
    المشكلة انك بتعرض معلومات قيمة كتير و انا بقف محتار
    يعني ٧ ادوات مجانية اكيد كل واحدة فيهم فيها ميزة عن التانية
    انا بقى إحترت و قلت طب استخدم مين فيهم
    فياريت في كل مقالة بتعرض فيها معلومات كتير تحط جزء فيه الخلاصة .. لو عايز كذا إختار كذا .. و لو انت مثلا مبتدئ ابتدي بكذا
    هتسهل علينا القراءة و نقرا الجزء اللي يهمنا بس بدل ما نقعد نقرا معلومات كتير مش محتاجينها دلوقتي
    فاهم قصدي

    رد
    • فاهم قصدك طبعا يا باهي، بس عايز افهمك حاجة، شغلنا معقد بعض الشئ، اساسيته سهلة، ولكن مشاكله كتير، عشان كده لازم يكون عندك حلول كتيرة، تطلع منها حسب الحاجة، لان اولا بنشتغل على مشاريع كتير واسواق كتير وكلها ممختلفة وكل حاجة وليها التحديات بتاعتها، ثانيا انا شخصيا بستخدم السبعة مش واحدة منهم وبس، بعتمد على الـ 7 فعلا، بالاضافة ان من وصف كل واحدة فيه تميز لاداة عن التانية، زى ما انت اكيد لاحظت.

      تحياتي ^^

      رد
  6. شكرا للمقالة… اتوقع اهم عامل للكلمة المفتاحيك هو نسبة المنافسة فمثلا يمكن ان تعجبك كلمة ولكن لايمكنك ابدا المنافسة عليها
    وللاسف المواقع الي ذكرتها بتطلب مبلغ ضخم للاشتراك فيها

    رد

شارك