fbpx

أساسيات التسويق عبر مواقع التواصل الاجتماعي: الدليل النهائي

أهلا بيك فى كورس أساسيات التسويق عبر مواقع التواصل الاجتماعي.


ده كورس مجانى للمبتدئين – فى شكل مكتوب – عن التسويق عبر مواقع التواصل الاجتماعي (Social Media Marketing).


الهدف من الكورس هو:


1- شرح مبادئ التسويق عبر مواقع التواصل الاجتماعي بشكل واضح وبسيط.


2- تعليم المبتدئين فى مجال التسويق أهم المهارات التسويقية اللى تمكنهم من النجاح فى شغل السوشيال ميديا.


3- توفير كورس تعليمي عالي الجودة بيقدم معلومات ممنهجة وعملية تدلك على الطريق الصحيح مش معلومات عشوائية ونظرية.


يلا بينا …

 

علم التسويق عبر مواقع التواصل الاجتماعي مبني على 6 محاور أساسية، وهما:


1- التسويق (Marketing)

2- وسائل الإعلام (Media)

3- التكنولوجيا (Technology)

4- علوم النفس (Psychology)

5- التأثير الإجتماعي (Social influence)

6- أساسيات البيزنس (Business Fundamentals)


لو عايز تكون من أقوى الناس في مجال السوشيال ميديا في مصر، لازم تذاكر وتقرا في كل حاجة تخص الـ 6 تخصصات دول.


بعد ما تذاكر الـ 6 حاجات دول، نيجي للتنفيذ، وهنا هنتكلم عن 6 مهام أساسية لازم تعملها كويس اوى طالما عايز تشتغل فى التسويق عبر وسائل التواصل الإجتماعي، وهما:


1- استراتيجية المحتوى (Content Strategy)

2- كتابة المحتوى (Content Creation)

3- إدارة المجتمع (Moderation)

4- الإعلانات (Advertising)

5- التصميمات (Designs)

6- التحليل (Analytics)


دلوقتي هنتكلم عن كل محور من الـ 12 بالتفصيل …


التسويق عبر مواقع التواصل الاجتماعي: التأسيس


دماغك عاملة زي العمارة، لو الاساسات بتاعتها فيها مشكلة، العمارة كلها هيكون فيها مشكلة، والاساسات دي 6 زى ما قلنا، وهنتكلم عليهم بالتفصيل دلوقتي …


1- ما هو التسويق؟


التسويق هو فن وعلم خلق الطلب على خدمة أو منتج بيقوم بحل مشكلة حقيقية أو إشباع رغبة عند مجموعة محددة من الناس بطريقة تلبي توقعاتهم بسعر يقدروا ومستعدين يدفعوه.


يعني دورك كمسئول عن ادارة التسويق أو عضو فيها هو:


  • خلق طلب على المنتج أو الخدمة، والتأكد من أن المنتج أو الخدمة دى فعلا بيحل مشكلة أو بيحقق رغبة.

 

  • تطوير المنتج/الخدمة بالمواصفات اللي يتوقعها الجمهور المستهدف، واللى بناء عليها بيقوم باختيار المنتج.


  •  التأكد من أن الجمهور المستهدف يقدر يدفع، وعنده الاستعداد الكامل لدفع السعر اللي انت تقول عليه بسرعة من غير طلب خصومات.


ده اللي انت المفروض تكون فاهمه عن التسويق قبل ما تشتغل في مجال التسويق عبر وسائل التواصل الإجتماعي.


إذن أول حاجة لازم تفهمها انك مسئول عن التسويق مش عن وسائل التواصل الاجتماعي.


الأصل انت بتاع تسويق، والسوشيال ميديا هي الاداة أو المكان اللي انت بتنفذ فيه الأنشطة التسويقية.


دوس هنا عشان تتعلم أساسيات ومبادئ التسويق


2- وسائل الإعلام (Media)


الجمهور عشان يشتري أي منتج أو خدمة بيعمل حاجتين:


1- يعرف معلومات مبدئية عن المنتج الفلاني.

2- يقرر ما إذا كان المنتج ده مناسب ليه ولا لا.


اذن عشان تخلق طلب على المنتج أو الخدمة اللي انت بتبيعها (تسويق) لازم تعرف الناس إن عندك المنتج الفلاني بالمواصفات الفلانية، صح؟


وبناء عليه قامت الشركات دي تدور على أحسن وسيلة ممكن يقولوا بيها للناس أن المنتج الفلاني ممكن ينفعهم، وكانت الوسيلة دي هي الإعلام.


وسائل الإعلام هي الوسائل اللي بنعرف أو “بنعلم” (جاية من اعلام) بيها المعلومات اللي احنا عايزين نعرفها.


في سياق التسويق، وسائل الإعلام مقسومة لـ 4 انواع: المدفوع، المملوك، المكتسب، والمجاني.


يلا نتكلم عن التفاصيل …


  • وسائل الإعلام المدفوعة (Paid Media)


زمان كان فيه Mass Production يعني الشركات كانت بتصنع منتجات استهلاكية بكميات كبيرة جدا.


وبالتالي كانت الشركات عشان تبيع كان لازم تتكلم مع Mass Market يعني تتكلم مع الجمهور العام كله على بعضه.


وبالتالي كنا محتاجين Mass Media يعني وسائل اعلام كل الناس دي بتتفرج عليها عشان نقدر نوصل لهم.


وبناء عليه كانت القاعدة التسويقية الأشهر ساعتها:


“شوف أكتر مكان الناس بتبص عليه و تعالي نحجز فيه فترة زمنية ما”.


ده المفهوم الأساسي وراء الإعلانات، شركة بتحجز مساحة – أيا كانت المنصة – للوصول لجمهور عريض.


الاعلانات على مختلف المنصات تندرج تحت الإعلام المدفوع، زي اعلانات الفيسبوك، إعلانات تويتر، اعلانات جوجل، اعلانات تطبيقات الموبايل الخ.


  • وسائل الإعلام المملوكة (Owned Media)


بعكس الإعلام المدفوع، وسائل الإعلام المملوكة عبارة عن ان الشركة بدل ما كانت بتروح تحجز أو تؤجر جزء من منصة/قناة تانية عشان تستفيد من الجمهور الموجود فيها، بقت بتبني المنصة الخاصة بيها بالجمهور الخاص بيها.


السبب في اتجاه الشركات لبناء المنصات التسويقية الخاصة بيها بالجمهور الخاص بيها هي طبعا الإنترنت، وارتفاع تكلفة الإعلانات.


هو ده باختصار فكرة الإعلام المملوك.


منصة تسويقية انت المتحكم فيها، متحكم في المحتوى اللي بيتم نشره، وعندك القدرة على إطلاق حملات تسويقية وقت ما تحب بالطريقة اللي تحبها، بدل ما تضطر تدفع كل ما تحب تعلن عن منتجك، وغير سياسات تغيير طريقة عمل المنصات زي تقليل معدل الوصول في الفيسبوك مثلا.


الاعتماد على وسائل الاعلام اللي من النوع ده في التسويق بيساعد تبني حاجة احنا بنسميها “Marketing Assets”.


يعني ايه؟


Asset يعني مورد له فائدة إقتصادية تملكه أو تتحكم فيه الشركة وتستطيع توليد منه الربح مستقبلا.


إذن أي وسيلة تسويقية انت تملكها أو تتحكم فيها، وتقدر تكسب منها مستقبلا تبقى Asset يعني وسيلة تقدر تعتمد عليها سنين من غير تكلفة كبيرة وانت المتحكم في كل حاجة زي الموقع الإلكتروني، المدونات، والتسويق عبر البريد الإلكتروني.


دوس هنا عشان تتعلم ازاى الاعتماد على وسائل الإعلام المملوكة ساعدني ازود المبيعات


  • وسائل الإعلام المكتسبة (Earned Media)


كلمة Earned يعني يجني أو يكسب، وهنا انت مبتدفعش مليم واحد، ولا بتبني محتوى على منصتك الخاصة، غنما بتخلي وسائل الاعلام التانية تتكلم عنك وعن المنتجات اللي عندك.


أحد أهم استراتيجيات التسويق من خلال وسائل إعلام الغير هي التدوين الضيف (Guest Blogging)، والـ Blogger Outreach.


والآن مع آخر أنواع وسائل الإعلام وهو الإعلام المجاني.


  • وسائل الإعلام المجانية (Free Media)


الاعلام المجانى متمثل في قنوات السوشيال ميديا ومحركات البحث (الجزء الـ Organic).


الفكرة ببساطة انك بتقدر توصل للناس وتقولهم اللي انت عايزه مجانا من خلال مثلا الفيسبوك، أو جوجل.


انت كده فهمت يعني ايه اعلام، وازاى تبني خطة تسويقية كاملة، وفهمت أن وسائل التواصل الاجتماعي تقدر تقوم بالأنشطة التسويقية من خلالها بشكل مدفوع أو شكل مكتسب أو شكل مجاني أو تستخدمها لتوجيه الجمهور للمنصة التسويقية الخاصة بيك.


3- التكنولوجيا في التسويق


وسائل التواصل الاجتماعي عبارة عن مواقع الكترونية، موجودة فين؟


موجودة على الانترنت.


والانترنت ده عبارة عن تكنولوجيا.


إذا عشان تنجح في التسويق باستخدام وسائل التواصل الاجتماعي لازم تكون فاهم تكنولوجيا بشكل عام، وتكون فاهم ازاى الوسائل دى بتشتغل.


ازاى الفيسبوك بيشتغل؟ ازاى تويتر بيرتب الأخبار والهاشتاج؟ ايه منهجية انستجرام في عرض الصور؟ وغيرها من الأسئلة اللي عشان تجاوبها لازم تفهم وتدرس التكنولوجيا اللي الشركات دى بنستخدمها.


بالشكل ده هتقدر تروح بالسوشيال ميديا لمستوى تاني أبعد من اللي وصل ليه أي حد.


4- علوم النفس والتسويق


خدها قاعدة عامة كده، أي علم ليه صلة مع الإنسان، لازم تدرس جمبه علم نفس على طول.


طب تدرس العلم ده بشكل أكاديمي؟ طبعا لا.


علم النفس من وجهة نظري مهارة وعلم، مهارة ملاحظة وتحليل سلوكيات البشر، وعلم متمثل فى نظريات بتشرح ليه البشر بيختاروا وبيعملوا اللي بيعملوه.


لازم تكون عارف هو اللي عمل لايك على بوست على الفيسبوك أو عمول شير عمل كده ليه؟ لازم تدرس الأسباب دي وتعرف النظريات اللي بتفسر حاجة زي دي.


5- التأثير الإجتماعي (Social influence)


زمان، وسائل الاعلام كانت عبارة عن التليفزيون والراديو والمجلات والجرايد، ومع ظهور كل وسيلة من دول قامت الشركات بتسخيرها لزيادة المبيعات والتواصل مع الجماهير.


بس كل وسائل الإعلام دى فيها عيب وهو أنها إتجاه واحد.


يعني اللي معاه الميكروفون كان يقدر يقول اللى هو عايزه فى أي حتة، وقت ما يحب، والجمهور مايقدرش يعمل أي حاجة غير إنه يسمع، مايقدرش يشارك ولا يقول رايه.


أما دلوقتي، ومع ظهور الانترنت، طلع شوية ناس قالوا طب ما نخلي الطريق رايح جاي، ونخلي الريموت في ايد الناس، فظهر نوع جديد من الميديا يتميز بأن طابعه Social، وبقى اسمه Social Media.


طب ويعني ايه Social؟


يعني إجتماع، مجتمع، ناس، قبائل …


وده معناه إن اللي ماينفعش أو مايصحش يحصل في الحياة الواقعية بين الناس وبعضها، ماينفعش يتعمل فى السوشيال ميديا.


مثلا مينفعش أما واحد صاحبك يحكيلك مشكلة ويطلب منك حلها، تتأخر في الرد عليه او تنفض له، وبالمثل على السوشيال ميديا ماينفعش تتجاهل مشاكل الجمهور.


إذن من قوانين الاجتماع اللي بنستخدمها يوميا في حياتنا، هنطلع قوانين ايه اللي ينفع وايه اللي ماينفعش في عالم التسويق باستخدام السوشيال ميديا.


اذن لازم تذاكر علم اجتماع وعلم نفس اجتماعي عشان تعرف ازاى الناس بتتصرف فى وسط الناس، وازاى تؤثر في الجمهور وتخليه يحبك البراند بتاعك.


6- أساسيات البيزنس (Business Fundamentals)


التسويق عبر مواقع التواصل الاجتماعي جزء من التسويق، والتسويق جزء من البيزنس …


يعني ايه بيزنس؟


البيزنس هو عملية متكررة لخلق وتوصيل قيمة الناس محتاجها او عايزها، بسعر مستعدين وقادرين يدفعوه، وبطريقة تشبع احتياجاتهم وتلبي توقعاتهم، وذلك حتى يستطيع العمل التجاري تحقيق الربح الذي يضمن له الاستمرار لتكرار تلك العملية مرة أخرى.


كل كلمة في التعريف اللي فات ليها مدلول وتعتبر مهمة معينة جوه أي شركة، ولو البيزنس فشل لا قدر الله، يبقى بسبب حاجة من الحاجات الموجودة في التعريف.


عشان تتعلم أساسيات البيزنس ارشح لك كتاب The Personal MBA للكاتب جوش كوفمان.


كتاب مهم جدا، وهو متاح مجانا على موقع جوش إنما في شكل فصول، وكل فصل عبارة عن مقالات.


دوس هنا لقراءة كتاب The Personal MBA كامل


وبكده أكون خلصت وشرحت لك الـ 6 محاور الأساسية اللى  تعتبر أساس كل نشاط هتعمله فى التسويق عبر مواقع التواصل الإجتماعي.


الأجزاء الستة اللي فاتوا دول يعتبروا بمثابة البنية التحتية الأساسية عشان تكون قادر تشتغل الشغلانة دى صح.


طب بالنسبة للتطبيق؟


التسويق عبر مواقع التواصل الاجتماعي: التطبيق والتنفيذ


اللى اتشرح كان التسويق عبر مواقع التواصل الاجتماعي كنظرية، أما كتطبيق فـ الموضوع  مقسوم لـ 6 محاور رئيسية، وهما:


1- استراتيجية المحتوى (Content Strategy)

2- كتابة المحتوى (Content Creation)

3- إدارة المجتمع (Moderation)

4- الإعلانات (Advertising)

5- التصميمات (Designs)

6- التحليل (Analytics)


يلا ندخل في التفاصيل …


1- استراتيجية المحتوى (Content Strategy)


دلوقتي هكلمك بشكل مباشر وعملي ازاى تعمل استراتيجية محتوى لـ وسائل التواصل الاجتماعي (Social Media Marketing Strategy).


  • أهداف التسويق


أول مكون من مكونات استراتيجية المحتوى عبر التواصل الاجتماعي هي أهداف التسويق.


وهنا لازم تسأل نفسك سؤال، وهو:


ليه بتستخدم السوشيال ميديا؟ يعني عايز توصل لإيه من الشغل عليها؟


مثلا تلاقي شركة بتستخدم السوشيال ميديا عشان تجيب ترافيك للموقع الإلكتروني، وشركة تانية بتستخدم السوشيال ميديا عشان تزود المبيعات، وهكذا.


طبعا مش محتاج أقولك إن الأهداف دى لازم تبقى SMART.


  • قنوات السوشيال ميديا


تاني مكون من مكونات الاستراتيجية هي اختيار وتحديد القنوات اللي هتركز عليها شغلك.


قنوات السوشيال ميديا كتيرة ولكن أهمها هما:


  • الفيسبوك

  • انستجرام

  • اليوتيوب

  • تويتر

  • لينكدإن

  • تيك توك

  • بينتريست

  • سناب شات


مش منطقي انك تشتغل على كل القنوات مرة واحدة، الافضل تركز على قناة أو اتنين أو تلاتة بالكتير.


  • جدول محتوى كل قناة (Editorial Calendar)


بعد تحديد أهداف التسويق، والاستقرار على القناة التسويقية اللي ستركز جهودك عليها، ياتي دور التخطيط للمحتوى الذي سيتم نشره على هذه القنوات.


الـ Editorial Calendar عبارة عن أداة تنظيمية لتخطيط المحتوى، وفيها 3 نقاط:


  • أفكار المحتوى

  • يوم وقت النشر

  • مكان نشر المحتوى


في بداية الشهر، بتعمل جلسات عصف ذهني مع فريق العمل أو مع نفسك للخروج بأفكار محتوى تحقق اهداف التسويق، وليكن خرجت بـ 50 فكرة محتوى جاهزة على التنفيذ، وقمت بجعل 10 منها لتويتر، و 25 للفيسبوك، و 15 لانستجرام.


فاللى انت بتعمله انت بتكتب اسم الفكرة ووصف قصير عنها في جدول المحتوى، وتكتب جمبه هينزل امتي وهينزل على انهى قناة، وكمان من المسئول عن التنفيذ لو الفريق فيه اكتر من واحد، واكتب جمب كل فكرة هل هتعملها لها إعلانات ولا لا ، ولو اه يبقي بكام وليه و هتوصل لايه؟


دول أهم 3 أجزاء لازم وحتما ولابد تبقى موجودة في أي استراتيجية.


طبعا تحديد الجمهور المستهدف وفهمه فهم كامل، وتحليل وفهم المنتج أو الخدمة اللي انت هتعرضها على الجمهور ده أمر مفروغ منه، وجزء اصيل لبناء أي استراتيجية تسويقية.


بعد ما بتعمل الاستراتيجية، نيجي بقي للتنفيذ، وهنبدأ باهم حاجة وهي كتابة المحتوى.


2- كتابة المحتوى (Content Creation)


المحتوى هو البنزين اللي بيحرك عربية السوشيال ميديا، فلو البيزنس ده وحش العربية مش هتدور أو هتمشي ببطء، عشان كدة المحتوى هو اهم حاجة في استراتيجية التسويق عبر وسائل التواصل الاجتماعي.


المحتوى لازم يكون بيتكلم عن مشاكل الناس، رغباتهم واهدافهم، وعن ازاى انت بالمنتجات والخدمات اللي عندك هتقدر تساعدهم.


المحتوى لازم يكون يبقي تبع وجهة نظر واتجاه معين مش عام، ويبقى منظم وبسيط وفكرته واضحة.


المحتوى ليه أنواع، زي الصورة أو الفيديو أو الإنفوجرافيك أو الكلام النصي أو المقالات القصيرة …


المحتوى بيختلف حسب القناة اللي هيتم نشره فيها، مثلا الفيسبوك حاليا مكان متميز للفيديو وبالذات القصيرة، بنتريست مكان الإنفوجرافيك، تويتر مكان الكلام النصي القصير، انستجرام مكان الصور وهكذا …


دوس هنا عشان تتعلم ازاى تكتب محتوى خطوة بخطوة 


3- إدارة المجتمع (Moderation)


انت عملت خطة، وكتبت محتوى ونشرته، تعمل ايه بعد كده؟


هنا يجي دور الـ Moderation وهو باختصار انك ترد على استفسارات الجمهور على المحتوى في الكومنتات والمنشن والشير، والرد على الرسائل وعموما أي استفسار أو شكوى من الجمهور في أي مكان على السوشيال ميديا.


في الـ Moderation ماينفعش تعمل نفسك مهتم، انت اما مهتم، أما لا، والجمهور هيعرف بسهولة لو بتكدب أو بتنافق.


زى ما بتفرح بالتعليقات الإيجابية، افرح للسلبية وفكر ازاى ترضى صاحبها عشان تخليه من ضمن فريق العمل عندك في الشركة من غير ما يبقى موظف فيها.


وخلي عندك هدف واحد بس وهو: دورك تسمع كويس اوى، وتحل مشاكل الجمهور المستهدف، وترد على كل استفساراتهم بوضوح.


4- الإعلانات (Advertising)


الإعلانات بشكل عام أداة مش استراتيجية، ماينفعش تبص على الاعلانات أنها الاداة السحرية اللي هتخلي البيزنس بتاعك يزدهر!


الإعلانات اداة تساعدك توصل لاكبر عدد ممكن من الناس، توصل بايه بقي؟ هو ده الاصل.


الإعلانات بحر واسع بس لحسن الحظ انه موضوع سخن وفيه ناس كتيرة بتتكلم فيه وبتشرح طرق واستراتيجيات مختلفة، كل اللي عليك انك تكتب في جوجل مثلا اعلانات الفيسبوك، إعلانات تويتر، اعلانات انستجرام وهكذا.


5- التصميمات (Designs)


المرئيات في شغل التسويق أمر ضرورى، عشان كدة لازم يكون معاك فريق عمل متكامل للتصميم، ولكن ده سعات مش في إمكانية ناس كتير!


هنا الحل كان في الأدوات اللي تساعدك تعمل تصميم متكامل موزون بصريا، بمساعدة قوالب كتير مجانية.


من افضل الادوات بلا منازع هي Canva. أداة تانية لا تقل أهمية وجمال عن Canva هي Snappa.


اداة Snappa القوالب والنماذج اللي عندها مناسبة أكتر للتسويق والبيزنس، ومقاستهم مظبوطة.


وكمان مواقع بتديك صور جاهزة مناسبة لموضوع المحتوى اللي بتتكلم عليه زي  Pixapay، و Pexels، و Unsplash، و Flickr، و Tumblr.


وطبعا فيه عملاق الصور Shutterstock اللي في رايي لو معاك ميزانية تسمح، فورا اعمل اكونت واشترى باقة شهرية، من ناحية هيكون معاك صور عالية الجودة جاهزة للاستخدام في أي وقت وفي أي مكان، ومن ناحية تانية هتدلع المصممين اللي معاك.


المهم انك لا تهمل موضوع التصميم في السوشيال ميديا ولا تركز فيه بزيادة لدرجة انك تعتمد عليه وتسيب المحتوى نفسه.


طيب عملت التصميم، والمحتوى وكله تمام، ونشرت المحتوى، ايه بعد كده؟


اللي بعد كده انك تـ Moderate، وتحلل.


الـ Moderation وخلصنا منه، دلوقتي هنتكلم عن التحليل …


6- التحليل (Analytics)


في التسويق اللى مابيحللش شغله اول بأول بيحكم على نفسه بثبات المستوى وفشل جهوده بعد كده …


الموضوع بسيط، انت حطيت هدف وليكن زيادة الترافيك، في نهاية المدة المقرر انك توصل لهدفك فيها، لو وصلت يبقى تمام، لو ماوصلتش يبقى لا.


“مش مهم الداتا، المهم ازاى هتقراها وتحولها لـ Action تحسن أداء شغلك بيه”


يستحسن تعمل تحليل أداء لكل قناة على حدة شهريا (وكل بوست وكل يوم وكل أسبوع)، وبعدين لكل القنوات مع بعض، عشان تعرف أداء السوشيال ميديا في خدمة البيزنس كقناة تسويقية، وطبعا عشان تعرف أداء كل قناة في السوشيال ميديا على حدة.


وبكده يكون الكورس انتهى تماما.


انا رسمت لك الخطوط العريضة، التوجهات والطرق اللي المفروض تمشي فيها لو عايز تحترف الشغل في المجال.


المطلوب منك الاستزادة في كل تخصص وفرع من الـ 12 اللي شرحتهم.


طب ازاى تزود معلوماتك ومعرفتك ومهاراتك في الـ 12 تخصص دول؟


  • اقرا مقالات ليها علاقة من جوجل من مواقع عربية ومواقع اجنبية.


  • دور على كورسات على الانترنت وكورسات اوف لاين على أرض الواقع بيتم شرح فيها الـ 12 تخصص دول.


  • تواصل مع ناس عندها خبرات كبيرة عشان تستفيد منها بس ماتروحش لحد وتقوله انا عايز اتعلم سوشيال ميديا، إنما روح قوله بالنسبة لحتة الإعلانات انا عملت كذا وكذا، ودلوقتي الوضع كذا، اعمل ايه؟!


ممكن يرد عليك وممكن مايردش، ما تتضايقش، خليك مرن وسريع، وماتقفش كتير عن أي حاجة سلبية تحصلك اثناء رحلتك في المجال.


واهم حاجة انك ماتزهقش، وتصبر، الصبر مهم اوى لو ناوى تنجح في شغلك، وفي اي حاجة عموما.


وبس كده.


اكتب لى في التعليقات كل الاستفسارات والاسئلة اللي عندك وانا هرد عليك …


33 رأي حول “أساسيات التسويق عبر مواقع التواصل الاجتماعي: الدليل النهائي”

  1. انا فعلا بعاني في مجال الماركتنج في مصر جدا. انا اصلا خبرتي توازي سنين تثؤيبا اساسها كانت PR بالاخص ازاي احل مشاكل العملاء في مجال السياحه والتعليم وشركات كبيره وقررت اعمل ماجيستير وبالفعل عملت MBA ماجيستير اداره اعمال قسم تسويق.

    انا بقالي سنه ونص بدرس في الاول كنت مبسوطه جدا بالمجال لانه صوت العميل اللي هوه اصلا موهبتي واساس خبرتي وفهم احتياجته وازاي تقدر تحل مشاكله مع القوه الشرائيه ليه. لكن بصراحه لما حاولت انزل سوق العمل التسويقي كميه الكفته اللي شوفتها وكميه الفتي اللي بعيده كل البعد عن المعني الحقيقي للتسويق انا احبطت جدا.

    فيه ناس كتير استاذ اسامه اصلا مش مدركه الفرق بين التسويق والمبيعات. وده عشان اغلبهم داخلوها حرفنه مش علم خالص. زي بالظبط لما تلاقي نقاش بيقول علي نفسه مهندس ديكور والمصيبه ان فيه طبقه بتصدقه وده مش بيقع لواحده ده بيوقع كل الناس اللي بتشتغل وبتدرس سنين عشان تقدر تطلع كلمه من بقها قبل ما تتكلم.

    مقالاتك رائعه واحب اعرفك انك تقريبا انت وقله قليله جدا من المصريين او العرب عموماَ اللي بتابعهم لانهم فاهمين بيقولوا ايه مش بيعملوا عجين او بيع كلام والسلام. انا بشكرك وربنا يوفقك

    رد
    • حقيقي كنت مستمتع جدا وانا بقرا الفيدباك بتاعك عن السوق، لان بيوثق حاجة حقيقة ملموسة فى السوق، بس عندى راي مختلف، السوق هيفصل فيه ناس وحشة وناس نص نص وناس حلوة اوى، الفكرة فى المحالاوت اللى بيبذلها كل واحد فينا لحد ما يحين اللحظة ويوصل للنقطة اللى بيطمح فيها.

      أتمنى لكي كل التوفيق، وأشكرك جدا جدا على رايك المهم جدا بالنسبة لى.

      تحياتي ^^

      رد
  2. المقال اكثر من رائع الصراحة لامم الموضوع بطريقة حلوة . انا حفظت الموقع في bookmarks وبقيت اديه لاصحابي المهتمين بالمجال ?. شكرا كتير لمجهودك .
    كنت حابة بس ترشيح لكتب او فيديوهات او مقالات للاساسيات الستة الي في المقال . يعني حاجة للمبتئين لكن مغطية الموضوع . انا نزلت influence the psychology of persuasion الي حضرتك رشحته وحابة لو ينفع حاجة زيه في باقي الاساسيات . هتكون مساعدة عظيمة بجد ?

    رد
    • أشكرك جدا جدا يا أفنان على دعمك ^^

      بالنسبة لطلبك حاضر هاعمله فى مقال منفصل.

      أشكرك ^^

      رد
  3. السلام عليكم انا مسؤل دعايه وعلاقات ف جمعيه اهليه غير هادفه للربح وف منحه 3 شهور عن social media markting مقدمه من معهد تكنولوجيا المعلومات iti ومش عارفه اقنع الناس بيها وباهميتها ف سوق العمل اعمل ايه واقولهم ايه

    رد
  4. اكثر شي مفيد ومختصر ومقنن قريته هذي السنة ماشاء الله لا قوة الا بالله .. نفع الله بك ي اخي ابدعت واثريت المحتوى العربي
    جزيت خيرا

    رد
    • وعليكم السلام ورحمة الله وبركاته يا سلمي ^^

      الـ Owned Media إن الشركة يكون عندها منبر إعلامي خاص بيها ملكها مش بتدفع إيجاره كل شهر، وتكون متحكملة فيه بمزاجها تحط اللى هي عايزه فى اي وقت وتتحكم فى اللى يشوفه كمان.

      على عكس الميديا المعتادة اللى هي مدفوعة وليكن مثلا قناة على التلفيزيون، الجمهور مش بتاعك، ده جمهور القناة او البرنامج او المسلسل وهيسمع رسالتك التسويقية غصب عنه، يعني قلما تلاقيه مهتم، القناة حقها توافق على المحتوى او لا، مدة والمحتوى بتاعك هيتشال، ولو هيفضل فكل شهر هتدفع شئ وشويات، فهمتي؟

      رد
  5. مساء الخير يافندم،
    بجد حضرتك من أفضل الناس اللي ساعدتني في بداية الطريق اني أفهم الليلة ماشية ازاي.
    استأذنك ايه أفضل مصدر أتعلم منه business عن طريق النت؟؟ للأسف صعب علي اني أسافر لارتباطي بالعمل غير ان الكورسات بيبقى سعرها غالي جدًا جدًا.

    رد
    • صباح الخير يا افندم، بعتذرلك على التاخير فى الرد.

      أشكرك على رايك العظيم بالنسبة لى ^^

      اعتقد إنك لازم تبدأ تقرا عند Harvard Business Review و Fast Company و Inc. (magazine) ، والافضل طبعا تتابع ناس بتتكلم فى البيزنس وتشوف دراسات وحالات فى البيزنس والاهم والاهم إنك تلاحظ ، تلاحظ كل حاجة حواليك لإن كل حاجة حواليك هي بيزنس.

      رد
  6. اشكرك علي ردك
    طيب زي مين الناس ديه ياريت لو حضرتك تقولي اسماء
    ثانيا أنا معنديش خلفيه عن التسويق انا لسه ببدا من خلال مقالات حضرتك فمش هعرف مكانها فين في التسويق
    ثالثا يبقي جزاك الله خيرا إذا حضرتك تقولي علي دبلومه offline حضرتك هتحاضرها قريب عشان بجد استفد من سيادتك جدا ومحتاج جدا تكون سيادتك إلي بتحاضر
    وجزاك الله خيرا

    رد
    • أولا يا محمد ، فعلا مش عارف أشكرك ازاى على الكلام الجميل ده ^^

      بص يا ريس، لو لسه ماقريتش مقال اساسيات التسويق ، لازم تقراه حالا.

      ثانيا انا مش فى خطتي للنص الاول من السنة انى اعمل حاجة اوف لاين او دبلومة كاملة ولكن لو انت محتاجها اوى ممكن جيب اتنين معاك تكون ظروفكم متشابهة وانا تحت امرك وامرهم ^^

      بالنسبة للناس اللى بتتكلم فى علم النفس من وجهة نظر التسويق ، دول شوية منهم:

      Robert Cialdini و Roger Dooley و Nir Eyal و Martin Lindstrom و عندك الاخوة Chip Heath و Dan Heath و فيه غيرهم بس دول اللى انا فاكرهم دلوقتي ، وطبعا ماتنساش تقرا فى مدوانت زي Buffer او عامة اكتب فى جوجل Marketing و Psychology وهيظهر لك مقالات مهمة جدا.

      تحياتي ^^

      رد
      • الشكر لله يا فندم
        أولا ده مش كلام ده حقيقه فعلا وربنا ينفع بيك يارب
        ثانيا استأذن حضرتك ترسلي وسيله تواصل مع سيادتك
        وجزاك الله خيرا

        رد
  7. اشكرك جدا علي هذا المقال الرائع
    بالنسبه لي بحثت كتير عن اني اتعلم علم النفس التطبيقي
    فعلي سبيل المثال قرات في الأدب وكتاب ديل كارنيجي
    ولكني لم اصل بعد فاذا تكرمت ترشدني علي طريقه سيادتك اتبعتها او طريقه اخري لكي ابدك في تعلم هذا العلم
    وجزاك الله خيرا

    رد
    • ازيك يا محمد، اولا اشكرك جدا ^^

      اقرا كتاب Influence: The Psychology of Persuasion او الملخص بتاعه ، وعامة اقرا فى علم النفس لناس مختلفة، بس انت بتقرا وانت عارف المفروض اللى بتقراه ده مكانه فين فى التسويق، فاهمني؟

      رد
  8. شكرا جدا هراجعه تانى ان شاء الله ^^
    بس انا مسجل من فتره وما فيش حاجه ةصلتنى على ال gmail ؟

    رد
    • أشكرك يا احمد ^^

      بالنسبة للكورس ، فدور فى الايميل باسمي Osama Salah وهيظهر لك باذن الله.

      رد

شارك